ភ្នំពេញ ៖ យោងតាមការឲ្យដឹងពីមន្ត្រីនគរបាលព្រហ្មទណ្ឌខណ្ឌដង្កោប្រាប់កាលពីរសៀលថ្ងៃទី១៦ ខែកុម្ភៈ ឆ្នាំ២០១៥នេះថា ជនសង្ស័យកាច់សោ.កម៉ូតូ២នាក់ ដែលត្រូវកម្លាំងនគរបាលព្រហ្មទណ្ឌខណ្ឌដង្កោ ដឹកនាំដោយលោក យឹម សុជាតិ អធិការខណ្ឌដង្កោតាមស្រាវជ្រាវរហូតចាប់ក្របួចបានក្នុងរយៈពេលប្រមាណ៤០នាទី ក្រោយពេលធ្វើសកម្មភាពកាច់សោ.កម៉ូតូពីប្រជាពលរដ្ឋ កាលពីវេលាម៉ោង១៥រសៀល ថ្ងៃទី១៣ ខែកុម្ភៈ ឆ្នាំ២០១៥ នៅចំណុចផ្លូវលំ ភូមិកំរែង សង្កាត់សាក់សំពៅ ខណ្ឌដង្កោ សមត្ថកិច្ចនឹងដឹកបញ្ជូនទៅឃុំខ្លួនបណ្ដោះអាសន្ននៅពន្ធនាគារព្រៃស បន្ទាប់ពីទទួលបានដីកាសម្រេចរបស់សាលាដំបូងរាជធានីភ្នំពេញ។
ជនសង្ស័យទាំង២នាក់ ទី១-ឈ្មោះ ស៊ុន លីន ភេទប្រុស អាយុ៣៨ឆ្នាំ មុខរបរកម្មករ រោងចក្រ ស្នាក់នៅផ្ទះជួលក្បែរផ្សារប៉េសេ សង្កាត់បឹងទំពុន ខណ្ឌមានជ័យ និងទី២-ឈ្មោះ នូវ វាសនា ភេទប្រុស អាយុ២៥ឆ្នាំ មុខរបរ និងស្នាក់នៅមិនពិតប្រាកដ។
មន្ត្រីនគរបាលព្រហ្មទណ្ឌខណ្ឌដង្កោប្រាប់បន្តថា ជនសង្ស័យទាំង២នាក់ខាងលើបានធ្វើសកម្មភាពលួចកាច់សោ.កម៉ូតូម៉ាកសេ១២៥ ពណ៌ខ្មៅសេរីឆ្នាំ២០០៧ ពាក់ស្លាកលេខ ភ្នំពេញ 1O-2964 របស់ជនរងគ្រោះឈ្មោះ សាន សុលាភ ភេទស្រី អាយុ៣៧ឆ្នាំ មុខរបរកសិករ បច្ចុប្បន្នរស់នៅភូមិក្រាំងតាផូ សង្កាត់សាក់សំពៅ ខណ្ឌដង្កោ កាលពីវេលាម៉ោង១៥រសៀល ថ្ងៃទី១៣ ខែកុម្ភៈ ឆ្នាំ២០១៥ នៅចំណុចផ្លូវលំ ភូមិកំរែង សង្កាត់សាក់សំពៅ ខណ្ឌដង្កោ ខណៈជនរងគ្រោះចតម៉ូតូទុកក្បែរខ្លួនដើម្បីទិញសាប៊ូ លុះធ្វើសកម្មភាពបានសម្រេចហើយពួកវាបានជិះគេចខ្លួន ប៉ុន្តែដោយសារការស្រែកឆោឡោពីជនរងគ្រោះ ទើបកម្លាំងចេញពួកស្ទាក់ចាប់ក្របួចបានម្នាក់ឈ្មោះ ស៊ុន លីន ប៉ុន្មាននាទីក្រោយមក។ បន្ទាប់ពីការសាកសួរទៅតាមជំនាញ ទើបឈានទៅដល់ការឃាត់ខ្លួនបានជនសង្ស័យម្នាក់ទៀត ក្នុងរយៈពេល៤០នាទីប៉ុណ្ណោះ ព្រមទាំងដកហូតបានម៉ូតូជនរងគ្រោះមកវិញ និងម៉ូតូជនសង្ស័យ០១គ្រឿងម៉ាកស្តេប។
មន្ត្រីនគរបាលព្រហ្មទណ្ឌខណ្ឌដង្កោប្រាប់បន្តទៀតឲ្យដឹងថា ម៉ូតូជនរងគ្រោះ ត្រូវបានប្រគល់ជូនជនរងគ្រោះវិញពេលរសៀល ដោយឡែកជនសង្ស័យទាំង២នាក់ត្រូវបានកសាងសំណុំរឿងបញ្ជូនទៅសាលាដំបូងរាជធានីភ្នំពេញ ដើម្បីផ្ដន្ទាទោសទៅតាមផ្លូវច្បាប់៕
រ៉ាវុទ្ធ
0 Comments