សៀមរាប ៖ អង្គសន្និបាតបូកសរុបលទ្ធផលការងារឆ្នាំ២០១៤ នឹងលើកទិសដៅអនុវត្តបន្តឆ្នាំ២០១៥របស់រដ្ឋបាលសាលាខេត្តសៀមរាប ដែលបានដំណើរការរយៈពេល១ថ្ងៃកន្លះទៅតាមកម្មវិធីរបៀបវារៈដែលបានគ្រោងទុក ប្រកបដោយលទ្ធផលជាផ្លែផ្ការួចមក ត្រូវបានធ្វើពិធីបិទអង្គសន្និបាត ក្រោមអធិបតីភាពលោក លេង វី អនុរដ្ឋលេខាធិការ ក្រសួងមហាផ្ទៃ លោក ឃឹម ប៊ុនសុង អភិបាលនៃគណៈអភិបាលខេត្ត លោក នូ ផល្លា ប្រធានក្រុមប្រឹក្សាខេត្ត កាលពីព្រឹកថ្ងៃទី១៣ ខែកុម្ភៈ ឆ្នាំ២០១៥ នៅរដ្ឋបាលសាលាខេត្តសៀមរាប។
ក្នុងកិច្ចស្វាគមន៍ និងធ្វើការបូកសរុបលទ្ធផលនៃអង្គសន្និបាតនោះ លោក ឃឹម ប៊ុនសុង អភិបាលនៃគណៈអភិបាលខេត្តសៀមរាបក៏បានគូសបញ្ជាក់អំពីលទ្ធផលដែលទទួលបានពីអង្គសន្និបាត តាមរយៈនៃកិច្ចពិភាក្សាតាមក្រុម សម្រាប់យកទៅអនុវត្តបន្តនូវរាល់ភារកិច្ចការងារដែលសេសសល់ពីឆ្នាំ២០១៤ និងការអនុវត្តភារកិច្ចចម្បងសម្រាប់ឆ្នាំ២០១៥ សំខាន់លើការពិនិត្យដោះស្រាយនូវរាល់ធាតុចូលទាំងប៉ុន្មាន ដែលរកឃើញតាមកិច្ចពិភាក្សាទៅតាមប្រធានបទ។ លោក ឃឹម ប៊ុនសុង បានគូសបញ្ជាក់ថា ឆ្នាំ២០១៥ គឺជាឆ្នាំនៃការបន្តអនុវត្តយុទ្ធសាស្ត្រចតុកោណ ដំណាក់កាលទី៣របស់រាជរដ្ឋាភិបាលនីតិកាលទី៥ នៃរដ្ឋសភា។ ម្យ៉ាងទៀតគោលដៅសំខាន់ក្នុងការប្រមូលផ្ដុំសក្ដានុពលធនធានក្នុងខេត្តដើម្បីបម្រើឲ្យការអភិវឌ្ឍន៍ ការកែទម្រង់របៀបរបបការងារលើគ្រប់វិស័យក្នុងការបម្រើសេវាសាធារណៈជូនប្រជាពលរដ្ឋ សំដៅជំរុញលើកស្ទួយសេដ្ឋកិច្ចសង្គម ពង្រឹងលទ្ធិប្រជាធិបតេយ្យនៅថ្នាក់មូលដ្ឋានឲ្យមានប្រសិទ្ធភាព ក្នុងបរិបទនៃកំណែទម្រង់ស៊ីជម្រៅរបស់រាជរដ្ឋាភិបាល និងដើម្បីបន្តគាំទ្រអនុវត្តឲ្យបានផុលផុសនូវយុទ្ធសាស្ត្រចតុកោណរបស់រាជរដ្ឋាភិបាលក្នុងការឆ្លើយតបទៅនឹងលទ្ធផលនៃកិច្ចពិភាក្សារបស់អង្គសន្និបាត ដើម្បីធ្វើការកែលំអសម្រាប់ការអនុវត្តការងារបន្តក្នុងឆ្នាំ២០១៥នេះ។ ក្នុងនោះដែរ លោកក៏បានលើកនូវសំណូមពរមួយចំនួនដល់ក្រសួងមហាផ្ទៃផងដែរ។
មានប្រសាសន៍បិទអង្គសន្និបាតនោះដែរ លោក លេង វី ក៏បានធ្វើការគាំទ្រនូវលទ្ធផលដែលអង្គសន្និបាតទទួលបាន ព្រមទាំងបានធ្វើការកោតសរសើរ និងវាយតម្លៃខ្ពស់ពីការខិតខំប្រឹងប្រែងរបស់រដ្ឋបាលខេត្តសៀមរាបក្នុងការបំពេញភារកិច្ចជូនជាតិមាតុភូមិ និងប្រជាពលរដ្ឋ សំខាន់លើការងារសន្តិសុខសណ្ដាប់ធ្នាប់សាធារណៈ និងកិច្ចការអភិវឌ្ឍន៍លើគ្រប់ហេដ្ឋារចនាសម្ព័ន្ធរបស់ខេត្តសៀមរាប។ លោកក៏បានលើកឡើងពីសមិទ្ធផលនយោបាយសង្គម និងសេដ្ឋកិច្ច គឺពិតជាមានការចូលរួមយ៉ាងសកម្មពីសំណាក់ថ្នាក់ដឹកនាំមន្ត្រីរាជការ កងកម្លាំងប្រដាប់អាវុធ និងកម្លាំងសមត្ថកិច្ច ប្រជាពលរដ្ឋទូទាំងខេត្តសៀមរាប ក្នុងការអនុវត្តនូវយុទ្ធសាស្ត្រចតុកោណ ដំណាក់កាលទី៣ របស់ រាជរដ្ឋាភិបាល នីតិកាលទី៥ នៃរដ្ឋសភា ដើម្បីផលប្រយោជន៍ដ៏ឧត្តុង្គឧត្តមនៃប្រជាជាតិ និង ប្រជាជនកម្ពុជា។ លោកក៏បានគូសបញ្ជាក់ថា ទោះបីខេត្តប្រវត្តិសាស្ត្រមួយនេះ វាមិនមែនជាគោលដៅចម្បងនៃការប្រមូលផ្ដុំធ្វើបាតុកម្ម កូដកម្ម តែអាជ្ញាធរ កម្លាំងសមត្ថកិច្ច និងប្រជាជនបានថែរក្សាពង្រឹងសន្តិភាព ស្ថិរភាពនយោបាយ ស្ថិរភាព សង្គម និង សន្តិសុខសណ្ដាប់ធ្នាប់សាធារណៈ កិច្ចសហការ សម្របសម្រួល ក្នុងការដោះស្រាយបានល្អ ដែលបានធ្វើឲ្យបទល្មើសព្រហ្មទណ្ឌមានការថយចុះបើប្រៀបធៀបឆ្នាំ២០១៣និងការបង្ក្រាបបទល្មើសនានាកាន់តែមានប្រសិទ្ធភាពផងដែរ។ ក្នុងឱកាសនោះលោកក៏បានផ្តល់នូវអនុសាសន៍ការងារសំខាន់ៗមួយចំនួនក្នុងការកសាងអភិវឌ្ឍន៍ខេត្តសៀមរាប ព្រមទាំងបានលើកឡើងពីការងារជាក់ស្តែងមួយចំនួនដើម្បីជាមូលដ្ឋានធ្វើឲ្យខេត្តសម្រេចបាននូវទិសដៅការងាររបស់ខ្លួន ក៏ដូចជាការដោះស្រាយរាល់បញ្ហាប្រឈមនានា សំខាន់ ការពង្រឹងរបៀបរបបធ្វើការងារ ការគ្រប់គ្រងវត្តមាន មកបំពេញការងាររបស់មន្ត្រីរាជការ ព្រមទាំងទទួលខុសត្រូវខ្ពស់ក្នុងការថែរក្សា ពង្រឹង សន្តិភាព ស្ថិរភាពនយោបាយ សន្តិសុខ សណ្ដាប់ធ្នាប់សាធារណៈ ការបង្កា ទប់ស្កាត់ និង បង្ក្រាបបទល្មើសនានាដែលកើតមាននៅក្នុងដែនសមត្ថកិច្ចរបស់ខ្លួន និងបន្តយកចិត្តដោះស្រាយជម្លោះដីធ្លី ដោយផ្អែកលើមូលដ្ឋានច្បាប់ និងគោលការណែនាំរបស់រាជរដ្ឋាភិបាល ព្រមទាំងធ្វើការកែលំអការផ្តល់សេវារដ្ឋបាលជូនដល់ប្រជាជន និង ការអនុវត្តគោលនយោបាយកំណែទម្រង់វិមជ្ឈការ វិសហមជ្ឈការ និងការលើកកម្ពស់ការគ្រប់គ្រង ការចាត់ចែងប្រើប្រាស់មូលនិធិក្រុង ស្រុក ឃុំ សង្កាត់ ថវិកាគុណប្រយោជន៍ខេត្តប្រកបដោយតម្លាភាព គណនេយ្យភាព និង សុចិចរិតភាព និង ការធ្វើប្រតិភូកម្មអំណាចដល់រដ្ឋបាលថ្នាក់ក្រោមជាតិ និង រដ្ឋបាលខេត្តត្រូវបន្តយកចិត្តគាំទ្រ សម្របសម្រួល ផ្តល់ឱកាសសម្រាប់ការងារអភិវឌ្ឍន៍វិស័យកសិកម្មដែលជាវិស័យសេដ្ឋកិច្ចដ៏ចម្បងរបស់ខេត្ត។ លោកក៏បានលើពីបញ្ហាពាក់ព័ន្ធក្នុងវិស័យមីក្រូហិរញ្ញវត្ថុ ដែលត្រូវប្រជាជនក្រីក្រមានការប្រុងប្រយ័ត្នផងដែរ។ ក្នុងនោះលោកក៏បានធ្វើការផ្តាំផ្ញើផងដែរដល់អង្គសន្និបាតទាំងមូល ត្រូវជំរុញលើកទឹកចិត្តដល់ថ្នាក់ដឹកនាំមន្ត្រីរាជការ រដ្ឋបាលខេត្ត ត្រូវបន្តពង្រឹងស្មារតី សាមគ្គីភាពឯកភាពផ្ទៃក្នុងក្នុងការអនុវត្តការងារដោយឈរលើគោលការណ៍ច្បាប់ លិខិតបទដ្ឋានគតិយុត្តិនានាជាធរមាន សំដៅរួមគ្នាអភិវឌ្ឍន៍ខេត្តសៀមរាបឲ្យកាន់តែមានភាពរីកចម្រើនទៅអនាគតទៀតផង៕
គឿនវ៉េត
0 Comments