ភ្នំពេញ ៖ ឆាយ មាស អ្នកប្រដាល់ក្លិបសំរោងកោងខេត្តបាត់ដំបងនឹងត្រូវជួបប្រកួតជាមួយ ឆាំ រ៉ែម អ្នកប្រដាល់ក្លិបព្រះខ័នរាជលើសង្វៀនបាយ័នបឹងស្នោ នាថ្ងៃល្ងាចអាទិត្យ ទី១៥ ខែកុម្ភៈ ឆ្នាំ២០១៥ នេះ។ ពីរនាក់នេះមិនធ្លាប់ប៉ះគ្នាទេកាលពីពេលកន្លងមក។ តាមពិតរវាងអ្នកប្រដាល់ទាំងពីរនេះ បើគិតពីប្រវត្តិប្រកួតនោះ ឆាយ មាស មិនដល់ ឆាំ រ៉ែមទេ ដោយ ឆាំ រ៉ែម គេឡើងប្រកួតជាងមួយដងឯណោះ ខណៈដែល ឆាយ មាស គេឡើងប្រកួតបានប្រមាណជាង៧០ដងប៉ុណ្ណោះ។ តែបើមើលពីការសម្បទាវិញ ឆាយ មាស ហាក់ដូចជាចាស់ជាង ឆាំ រ៉ែម។
ឆាំ រ៉ែម គេជាម្ចាស់ខ្សែក្រវាត់ទម្ងន់៥៤គីឡូក្រាម ប៉ុន្តែឥឡូវនេះគេមានទម្ងន់៦០គីឡូក្រាម ទើបជួបជាមួយ ឆាយ មាសនេះ។ ឆាំ រ៉ែមគេមានស្នៀតប្រដាល់ល្អ និងខ្លាំង ហើយក៏មិនមាននរណាងាយយកឈ្នះលើរូបគេបាននោះដែរក្នុងប្រភេទទម្ងន់ដូចគ្នានោះ។ ៦ប្រកួតចុងក្រោយនេះ គេឈ្នះទាំងអស់ ដែលការប្រកួតចុងក្រោយគេនេះ ឆាំ រ៉ែម បានផ្ដួលអ្នកប្រដាល់ គួន ប៊ុនហ៊ីម ក្លិបពន្លឺសាមគ្គីខេត្តបាត់ដំបងដោយពិន្ទុ កាលពីថ្ងៃទី២៣ ខែមករាកន្លងមកនេះ។
ឆាយ មាស យ៉ាប់តែមួយមុខទេ គឺកម្លាំងស៊ុហ្វឆាប់ធ្លាក់ ដែលធ្វើឲ្យការប្រកួតរបស់គេធ្លាក់ចុះនៅចុងទឹកនោះ។ គេឡើងប្រកួតមិនដែលឃើញឈ្នះនោះទេ ការប្រកួតលើកចុងក្រោយនេះ ឆាយ មាស វាយចាញ់ ជ័យ ប៊ុនសង់ អ្នកប្រដាល់ក្លិបគីសែមានរិទ្ធដោយពិន្ទុ កាលពីថ្ងៃទី០៨ ខែកុម្ភៈ កន្លងមកនេះ។ សម្រាប់ការឡើងប្រកួតលើកនេះ ឆាយ មាស តាមមើលក៏ប្រហែលជាមិនអាចឈ្នះ ឆាំ រ៉ែម បានដែរ ព្រោះថា ឆាំ រ៉ែម គេមានផ្លែល្អជាង និងស៊ុហ្វខ្លាំងជាង។ ចាំមើល តើ ឆាយ មាស អាចតស៊ូជាមួយ ឆាំ រ៉ែម បានឬអត់? គួន ប៊ុនហ៊ីម អ្នកប្រដាល់ក្លិបពន្លឺសាមគ្គីខេត្តបាត់ដំបងនឹងត្រូវជួបប្រកួតសងសឹកជាមួយ ម៉ន ភីរម្យ អ្នកប្រដាល់ក្លិបការិយាល័យទី៥ កងទ័ពជើងគោក។
កាលពីជួបប្រកួតគ្នាលើកមុន(ថ្ងៃទី០៥ ខែកញ្ញា ឆ្នាំ២០១៤) គួន ប៊ុនហ៊ីម បានវាយចាញ់ ភីរម្យ ក្នុងទឹកទី៣ បន្ទាប់ពីត្រូវភីរម្យវាយបែកមុខហូរឈាមខ្លាំងមិនអាចបន្តការប្រកួតទៀតបាន។ ប៊ុនហ៊ីម គេមានស្នៀតប្រដាល់មិនអន់ទេ ប៉ុន្តែបើប្រៀបធៀបជាមួយ ម៉ន ភីរម្យនោះ គឺចាញ់ផ្លែរបស់ ភីរម្យ ។ ដូច្នេះ ចាំមើលតើ គួន ប៊ុនហ៊ីម គេអាចសងសឹក ម៉ន ភីរម្យបានសម្រេចឬអត់?
ម៉ន ភីរម្យ គេស្គាល់រេញប្រដាល់ក្រោយ ប៊ុន ហ៊ីមទេ ប៉ុន្តែអ្នកប្រដាល់រូបនេះ វាយខ្លាំង និងច្រើនវាយប្ដូរជាមួយគូប្រកួតដោយមិនសូវខ្លាចញញើតនោះឡើយ។ ម៉ន ភីរម្យប្រកួតចុងក្រោយវាយឈ្នះ ណាម ម៉ូរ៉ាក់ អ្នកប្រដាល់ក្លិបពន្លឺសាមគ្គីខេត្តបាត់ដំបងដោយពិន្ទុ។
អេ ចន្ទ្រា អ្នកប្រដាល់ក្លិបអេភូថងកីឡានឹងជួបប្រកួតជាមួយ ស៊ីវ សុងម៉េង អ្នកប្រដាល់ក្លិបនាគរាជមានជ័យ។ ពីរនាក់នេះ ប្រកួតគ្នាក្នុងទម្ងន់៧៥គីឡូក្រាម។ ពួកគេពុំធ្លាប់ដែលជួបគ្នាទេពីមុនមក។ស៊ីវ សុងម៉េង និង អេ ចន្ទ្រា ជាអ្នកប្រដាល់វាយក្នុងទ្រុង ដូច្នេះការមកប្រកួតប្រដាល់ក្បាច់បុរាណខ្មែរបែបនេះចៀសមិនផុតពីបោកគ្នានោះទេ។ សម្រាប់ការជួបគ្នានេះ មិនដឹងថានរណាជាអ្នកឈ្នះឡើយ។
សូយ សូរិយា អ្នកប្រដាល់ក្លិបពោធិជ័យកីឡា ត្រូវគេផ្គូឲ្យជួបប្រកួតជាមួយ ឯម លឿងរ៉ា អ្នកប្រដាល់ក្លិបឫទ្ធីពោធិសែនជ័យ ដោយប្រកួតក្នុងទម្ងន់៦៧គីឡូក្រាម។ អ្នកប្រដាល់ សូយ សូរិយានេះ ជាអ្នកប្រដាល់ជើងថ្មី ចំណែក ឯម លឿងរ៉ា ជាអ្នកប្រដាល់យូរហើយ និងមានស្នៀតប្រដាល់ល្អថែមទៀត។ រវាងអ្នកប្រដាល់ទាំងពីរនាក់នេះ គេពុំមានជំនឿថា សូយ សូរិយា អាចវាយឈ្នះ ឯម លឿងរ៉ានោះឡើយ៕
វិសិទ្ធ
0 Comments