ភ្នំពេញ ៖ លោក នុត ពុធដារ៉ា អភិបាលនៃគណៈអភិបាលខណ្ឌដង្កោបានចុះចែកសៀវគ្រួសារជូនប្រជាពលរដ្ឋរស់នៅក្នុងសង្កាត់ទៀន និងសង្កាត់ស្ពានថ្មចំនួន៧០គ្រួសារ ក្នុងនោះសង្កាត់ទៀន ចំនួន៥៦គ្រួសារ និងសង្កាត់ស្ពានថ្ម១៤គ្រួសារ កាលពីព្រឹកថ្ងៃទី១៣ ខែកុម្ភៈ ឆ្នាំ២០១៥។
ក្នុងឱកាសនោះលោក នុត ពុធដារ៉ា ក៏បានអបអរសាទរចំពោះបងប្អូនប្រជាពលរដ្ឋទាំង៧០គ្រួសារ ដែលបានទទួលសៀវភៅគ្រួសារយកទៅប្រើប្រាស់ និងបានធ្វើការផ្តាំផ្ញើការសាកសួរសុខទុក្ខពីសំណាក់លោក ប៉ា សុជាតិវង្ស អភិបាលរាជធានីភ្នំពេញ និងបានលើកឡើងអំពីការយកចិត្តទុកដាក់របស់ថ្នាក់ដឹកនាំលើការងារធ្វើសៀវភៅគ្រួសារ និងសៀវភៅស្នាក់នៅជូនដល់ប្រជាពលរដ្ឋ ដោយបានចាត់ឲ្យមានមន្ត្រីប៉ុស្តិ៍នគរបាលចុះស្រង់ស្ថិតិ និងចុះធ្វើសៀវភៅគ្រួសារ សៀវភៅស្នាក់នៅដល់លំនៅដ្ឋានរបស់បងប្អូនប្រជាពលរដ្ឋផ្ទាល់តែម្តង។
ជាមួយគ្នានេះលោកអភិបាលខណ្ឌក៏បានផ្តាំផ្ញើឲ្យបងប្អូនទាំងអស់ សូមថែរក្សាសៀវភៅគ្រួសារដែលបានចែកជូនក្នុងឱកាសនេះឲ្យបានល្អប្រសើរ ចៀសវាងការខូចខាត ឬបាត់បង់ ព្រោះវាមានប្រយោជន៍សម្រាប់ការប្រើប្រាស់ផ្សេងៗ ហើយជាពិសេសចៀសវាងការកោសលុប ឬបំពេញបន្ថែមខុសពីការទទួលស្គាល់របស់សមត្ថកិច្ច។
លោក នុត ពុធដារ៉ា ក៏ពាំនាំនូវការណែនាំពីសំណាក់លោកអភិបាលរាជធានីភ្នំពេញចំពោះប្រជាពលរដ្ឋលើការងារកសិកម្ម ដែលនេះជាការយកចិត្តទុកដាក់របស់លោកអភិបាលរាជធានីភ្នំពេញចំពោះការរៀបចំឲ្យប្រសើរឡើងលើការងារកសិកម្ម ដាំដំណាំ និងចិញ្ចឹមសត្វ ដោយលើកទឹកចិត្តឲ្យប្រជាពលរដ្ឋ បង្កើតជាសហគមន៍ដាំដុះ និងចិញ្ចឹមសត្វ បន្ថែមលើការធ្វើស្រែប្រចាំឆ្នាំ ដើម្បីលើកកម្ពស់ជីវភាពឲ្យកាន់តែល្អប្រសើរឡើង៕
រ៉ាវុទ្ធ
0 Comments