ស្ទឹងត្រែង ៖ ជសង្ស័យ២នាក់ជាគោលដៅរបស់សមត្ថកិច្ចក្នុងការចែកចាយគ្រឿងញៀននៅក្នុងស្រុកសៀមប៉ាង ធ្វើឱ្យមានការប៉ះពាល់ដល់សង្គម និងស្រទាប់យុវវ័យជំនាន់ក្រោយយ៉ាងខ្លាំង ត្រូវបានកម្លាំងអធិការដ្ឋានស្រុកសៀមប៉ាងឃាត់ខ្លួនជាមួយគ្រឿងញៀន(WY)ចំនួន១០គ្រាប់ កាលពីវេលាម៉ោង១៧និង៣០នាទីល្ងាច ថ្ងៃទី១២ ខែកុម្ភៈ ឆ្នាំ២០១៥ នៅចំណុចភូមិបានមួង ឃុំសរកុង ស្រុកសៀមប៉ាង ចាប់បញ្ជូនមកស្នងការដ្ឋាននគរបាលខេត្តនៅព្រឹកថ្ងៃទី១៣ ខែកុម្ភៈនេះ ដើម្បីចាត់ការបន្ត។
លោកវរសេនីយ៍ទោ នូ ហ៊ួរ នាយការិយាល័យនគរបាលប្រឆាំងគ្រឿងញៀនខេត្តបានឲ្យដឹងថា ជនសង្ស័យចែកចាយគ្រឿងញៀន ដែលសមត្ថកិច្ចឃាត់ខ្លួនទាំង២នាក់១-មានឈ្មោះ វ៉ន សុខន ភេទប្រុស អាយុ២៤ឆ្នាំ មុខរបរកសិករ ២-ឈ្មោះម៉ៅ តយ ភេទប្រុស អាយុ២១ឆ្នាំ អ្នកទាំង២មានទីលំនៅភូមិសៀមប៉ាង ឃុំសរកុង ស្រុកសៀមប៉ាង ខេត្តស្ទឹងត្រែង។
លោកបានបន្តឲ្យដឹងទៀតថា ក្នុងការចុះបង្ក្រាបជនសង្ស័យចែកចាយគ្រឿងញៀនខាងលើនោះ គឺគេជាមុខសញ្ញា និងជាគោលដៅរបស់សមត្ថកិច្ចតាំងពីយូរមកហើយ ដែលបានលបលួចធ្វើសកម្មភាពចែកចាយនៅក្នុងស្រុកនេះ និងធ្វើឱ្យមានការប៉ះពាល់ដល់ស្រទាប់យុវវ័យជំនាន់ក្រោយដែលសង្គមកំពុងតែស្អប់ខ្ពើម។ លោកបានបន្តថា ក្នុងរយៈពេលចាប់ពីដើមឆ្នាំ២០១៥មកទល់ពេលនេះ ការិយាល័យប្រឆាំងគ្រឿងញៀនបានសហការគ្រប់បណ្ដាឃុំ ស្រុក គ្រប់មូលដ្ឋាន ឈានទៅធ្វើការឃាត់ខ្លួនជនសង្ស័យជាច្រើនករណី ហើយបានធ្វើការដកហូតបានគ្រឿងញៀនប្រភេទគ្រាប់ និងប្រភេទម្សៅក្រាមពណ៌សថ្លាជាច្រើនផងដែរ។ ចំណែកជនសង្ស័យដែលឃាត់ខ្លួនខាងលើនេះ ស្ថិតក្រោមការស៊ើបអង្កេតរបស់សមត្ថកិច្ច តែមិនមានឱកាស ទើបនៅថ្ងៃខាងលើ ក្រោយពីទទួលបានព័ត៌មានថាជនសង្ស័យកំពុងធ្វើសកម្មភាព កម្លាំងអធិការដ្ឋានបានធ្វើការចុះបង្ក្រាបតែម្តង។ នៅព្រឹកថ្ងៃទី១៤នេះ ជនសង្ស័យរួមជាមួយវត្ថុតាងគ្រឿងញៀន(WY)ប្រភេទមេតំហ្វេតាមីនចំនួន១០គ្រាប់ ត្រូវបានកម្លាំងអធិការដ្ឋានស្រុកសៀមប៉ាងចាប់បញ្ជូនមកកាន់ស្នងការដ្ឋាននគរបាលខេត្ត និងបានកសាងសំណុំរឿងបញ្ជូនទៅកាន់អយ្យការអមសាលាដំបូងខេត្ត ដើម្បីចាត់ការតាមនីតិវិធីច្បាប់៕
ងិន លីម
0 Comments