ព្រះវិហារ ៖ ហេតុការណ៍គ្រោះថ្នាក់ចរាចរណ៍ក្រឡាប់រថយន្តស៊េរីទំនើប១គ្រឿងជាច្រើនជុំបានកើតទ្បើងបណ្ដាលឲ្យមនុស្សចាស់-ក្មេងចំនួន៥នាក់ជិះក្នុងរថយន្តនោះមានសំណាងល្អគ្រាន់តែរងរបួសស្រាលរលាត់ដៃជើង និងបែកក្បាលចេញឈាមបន្តិចបន្តួចប៉ុណ្ណោះ កាលពីវេលាម៉ោង១រសៀលថ្ងៃទី១២ ខែកុម្ភៈ ឆ្នាំ២០១៥ ស្ថិតចំណុចអូរប៉េស ភូមិបុស្បធំ ឃុំប្រមេរ ស្រុកត្បែងមានជ័យ។
សាក្សីឃើញហេតុការណ៍បានរាយការណ៍ឲ្យដឹងថា ចំណុចគ្រោះថ្នាក់ក្រឡាប់រថយន្តនោះបណ្ដាលមកពីតៃកុងបើកបរធ្វេសប្រហែសមិនគោរពច្បាប់ចរាចរណ៍ និងមិនគោរពស្លាកប្រាប់ទិសគិតតែពីបើកបន្ថែមល្បឿនលឿន ស្ថិតនៅលើដងផ្លូវកោងខ្លាំង ក្នុងទិសដៅចេញពីខេត្តព្រះវិហារ។ ពេលនោះចៃដន្យអាក្រក់បែកកង់ខាងក្រោយទើបបណ្ដាលឲ្យរថយន្តម៉ាកលុចស៊ីសRX៣០០ពណ៌ស្ករ ពាក់ស្លាកលេខសៀមរាប២A៥៣៤៧ក្រឡាប់ចំនួន៣ជុំធ្លាក់ផ្លូវជាតិលេខ៩យ៉ាងទាន់ហន់ ហើយរថយន្តរងការខូចខាតប្រមាណ៨០ភាគរយ។
លោក ប៉ាង វ៉ាន់ឌី អធិការនគរបាលស្រុកត្បែងមានជ័យបានឲ្យដឹងថា ករណីគ្រោះថ្នាក់ចរាចរខាងលើនេះបណ្ដាលឲ្យមនុស្សជិះក្នុងរថយន្តទាំង៥នាក់នោះគ្រាន់តែរងរបួសស្រាលប៉ុណ្ណោះគឺហេតុការណ៍អាក្រក់នេះកើតទ្បើងក្នុងចន្លោះម៉ោង១ទៅ១និង៣០នាទីរសៀល ថ្ងៃទី១២ ខែកុម្ភៈ ឆ្នាំ២០១៥។ អ្នករងរបួសស្រាលទាំងនោះជាអ្នកដំណើរមកពីខេត្តកំពង់ចាម។
ហេតុការណ៍គ្រោះថ្នាក់ចរាចរណ៍គួរឲ្យរន្ធត់១ករណីទៀតបានកើតទ្បើងនៅវេលាម៉ោង៥ទៀបភ្លឺលើដងផ្លូវជាតិលេខ៦២ ក្នុងភូមិរំចេក ឃុំរមណីយ ស្រុករវៀង ខេត្តព្រះវិហារ រវាងរថយន្តបង្កម៉ាកសាំយ៉ុង ពណ៌ស ពាក់ស្លាកលេខភ្នំពេញ២P៨០១៧ទៅបុកពេញទំហឹងចំពីមុខកាប៊ីនរថយន្តធុនធំម៉ាកហុងយ៉ាន់ ពណ៌លឿង ដឹកគ្រឿងចក្រដែលចតស្ងៀមទិសដៅបញ្ច្រាសគ្នា។
លោក គឹម សុគុណ អធិការរងស្រុករវៀងទទួលបន្ទុកផ្នែកចរាចរណ៍ និងសណ្ដាប់ធ្នាប់បានឲ្យដឹងថា ហេតុការណ៍គ្រោះថ្នាក់ចរាចរណ៍នេះបណ្ដាលឲ្យតៃកុងម្នាក់ស្លាប់បាត់បង់ជីវិតភ្លាមៗ និងអ្នកជិះអែបតៃកុងម្នាក់ទៀតបានដាច់ខ្យល់ស្លាប់ក្នុងពេលជាមួយគ្នាផងដែរ ដោយសារកៀបខ្លួនជនរងគ្រោះទាំង២នាក់ជាប់នឹងកាប៊ីនរថយន្តបង្ក។ រថយន្តបង្កធ្វើដំណើរពីត្បូងទៅជើងបើកចូលទីរួមខេត្តព្រះវិហារ រីឯរថយន្តហុងយ៉ាន់ចតស្ងៀមពីជើងទៅត្បូងអែបចិញ្ចើមផ្លូវគឺរថយន្តសាំយ៉ុងខូចខាតខ្ទេច១កំណាត់ខាងមុខ។
លោកអធិការរងបន្តទៀតថា សពជនរងគ្រោះមានទី១-ឈ្មោះ ភាព វាសនា ភេទប្រុស អាយុ២២ឆ្នាំ រស់នៅភូមិអណ្ដូងពោធិ៍ សង្កាត់កំពង់ប្រណាក ក្រុងព្រះវិហារ និងទី២-ឈ្មោះ វ៉ន កុម្ភះ ហៅក្រៅ ឈ្មោះ ចៀន ភេទប្រុស អាយុ២៤ឆ្នាំ រស់នៅភូមិតាំងក្រសាំង ឃុំកំពង់ថ្ម ស្រុកសន្ទុក ខេត្តកំពង់ធំ ត្រូវបានក្រុមគ្រួសារមកទទួលសាកសពយកទៅធ្វើបុណ្យនៅស្រុកកំណើតរៀងៗខ្លួន។
រីឯវត្ថុតាងរថយន្តទាំង២គ្រឿងត្រូវបានសមត្ថកិច្ចជំនាញនគរបាលចរាចរណ៍ស្រុករវៀងបញ្ជូនយកទៅរក្សាទុកនៅប៉ុស្តិ៍នគរបាលឃុំរមណីយជាបណ្ដោះអាសន្នដើម្បីកសាងសំណុំរឿងបញ្ជូនទៅកាន់តុលាការខេត្តចាត់ការទៅតាមផ្លូវច្បាប់៕
មង្គល
0 Comments