បន្ទាយមានជ័យ ៖ រថយន្តស្ទូច១គ្រឿងបានបើកបរឡើងជែងក្នុងស្ថានភាពគ្រោះថ្នាក់ ក៏ត្រូវរថយន្តធំបើកបរក្នុងទិសច្រាសគ្នាបុកចំពីមុខពេញរថយន្តស្ទូចពេញទំហឹងបណ្ដាលឲ្យស្លាប់អ្នកបើកបរឡានស្ទូចនោះភ្លាមៗនៅនឹងកន្លែងកើតហេតុ។ គ្រោះថ្នាក់ចរាចរនេះកើតឡើងវេលាម៉ោង១០យប់ ថ្ងៃទី១៤ ខែកុម្ភៈ ឆ្នាំ២០១៥ តាមកំណាត់បណ្តោយផ្លូវជាតិលេខ៥ ត្រង់ចំណុចចន្លោះបង្គោលគីឡូម៉ែត្រលេខ៣៧០-៣៧១ ស្ថិតក្នុងភូមិទឹកថ្លា សង្កាត់ទឹកថ្លា ក្រុងសិរីសោភ័ណ ខេត្តបន្ទាយមានជ័យ។ លោក ខឹម វិសុទ្ធ ប្រធានផ្នែកនៃការិយាល័យចរាចរណ៍ផ្លូវគោកស្នងការដ្ឋាននគរបាលខេត្តបន្ទាយមានជ័យអោយដឹងថា: គ្រោះថ្នាក់នោះគឺរវាងរថយន្តស្ទូចពាក់ស្លាកលេខតាកែវ៣A ១៧១៦ បើកបរពីកើតទៅលិច ហើយបុកគ្នាពេញទំហឹងជាមួយរថយន្តធំពាក់ស្លាកលេខព្រៃវែង៣A០៦៧៩ដែលបើកបរពីលិចទៅកើតទិសបញ្ច្រាសគ្នាបណ្ដាលឲ្យអ្នកបើកបររថយន្តស្ទូចស្លាប់កៀបជាប់ក្នុងកាប៊ីនរថយន្តនៅហ្នឹងកន្លែងតែម្តង។ អ្នកបើកបររថយន្តស្ទូចមានឈ្មោះ នូ សុខេង ភេទប្រុស អាយុ៣៩ឆ្នាំ លំនៅភូមិដូង ឃុំដូង ស្រុកម៉ាឡៃ ខេត្តបន្ទាយមានជ័យ។ ចំណែកអ្នកបើកបររថយន្តធំមានឈ្មោះ ដឹន ខា ប្រុស ៤៤ឆ្នាំ ភូមិ-ឃុំ ជាខ្លាង ស្រុកស្វាយអន្ទរ ខេត្តព្រៃវែងពុំរងគ្រោះថ្នាក់ធំដុំនោះទេ។ លោក សួន នីប៉ូ នាយរងការិយាល័យនគរបាលចរាចរណ៍ផ្លូវគោកខេត្តបន្ទាយមានជ័យឲ្យដឹងថា ការស្រាវជ្រាវដំបូងៗគឺមូលហេតុនៃគ្រោះថ្នាក់នេះគឺរថយន្តស្ទូចបានបើកឡើងជែងក្នុងស្ថានភាពគ្រោះថ្នាក់ ក៏ត្រូវរថយន្តរថយន្តធំយីឌុបកង់១៦បុកពេញទំហឹងបណ្ដាលឲ្យរថយន្តស្ទូចកៀបនឹងកាបីនស្លាប់តែម្តង។ លោកបាននិយាយបន្តទៀតថា រថយន្តទាំង២ត្រូវបាននគរបាលចរាចរណ៍ដឹកយកមកស្នងការរក្សាទុក និងដោះស្រាយនៅពេលក្រោយ៕
គង្គា
0 Comments