ភ្នំពេញ ៖ ទិវានៃក្តីស្រលាញ់ឆ្នាំនេះសាលារាជធានីភ្នំពេញបានធ្វើពិធីផ្តល់ឈាមមួយ ក្នុងប្រធានបទ"ផ្តល់ឈាម ផ្តល់ក្តីស្រលាញ់" ដែលការធ្វើពិធីផ្តល់ឈាមក្នុងឱកាសនេះគឺក្នុងគោលបំណងដាស់យុវវ័យទាំងអស់ឲ្យភ្ញាក់រឭកក្នុងការចូលរួមផ្តល់ឈាម និងម្យ៉ាងវិញទៀតចង់បង្វែរទិវានៃក្តីស្រលាញ់មកជាការ ផ្តល់ឈាម ផ្តល់ក្តីស្រលាញ់ឲ្យមនុស្សជាតិវិញ។
ពិធីនេះត្រូវបានធ្វើឡើងកាលពីព្រឹកថ្ងៃទី១៤ ខែកុម្ភៈនៅលើទីលានប្រជាធិបតេយ្យក្នុងខណ្ឌដូនពេញ រាជធានីភ្នំពេញ ក្រោមអធិបតីភាពលោក ប៉ា សុជាតិវង្ស អភិបាលរាជធានីភ្នំពេញ និងលោកស្រី។ លោកប៉ា សុជាតិវង្សបានមានប្រសាសន៍លើកឡើងថា ការធ្វើពិធីផ្តល់ឈាមក្នុងឱកាសបុណ្យនៃសេចក្តីស្រលាញ់នេះគឺក្នុងគោលបំណងដាស់យុវវ័យទាំងអស់ឲ្យភ្ញាក់រឭកក្នុងការចូលរួមផ្តល់ឈាម និងម្យ៉ាងវិញទៀតចង់បង្វែរទិវានៃក្តីស្រលាញ់មកជាការផ្តល់ឈាមផ្តល់ក្តីស្រលាញ់ឲ្យមនុស្សជាតិវិញ។ លោកបន្តថា បុណ្យនៃសេចក្តីស្រឡាញ់មិនមែនជាប្រពៃណីទំនៀមទម្លាប់របស់ប្រជាជនកម្ពុជាយើងនោះទេ ប៉ុន្តែក្នុងរយៈពេលប៉ុន្មានឆ្នាំចុងក្រោយនេះបុណ្យនៃសេចក្តីស្រលាញ់ត្រូវបានប្រជាពលរដ្ឋកម្ពុជា ពិសេសក្រុមយុវវ័យយកមកអនុវត្ត និងចូលរួមយ៉ាងគគ្រឹកគគ្រេង ម្យ៉ាងដោយការយល់ច្រឡំនៃពិធីបុណ្យនេះ បានធ្វើឲ្យយុវវ័យរបស់យើងមួយចំនួនបូជាខ្លួនប្រាណទៅឲ្យសង្សាររបស់ខ្លួនធ្វើឲ្យបាត់បង់កិត្តិយសគ្រួសារ ខូចប្រពៃណីទំនៀមទម្លាប់ដ៏ល្អផូរផង់របស់កម្ពុជាយើងថែមទៀត។ ដូច្នេះហើយទើបយើងបង្កើតឲ្យមានពិធីបរិច្ចាគឈាមនេះឡើងក្នុងថ្ងៃបុណ្យនៃក្តីស្រលាញ់១៤កុម្ភៈនេះ ដើម្បីដាស់យុវវ័យទាំងអស់ឲ្យបោះបង់ចោលនូវអ្វីដែលប្រាសចាកប្រពៃណីទំនៀមទម្លាប់ ឬទង្វើមិនល្អក្នុងថ្ងៃបុណ្យនៃក្តីស្រលាញ់ ឲ្យភ្ញាក់រឭកមកចូលរួមផ្តល់ឈាម ផ្តល់ក្តីស្រលាញ់ឲ្យមនុស្សជាតិវិញ។
លោកអភិបាលបានបន្តថា នៅក្នុងប្រទេសកម្ពុជាយើងក្នុងមួយឆ្នាំអ្នកជម្ងឺត្រូវការឈាមប្រមាណជា៥០ម៉ឺនប្លោក ដោយឡែកសម្រាប់រាជធានីភ្នំពេញត្រូវបានឈាមប្រមាណ៣០ម៉ឺនប្លោកក្នុង១ឆ្នាំ ដូច្នេះទេ ក្នុងមួយថ្ងៃយើងត្រូវប្រើប្រាស់ឈាមប្រមាណជា១០០ប្លោកក្នុងមួយថ្ងៃៗដើម្បីជួយសង្គ្រោះដល់ជនរងគ្រោះ ហើយឈាមដែលទទួលបាននាពេលនេះគឺជាឈាមដែលបានមកពីក្តីស្រលាញ់៕
ស្រីរ័ត្ន
0 Comments