បន្ទាយមានជ័យ ៖ លោកវរសេនីយ៍ឯក ស៊ុន សម្បត្តិ មេបញ្ជាការរងកងរាជអាវុធហត្ថខេត្តបន្ទាយមានជ័យដែលតំណាងលោកឧត្តមសេនីយ៍ត្រី ឱ បូរិន មេបញ្ជាការកងរាជអាវុធហត្ថខេត្តបានដឹកនាំកម្លាំងចុះសួរសុខទុក្ខ និងនាំយកអំណោយជូនប្រជាពលរដ្ឋ១គ្រួសារដែលរងគ្រោះដោយអគ្គីភ័យនៅថ្ងៃទី១៣ ខែកុម្ភៈ ឆ្នាំ២០១៥ នៅភូមិតាអ៊ិនពីរ ឃុំស្រះរាំង ស្រុកមង្គលបូរី ខេត្តបន្ទាយមានជ័យ។ លោកវរសេនីយ៍ឯក បោន បិន មេបញ្ជាការរងកងរាជអាវុធខេត្ត លោកវរសេនីយ៍ទោ សរ ប៊ុនសឿង មេបញ្ជាការរងកងរាជអាវុធហត្ថខេត្ត និងកងកម្លាំងជាច្រើនរូបទៀត ត្រូវបានចូលរួមក្នុងពិធីនោះផងដែរ។ លោក ឡុង ពុន អភិបាលស្រុកមង្គលបូរីបានមានមតិរាយការណ៍ថា កាលថ្ងៃទី១១ ខែកុម្ភៈ ឆ្នាំ២០១៥វេលាម៉ោង៧និង៣០នាទីព្រឹក មានអគ្គីភ័យមួយឆាបឆេះអស់ផ្ទះមួយខ្នង ព្រមទាំងទ្រព្យសម្បត្តិគ្មានសល់ មូលហេតុដោយម្ចាស់ដាំបាយធ្វើម្ហូបទៅវត្តថ្ងៃសីលមិនបានពន្លត់ភ្លើងចង្ក្រានឲ្យបានត្រឹមត្រូវមុនពេលចេញពីផ្ទះ ទើបបណ្ដាលឲ្យឆាបឆេះផ្ទះឈើប្រក់ស័ង្កសី។ ម្ចាស់ផ្ទះដែលត្រូវអគ្គីភ័យលេបត្របាក់មានឈ្មោះ សួង ទី ភេទប្រុស៧៧ឆ្នាំ និងមានប្រពន្ធឈ្មោះ ហួត ឡាំង អាយុ៧៤ឆ្នាំ ដែលរស់ភូមិខាងលើ។ លោក ស៊ុន សម្បត្តិ បានមានប្រសាសន៍ថាក្រោយពេលទទួលព័ត៌មានបានដឹងពីកងកម្លាំងកងរាជអាវុធហត្ថស្រុកមង្គលបូរី លោកឱបូរិន្ទ បានដឹកនាំកម្លាំងក្រោមបង្គាប់ចុះសួរសុខទុក ហើយបានគៀងកូរចូលរួមពីកម្លាំងកងរាជអាវុធហត្ថខេត្តស្រុក.ក្រុងចូលរួមគ្នាជាសប្បុរសជនបានថវិកាចំនួន២.៦០០.០០០រៀល អំណោយមានអង្ក៣ការុងស្មើនិង១០០គីឡូក្រាម មី២កេះ ទឹកស៊ីអ៊ីវ១យួរស្មើនិង៦ដប ទឹកត្រី១យួរស្មើនិង៦ដប ត្រីខ២កេះ២០កំប៉ុង មុង១ភួយ១ ក្រម៉ា១ ចានបាយ១០ ចានសម្ល១០ ស្លាបព្រា១០ សោម១០ ឆ្នាំបាយ១ ឆ្នាំសម្ល១ ខ្ទះ១ វែកបាយ១ វែកសម្ល១ស្ករ១គីឡូក្រាម ខ្ទឹម១គីឡូក្រាម ប៊ីចេង១កញ្ចប់ អំបិលអ៊ីយ៉ូត១គីឡូក្រាម ។ លោកបានផ្តាំផ្ញើដល់បងប្អូនប្រជាពលរដ្ឋទាំងអស់ត្រូវមានការប្រុងប្រយ័ត្នទាំងអស់គ្នាចំពោះអគ្គីភ័យព្រោះពេលនេះរដូវប្រាំងដែលជារដូវហួតហែង វាងាយស្រួលនិងរហ័សឆាបឆេះកើតឡើងដូចពាក្យចាស់ពោលថា "សុខចិត្តឲ្យលិចទូកកណ្តាលទន្លេ កុំឲ្យភ្លើងឆេះផ្ទះ"៕
គង្គា
0 Comments