កំពត ៖ មន្ត្រីជលផលក្នុងខេត្តកំពតត្រូវបានប្រជាពលរដ្ឋចោទប្រកាន់ថា មានភាពធូររលុងបើកដៃឱ្យមានបទល្មើសនេសាទកើតឡើងយ៉ាងពេញបន្ទុក។ ជាក់ស្តែងសកម្មភាពទូកអូសនេសាទខុសច្បាប់ដោយប្រើឧបករណ៍ ឆក់នៅចំណុចព្រែកតានេនក្នុងខេត្តកំពតកែបបានកើតឡើងយ៉ាងខ្លាំងជាយូរឆ្នាំមកហើយ រហូតបច្ចុប្បន្ននេះគេពុំដែលឃើញមន្ត្រីជលផលចុះបង្ក្រាបឡើយ។ ប្រជានេសាទក្នុងភូមិដូនតោកបានបង្ហើបឲ្យដឹងថា បទល្មើសដែលកើតឡើងសព្វថ្ងៃមានការបើកភ្លើងខៀវពីមន្ត្រីរដ្ឋបាលជលផល និងសមត្ថកិច្ចពាក់ព័ន្ធក្នុងការបង់លុយប្រចាំខែដើម្បីធ្វើការនេសាទខុសច្បាប់បានយ៉ាងងាយស្រួល។ ដូច្នេះហើយធ្វើឲ្យពួកគាត់ដែលនេសាទធម្មតាមិនមានប្រើឧបករណ៍ឆក់ មានការលំបាកពុំសូវនេសាទបានច្រើន ពេលខ្លះចេញទៅខាតប្រេងទៀតផង។ ប្រជាពលរដ្ឋបន្តថា មិនត្រឹមតែទូកប្រើឧបករណ៍ឆក់នេសាទខុសច្បាប់នៅម្តុំព្រែកតានេននោះទេ រីឯបទល្មើសធំៗ ដូចជាទូកនេសាទវៀតណាមប្រភេទអូសគូរ និងប្រភេទទូកអូសប្រើឧបករណ៍ឆក់ ក៏មិនមានការបង្ក្រាបម្តងសោះ បែរជាគេធ្វើជាមើលមិនឃើញទៅវិញ ហើយរាល់សកម្មភាពបង្ក្រាបបានកន្លងមកសុទ្ធតែប្រជាជនអ្នកនេសាទជាអ្នកប្រគល់ឲ្យ។ ប្រភពពីប្រជានេសាទបានបញ្ជាក់ថា ការនេសាទខុសច្បាប់ដោយប្រើឧបករណ៍ឆក់កំពុងកើតមានយ៉ាងខ្លាំងនៅម្តុំព្រែកតានេន ខេត្តកែបទូកទាំងនេះចេញនេសាទទាំងថ្ងៃរហូតដល់ខាងលិចកោះការាំងខេត្តកំពតទៀតផង។ ប្រភពច្បាស់ការនិយាយឲ្យដឹងថា សព្វថ្ងៃលោក ស សូរិន នាយខណ្ឌរដ្ឋបាលជលផលកំពតមានដៃស្តាំពីរនាក់ម្នាក់ឈ្មោះ អន ថា និង យឹម សំអាត ត្រូវបានតែងតាំងជាប្រធាន និងអនុប្រធានការិយាល័យបង្ក្រាបបទល្មើសជលផលលើផ្ទៃសមុទ្រ និងមានតួនាទីមួយទៀតជាអ្នកប្រមូលផលប្រយោជន៍ឲ្យលោក សសូ រិន ទាំងទូកនេសាទឆក់ និងទូកអូសវៀតណាម។ ប៉ុន្តែរឿងដែលគេមើលមិនដឹងគឺលោក អនថា និងលោក យឹម សំអាត មានដៃសាំពីរនាក់ទៀត មានឈ្មោះ ចាន់ ស៊ីនាថ ជាមន្ត្រីជលផល និងឈ្មោះម៉ែអាឆលី ជាអ្នកមានទូកនេសាទខុសច្បាប់ជាច្រើនគ្រឿងនៅម្តុំព្រែតានេន អ្នកទាំងពីរនេះសម្រាប់ដើរប្រមូលលុយពីទូកនេសាទខុសច្បាប់ក្នុងមួយទូក១០០ដុល្លារសម្រាប់មួយខែ ចំណែកទូកវៀតណាមមួយគូ១០០ដុល្លារ បើទូកណាមិនបង់លុយឲ្យអ្នកទាំងពីរគឺគេផ្តល់ព័ត៌មានឲ្យលោក អន ថា និង លោក យឹម សំអាត ចេញចាប់ហើយផាកពិន័យ២លានរៀលទៅ៣លានរៀលទើបដោះលែងវិញ។ បច្ចុប្បន្នគេសម្គាល់ឃើញថា ការនេសាទខុសច្បាប់ដោយប្រើឧបករណ៍ឆក់កំពុងកើតមានយ៉ាងពេញបន្ទុក ដោយគ្មានសមត្ថកិច្ចណាបង្ក្រាបឡើយ៕
ស៊ុនលី
0 Comments