ភ្នំពេញ ៖ យោងតាមរបាយការណ៍របស់ក្រសួងការងារ និងបណ្តុះបណ្តាលវិជ្ជាជីវៈបានឲ្យដឹងថានៅក្នុងឆ្នាំ២០១៤កន្លងទៅក្រសួងបានរកឃើញសហគ្រាសប្រើប្រាស់កម្មករវ័យក្មេង និងពលកម្មកុមារសរុបចំនួន៤៦កន្លែង។
របាយការណ៍ខាងលើបានឲ្យដឹងទៀតថា ឆ្នាំ២០១៤ ក្រុមការងារអធិការកិច្ចបានចុះធ្វើអធិការកិច្ចសាមញ្ញចំនួន៦៣៣លើក ក្នុងនោះមានក្រុមហ៊ុនចំនួន១១០ និងរោងចក្រចំនួន៦១៣រោងចក្រ។ ក្នុងចំណោមរោងចក្រ និងក្រុមហ៊ុនដែលក្រុមការងារអធិការកិច្ចចុះធ្វើអធិការកិច្ចនោះគេបានរកឃើញថា មានសហគ្រាសប្រើប្រាស់កម្មករវ័យក្មេងចំនួន៣៣ស្មើនិងចំនួន៣០០នាក់ ក្នុងនោះស្រី២៦៧នាក់ និងសហគ្រាសប្រើប្រាស់កម្លាំងពលកម្មកុមារចំនួន១៣នាក់ស្មើ និង៤៦នាក់ស្រី៤៣នាក់។
ពាក់ព័ន្ធបញ្ហានេះអង្គការអន្តរជាតិខាងការងារ(ILO)សមាគមរោងចក្រកាត់ដេរនៅកម្ពុជាបានទទួលស្គាល់ថា បច្ចុប្បន្ននេះការប្រើប្រាស់ពលកម្មកុមារនៅតាមរោងចក្រកាត់ដេរសំលៀកបំពាក់និងស្បែកជើងដែលនាំចេញទៅលក់នៅក្រៅប្រទេសនៅតែមាននៅឡើយ តែនេះមិនមែនជាកំហុសរបស់ភាគីរោងចក្រនោះទេគឺដោយសារតែកម្មករចង់បានការងារធ្វើបានបន្លំឯកសារ។
លោក វ៉ាន់ ស៊ូអៀង ប្រធានសមាគមរោងចក្រកាត់ដេរនៅកម្ពុជាបានមានប្រសាសន៍ថាពលកម្មកុមារនៅកម្ពុជាមានបញ្ហាប្រឈមមួយគឺការក្លែងបន្លំឯកសាររបស់កម្មករនៅពេលដាក់ពាក្យសុំធ្វើការ។ លោកបន្តថា «តាមពិតនិយោជកគ្មានចេតនាជ្រើសរើសពលកម្មកុមារចូលបម្រើការងារទេ តែមានបញ្ហាការក្លែងឯកសារសៀវភៅគ្រួសារអត្តសញ្ញាណប័ណ្ណ ដោយសារគាត់ចង់បានការងារធ្វើ។ ប៉ុន្តែជាចេតនារបស់និយោជកមិនដែលចង់បានពលកម្មកុមារទេវាមិនមានចំណេញទេ។ ព្រោះថា កាលណាប្រើពលកម្មកុមារអ្នកបញ្ជាទិញគេមិនទិញទេ ធ្វើឲ្យយើងខូចខាតច្រើនណាស់»។
លោកស្រី ពេជ្រ ម៉ាលីកា អ្នកគ្រប់គ្រងគម្រោងរោងចក្រកាន់តែប្រសើរនៅកម្ពុជានៃអង្គការអន្តរជាតិខាងការងារ(ILO) បានមានប្រសាសន៍ថារោងចក្រដែលចុះត្រួតពិនិត្យមិនបានគ្របដណ្ដប់ទូទាំងប្រទេសទេ គឺអនុវត្តតែរោងចក្រណាដែលបាននាំចេញប្រមាណជាង៥២៩រោងចក្រ។ ក្នុងនោះយើងបានរកឃើញមានរោងចក្រចំនួន៣៤ករណីក្នុងឆ្នាំ២០១៤ ដែលបានប្រើកម្លាំងពលកម្មកុមារ។ ចំនួននេះបើធៀបនឹងឆ្នាំ២០១៣ កន្លងទៅឃើញថា មានការថយចុះ៣៣ករណី។
លោកស្រីបានបន្តថា «តែទោះជាយ៉ាងណាក៏វានៅតែជាបញ្ហាកង្វល់ក្នុងវិស័យទាំងមូល។ដូចនេះការចុះកិច្ចព្រមព្រៀងនេះជាយន្តការមួយអនុវត្តទៅឲ្យបានស្រួល និងមានឯកសារយោងត្រឹមត្រូវ នេះជាឆន្ទៈខាងសមាគមនិងគម្រោង»។
ដើម្បីលុបបំបាត់ពលកម្មកុមារនៅក្នុងឧស្សាហកម្មកាត់ដេរនៅប្រទេសកម្ពុជាកាលពីសៀលថ្ងៃទី១៨ ខែធ្នូ នៅទីស្ដីការក្រសួងការងារ និងបណ្តុះបណ្តាលវិជ្ជាជីវៈសមាគមរោងចក្រ កាត់ដេរ នៅកម្ពុជា (GMAC) និងគម្រោងរោងចក្រកាន់តែប្រសើរនៅកម្ពុជា នៃអង្គការអន្តរជាតិ ខាងការងារ (ILO)បានចុះកិច្ចព្រមព្រៀងរួមគ្នាដែលចុះហត្ថលេខាដោយលោក វ៉ាន់ ស៊ូអៀង ប្រធានសមាគមរោងចក្រកាត់ដេរនៅកម្ពុជាជាមួយលោកស្រី ចានី កាស៊ីមន ប្រធានគ្រប់គ្រងគម្រោងរោងចក្រ កាន់តែប្រសើរនៅកម្ពុជានៃអង្គការអន្តរជាតិខាងការងារ(ILO) ដោយមានការចូលរួមធ្វើជាសាក្សីពីលោកអ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ។
លោកស្រី ចានី កាស៊ីមន ប្រធានគ្រប់គ្រងគំរោងរោងចក្រកាន់តែប្រសើរនៅកម្ពុជានៃអង្គការអន្តរជាតិខាងការងារ(ILO)បានចាត់ទុកកិច្ចព្រមព្រៀងនេះវាជួយពង្រឹងបន្ថែមទៀតរវាងគម្រោង និងសមាគមក្នុងការអនុវត្តលើកាត់បន្ថយពលកម្មកុមារក្នុងវិស័យកាត់ដេរ។ រោងចក្រណាប្រើកម្លាំងពលកម្មកុមារ ហើយមិនបានកែលំអយើងនឹងដាក់រោងចក្រនោះទៅក្នុងវេបសាយរបស់យើង។
លោក អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈបានចាត់ទុកកិច្ចព្រមព្រៀងនេះមានសារៈសំខាន់ណាស់ដើម្បីឆ្លុះបញ្ចាំងឲ្យឃើញនូវកិច្ចប្រឹងប្រែងយ៉ាងខ្លាំង និងមានស្មារតីទទួលខុសត្រូវប្រកបដោយវិជ្ជាជីវៈរបស់យើងទាំងអស់គ្នាថែមទៀតក្នុងកិច្ចការពារកុមារពីការងារប្រកបដោយគ្រោះថ្នាក់ និងពង្រីកយន្តការប្រឆាំងពលកម្មកុមារក្នុងវិស័យកម្មន្តសាលដែលជាមុខព្រួញសេដ្ឋកិច្ចដ៏ចំបងមួយរបស់ប្រទេសកម្ពុជា។ លោករដ្ឋមន្ត្រីបានមានប្រសាសន៍ថា «កិច្ចព្រមព្រៀងនេះជាគ្រឹះដ៏រឹងមាំមួយសម្រាប់គ្រប់ភាគីពាក់ព័ន្ធក្នុងការចូលរួមចំណែកជួយលើកកំពស់លក្ខខណ្ឌការងារ និងធានាសុវត្ថិភាពការងារដល់ពលករវ័យក្មេងដែលច្បាប់អនុញ្ញាតិឲ្យបម្រើការងារព្រមទាំងកែលំអការងារប្រឆាំងពលកម្មកុមារកាន់តែមានប្រសិទ្ធភាព»។
លោករដ្ឋមន្ត្រីបានជូនសារដល់រោងចក្រទាំងអស់សូមប្រុងប្រយ័ត្នក្នុងការប្រើប្រាស់កម្លាំងពលកម្មសូមពិនិត្យឲ្យបានម៉ត់ចត់អត្តសញ្ញាណបើមិនច្បាស់លាស់សូមជួនដំណឹងមកក្រសួងដើម្បីឲ្យក្រុមអធិការកិច្ចរបស់យើងទៅពិនិត្យផ្ទៀងផ្ទាត់ហើយករណីចាំបាច់មានការពិនិត្យតាមបែបវេជ្ជសាស្ត្រទៀតដើម្បីឲ្យស្របតាមច្បាប់។
រាជរដ្ឋាភិបាលបានកំណត់ថា នៅឆ្នាំ២០១៥នេះធ្វើយ៉ាងណាកាត់បន្ថយពលកម្មកុមារមកនៅត្រឹម៨ភាគរយធានានូវការអប់រំសម្រាប់ទាំងអស់គ្នា និងបញ្ចប់ទម្រង់ធ្ងន់ធ្ងរនៃពលកម្មកុមារនៅឆ្នាំ២០១៦ខាងមុខ៕
សំអឿន
0 Comments