ភ្នំពេញ ៖ អភិបាលរាជធានីភ្នំពេញលោក ប៉ា សុជាតិវង្យ និងលោក ស៊ឹម ស៊ីថា អគ្គនាយករដ្ឋាករទឹកស្វយ័តក្រុងភ្នំពេញកាលរសៀលថ្ងៃទី១២ ខែកុម្ភៈ ឆ្នាំ២០១៥នេះ បានបើកវេទិកាសាធារណៈមួយជាមួយប្រជាពលរដ្ឋនៅក្នុងសង្កាត់ចោមចៅ ខណ្ឌពោធិសែនជ័យជុំវិញការតទឹកឲ្យកម្មកររោងចក្រ និងប្រជាពលរដ្ឋក្រីក្រក្នុងតម្លៃថោកនៅក្នុងរាជធានីភ្នំពេញ ស្របតាមការចង្អុលបង្ហាញពីរដ្ឋាភិបាលកម្ពុជា។ ក្នុងវេទិកានោះ ប្រជាពលរដ្ឋមួយចំនួនដែលមានផ្ទះជួលបានលើកឡើងពីកង្វល់របស់ខ្លួនជាច្រើនដើម្បីឲ្យអាជ្ញាធររាជធានីភ្នំពេញ ក៏ដូចជាអង្គភាពរដ្ឋាករទឹកស្វយ័តក្រុងភ្នំពេញជួយពួកគាត់ពិសេសលើការតបណ្ដាញទឹកនេះតែម្តង។ ពួកគាត់លើកឡើងថា ពួកគាត់មិនជំទាស់ទៅនឹងការសម្រេចចិត្តរបស់រាជរដ្ឋាភិបាលនោះទេ ប៉ុន្តែអ្វីដែលពួកគាត់ធ្វើមិនបាននោះគឺមកដល់ពេលនេះពួកគាត់មិនទាន់មានបណ្ដាញទឹករដ្ឋប្រើប្រាស់នូវឡើយទេ តើពួកគាត់បញ្ចុះតម្លៃទឹកឲ្យបងប្អូនកម្មករដែលជួលផ្ទះគាត់ស្នាក់នៅយ៉ាងម៉េចកើត។ ប្រជាពលរដ្ឋខ្លះក៏បានលើកឡើងផងដែរថា កម្មករជួលផ្ទះគាត់ស្នាក់នៅជាច្រើនបន្ទប់ ហើយគាត់ប្រើប្រាស់កុងទ័រទឹកតែមួយពីរដ្ឋ ហើយនៅពេលពួកគាត់ តកុងទ័រដែលទិញពីផ្សារទៅតដាក់កុងទ័របន្តទៅតាមបន្ទប់នីមួយៗ និងម្យ៉ាងទៀតស្របពេលដែលបងប្អូនកម្មករគាត់បង្ហូរទឹកបន្តក់តក់ៗគ្រប់បន្ទប់ថែមទៀតនោះគឺគាត់មិនចំណេញពីទឹកនោះទេ ពួកគាត់ចង់ឲ្យរដ្ឋតខ្លួនឯងឲ្យកម្មករតែម្តង ខណៈពេលដែលរដ្ឋមិនអាចធ្វើការតទឹកតាមបន្ទប់នីមួយៗឲ្យកម្មករបាន។
លោក ស៊ឹម ស៊ីថា បានមានប្រសាសន៍ថា នៅក្នុងរាជធានីភ្នំពេញមាន៤៣មូលដ្ឋានហើយដែលពួកគាត់ស្ម័គ្រចិត្ត និងបានធ្វើកិច្ចសន្យាជាមួយយើងជុំវិញការលក់ទឹកបន្តទៅឲ្យកម្មករ និងប្រជាពលរដ្ឋក្រីក្រក្នុងតម្លៃថោក១.២០០រៀលក្នុង១ម៉ែត្រគូប ស្របពេលដែលរដ្ឋបានសម្រេចចិត្តលក់ទៅឲ្យពួកគាត់១.០៣០រៀលក្នុង១ម៉ែត្រគូបនោះ ហើយប្រជាពលរដ្ឋម្ចាស់ផ្ទះជួលទាំងនោះរួមមាន ខណ្ឌចំការមន១មូលដ្ឋានស្មើនិង៤០បន្ទប់ ខណ្ឌដង្កោ១៦មូលដ្ឋានស្មើនិង១៨៣បន្ទប់ ខណ្ឌសែនសុខ២៦មូលដ្ឋានស្មើនិង៥៤៣បន្ទប់ សរុបទាំង៤៣មូលដ្ឋាននេះស្មើនិង៧៧០បន្ទប់។ លោកបន្តថា ក្នុងតម្លៃដែលបានបញ្ចុះនេះក្នុងមួយឆ្នាំរដ្ឋាករទឹកស្វយ័តក្រុងភ្នំពេញនឹងបង់ប្រាក់ចំណូលប្រមាណ៨៧០លានរៀល ឬស្មើនិង២០ម៉ឺនដុល្លារ ជាមួយនឹងរដ្ឋាករទឹកស្វយ័តក្រុងភ្នំពេញ ត្រូវចំណាយប្រមាណ១លានដុល្លារក្នុងមួយឆ្នាំៗបន្ថែមទៀតសម្រាប់តទឹកទៅឲ្យប្រជាពលរដ្ឋក្រីក្រ១០០សហគមន៍នៅក្នុងរាជធានីភ្នំពេញ។
លោក ប៉ា សុជាតិវង្យ បានមានប្រសាសន៍ថា រាល់កង្វល់របស់ប្រជាពលរដ្ឋជុំវិញការតបណ្ដាញទឹកស្អាតនេះ យើងត្រូវប្រើប្រាស់ពេលយូរបន្តិចក្នុងការដោះស្រាយ ដោយសារតែរាជធានីភ្នំពេញបានពង្រីកខ្លួនកាន់តែធំនិងកំណើនប្រជាពលរដ្ឋមកពីបណ្ដាលខេត្តកាន់តែច្រើននោះ។ លោកក៏បានស្នើឲ្យអាជ្ញាធរពាក់ព័ន្ធទាំងអស់ត្រូវយកចិត្តទុកដាក់ក្នុងការបម្រើសេវាជូនប្រជាពលរដ្ឋ ពិសេសគឺការយកចិត្តទុកដាក់ជាធំចំពោះបងប្អូនកម្មករ និងប្រជាពលរដ្ឋក្រីក្រដែលជួលផ្ទះគេស្នាក់នៅក្នុងមូលដ្ឋានរបស់ខ្លួន។
លោក ហែម ដារិទ្ធិអភិបាលខណ្ឌពោធិសែនជ័យបានបញ្ជាក់ឲ្យដឹងថា តាមស្ថិតិប្រើប្រាស់ទឹកស្អាតក្នុងសង្កាត់ទាំង១០ និង១៤៧ភូមិ មាន០១សង្កាត់មានទឹកស្អាតប្រើប្រាស់គ្រប់ភូមិ គឺសង្កាត់ត្រពាំងក្រសាំង ចំណែកឯសង្កាត់ចំនួន៣ទៀត គឺភ្លើងឆេះរទេះ បឹងធំ និងឪឡោក ពុំទាន់មានបណ្ដាញទឹកស្អាតរដ្ឋប្រើប្រាស់ទាំងស្រុង។ ចំពោះភូមិនៅក្នុងសង្កាត់នីមួយៗ ដែលពុំទាន់មានបណ្ដាញទឹកស្អាតរដ្ឋប្រើប្រាស់មានចំនួន៨៤ភូមិ ក្នុងនោះរួមមាន ៖ ១. សង្កាត់ត្រពាំងក្រសាំង មានទឹកស្អាតប្រើប្រាស់១៣ភូមិ លើ១៣ភូមិ។ ២. សង្កាត់ កាកាប មានទឹកស្អាតប្រើប្រាស់ចំនួន០៧ភូមិ នៅខ្វះចំនួន២ភូមិ (មួយផ្នែកនៃភូមិ) ប្រជាពលរដ្ឋដែលរស់នៅខាងជើងផ្លូវរថភ្លើង។ ៣. សង្កាត់ ចោមចៅ មានទឹកស្អាតប្រើប្រាស់ចំនួន២៥ភូមិ នៅខ្វះចំនួន២ភូមិ (រដ្ឋាករទឹកសន្យាគាំទ្រគម្រោងក្នុងពេលសមាហរណកម្មសម្រាប់អនុវត្តឆ្នាំ២០១៥នេះ )។ ៤. សង្កាត់ សំរោងក្រោមមានទឹកស្អាតប្រើប្រាស់ចំនួន០៧ភូមិ នៅខ្វះចំនួន៤ភូមិ។ ៥. សង្កាត់ កន្ទោកមានទឹកស្អាតប្រើប្រាស់ចំនួន០២ភូមិ នៅខ្វះចំនួន១១ភូមិ។ ៦. សង្កាត់ កំបូលមានទឹកស្អាតប្រើប្រាស់ចំនួន០៧ភូមិ នៅខ្វះចំនួន១១ភូមិ។
៧. សង្កាត់ ស្នោរ មានទឹកស្អាតប្រើប្រាស់ចំនួន០២ភូមិ នៅខ្វះចំនួន១៦ភូមិ។ ៨. សង្កាត់ភ្លើងឆេះរទេះពុំទាន់មានទឹកស្អាតប្រើប្រាស់ទាំង០៨ភូមិ។ ៩. សង្កាត់ភ្លើងបឹងធំពុំទាន់មានទឹកស្អាតប្រើប្រាស់ទាំង១៦ភូមិ។ ១០. សង្កាត់ភ្លើងឪឡោកពុំទាន់មានទឹកស្អាតប្រើប្រាស់ទាំង១៤ភូមិ៕
ស្រីរ័ត្ន
0 Comments