ព្រះសីហនុ ៖ កាលពីថ្ងៃទី១៤ ខែកុម្ភៈ ឆ្នាំ២០១៥ សហភាព សហព័ន្ធយុវជនខេត្តព្រះសីហនុប្រមូលថវិកាជួយដល់ជនរងគ្រោះដោយសារអគ្គីភ័យចំនួន០២គ្រួសារ គឺគ្រួសារលោក សឿង លី អាយុ៤២ឆ្នាំ គ្រួសារលោក យ៉ន់ រិក អាយុ៤៤ឆ្នាំ និងគ្រួសារក្រីក្រមានជំងឺរបស់លោក រស់ សុទ្ធ អាយុ៤៦ឆ្នាំ មានទីតាំងស្រុកព្រៃនប់ ខេត្តព្រះសីហនុ ដឹកនាំដោយឯកឧត្តម ស្រ៊ុន ស្រ៊ន់ អភិបាលរងខេត្ត ព្រះសីហនុ។ ឯកឧត្តម ស្រ៊ុន ស្រ៊ន់ បានមានប្រសាសន៍ពាំនាំនូវការសាកសួរសុខទុក្ខពីសំណាក់ឯកឧត្តម ហ៊ុន ម៉ានី ប្រធានសហភាព សហព័ន្ធយុវជនកម្ពុជា ដែលជានិច្ចកាលឯកឧត្តមបានគិតគូរពីសុខទុក្ខ និងជីវភាពរស់នៅរបស់បងប្អូនប្រជាពលរដ្ឋនៅទូទាំងប្រទេស ជាពិសេសប្រជាពលរដ្ឋជួបប្រទះនូវគ្រោះធម្មជាតិ គ្រោះអគ្គីភ័យ ជនក្រីក្រ ចាស់ជរាគ្មានទីពឹង ដើម្បីធ្វើយ៉ាងណាសង្គ្រោះ សម្រួលនូវការខ្វះខាតក្នុងជីវភាពរស់នៅប្រចាំថ្ងៃ។
ឯកឧត្តមបានសំដែងការចូលរួមសោកស្ដាយ និងចូលរួមរំលែកទុកលំបាកដែលបានបាត់បង់លំនៅដ្ឋាន ជួបប្រទះនូវកាលំបាកខ្វះខាត និងតម្រូវការចាំបាច់នូវទីជម្រកស្នាក់នៅរបស់បងប្អូនប្រជាពលរដ្ឋរងគ្រោះទាំងពីរគ្រួសារដោយសារអគ្គីភ័យឆាបឆេះអស់ កាលពីដើមខែកុម្ភៈ ឆ្នាំ២០១៥កន្លងមកនេះ។ ដោយសារមើលឃើញនូវការលំបាកខ្វះខាតទីជម្រក ស្បៀង ប្រចាំថ្ងៃ ទើបសហភាព សហព័ន្ធយុវជនខេត្តព្រះសីហនុ សហការជាមួយសហភាព សហព័ន្ធយុវជនស្រុកព្រៃនប់ បានប្រមូលថវិកាផ្ទាល់ខ្លួន ដើម្បីយកមកចូលរួមជួយរំលែកនូវការលំបាកខ្វះខាតរបស់បងប្អូនរងគ្រោះ និងគ្រួសារក្រីក្រមានជំងឺនាពេលនេះ។ សបញ្ជាក់ពីការយកចិត្តទុកដាក់ពីសំណាក់សហភាព សហព័ន្ធយុវជនកម្ពុជាខេត្តព្រះសីហនុ ដែលតែងតែចូលរួមសហការជាមួយគ្រួសារជនរងគ្រោះ និងជនក្រីក្រនៅក្នុងខេត្តព្រះសីហនុ ដើម្បីរកជំនួយឧបត្ថម្ភយកមកចែកជូនជួយសម្រួលជីវភាពរស់នៅក្នុងគ្រួសារ និងមានទីជម្រកសមរម្យឡើងវិញ ដើម្បីឲ្យកូនៗបានបន្តការសិក្សារួមចំណែកចូលរួមកាត់បន្ថយភាពក្រីក្ររបស់ប្រជាពលរដ្ឋ ស្របតាមគោលនយោបាយកំណែទម្រង់ស៊ីជំរៅរបស់រាជរដ្ឋាភិបាលកម្ពុជាអាណត្តិទី៥។
អំណោយដែលចែកជូនគ្រួសារជនរងគ្រោះដោយសារភ្លើងឆេះផ្ទះទាំងពីរគ្រួសារ ក្នុងមួយគ្រួសារទទួលបានអង្ករចំនួន៥០គីឡូក្រាម ស័ង្កសីចំនួន៤០សន្លឹក ថវិកា១លានរៀល និងសម្ភារៈផ្ទះបាយចំនួន១៦មុខផ្សេងទៀត ដោយឡែកគ្រួសារលោក យិន រិក អាយុ៤៤ឆ្នាំ មានកូនក្នុងបន្ទុក៥នាក់ ប្រុស០៤នាក់ ស្រី០១នាក់ ទទួលបានថវិកាបន្ថែមចំនួន៩៥៣.៦០០រៀល ពីក្រុមប្រឹក្សាយុវជននៃវិទ្យាល័យហ៊ុន សែនវាលរេញ។ ចំពោះគ្រួសារក្រីក្រនិងមានជំងឺលោក រស់ សុទ្ធ អាយុ៤៦ឆ្នាំទទួលបានអង្ករ៥០គីឡូក្រាម ថវិកា៥០ម៉ឺនរៀល មី០២កេស ទឹកដោះគោ៥កំប៉ុង ស្ករស០២គីឡូក្រាម និងតែមួយកញ្ចប់៕
ស៊ុយ ចាន់ធា
0 Comments