បន្ទាយមានជ័យ ៖ ប្រជាពលរដ្ឋខេត្តបន្ទាយមានជ័យសង្ឃឹមថា តៃកុងរថយន្តដឹកផ្លែឈើដែលពលរដ្ឋចាប់ប្រគល់ឲ្យប៉ូលិស បន្ទាប់ពីបើករថយន្តបុកបុរសម្នាក់បណ្ដាលឲ្យស្លាប់ កាលពីថ្ងៃទី១៥ ខែកុម្ភៈ ឆ្នាំ២០១៥ លើកំណាត់ផ្លូវជាតិលេខ៥ ស្ថិតនៅភូមិសូរិយាថ្មី ឃុំកូប ស្រុកអូរជ្រៅ ខេត្តបន្ទាយមានជ័យ នឹងត្រូវតុលាការផ្ដន្ទាទោសទៅតាមច្បាប់។
លោក ស៊ុត ហ៊ូរ នាយផ្នែកនគរបាលចរាចរណ៍ស្រុកអូរជ្រៅបានប្រាប់ឲ្យដឹងថា តៃកុងរថយន្តដែលមានឈ្មោះ សៅ វិបុល ភេទប្រុស អាយុ២៥ឆ្នាំ រស់នៅភូមិសែសិន សង្កាត់អូអំបិល ក្រុងសិរីសោភ័ណ ខេត្តបន្ទាយមានជ័យ ត្រូវបានប្រជាពលរដ្ឋនៅទីនោះចាប់ប្រគល់ឲ្យប៉ូលិសបន្ទាប់ពីបើករថយន្តម៉ាកកាមរីស៊េរី៩៥ ពណ៌ទឹកប្រាក់ ពាក់ស្លាកលេខ បន្ទាយមានជ័យ 2A-1668 ដឹកផ្លែឈើពេញ បើកបរក្នុងល្បឿនលឿនពីលិចទៅកើត ហើយដាច់កង់មុខរ៉េទៅបុកជនរងគ្រោះឈ្មោះ ពេជ្រ ឈួង អាយុ៦៧ឆ្នាំ ដែលកំពុងអង្គុយលើចិញ្ចើមផ្លូវបណ្ដាលឲ្យស្លាប់ភ្លាមៗ។ ក្រោយកើតហេតុការណ៍នគរបាលស្រុកអូរជ្រៅបានកសាងសំណុំរឿង និងបញ្ជូនជនបង្ករូបនេះទៅស្នងការនគរបាលខេត្ត។
សូមបញ្ជាក់ថា ក្រុមរថយន្តដឹកផ្លែឈើទាំងនេះត្រូវបានប្រជាពលរដ្ឋរិះគុណខ្លាំងៗថា តែងបង្កការភ័យខ្លាចដល់អ្នកប្រើប្រាស់ផ្លូវថ្នល់នានា ពីប៉ោយប៉ែតមកក្រុងសិរីសោភ័ណ ទោះបីជាផ្លូវចង្អៀតយ៉ាងណាក៏ដោយ ក៏ពួកតៃកុងរថយន្តទាំងនេះបើកលឿនដូចព្យុះ និងតែងបង្កគ្រោះថ្នាក់ចរាចរណ៍ដល់អ្នកដទៃជាញឹកញាប់ លើសពីនេះទៀតស្នងការនគរបាលខេត្ត ក៏ដូចជាអភិបាលខេត្ត បន្ទាយមានជ័យតែងលើកពីបញ្ហារថយន្តទាំងនេះឲ្យសមត្ថកិច្ចជំនាញមានវិធានការ តែហាក់ដូចជាគ្មានប្រយោជន៍អ្វីសោះ។
ជាមួយនឹងករណីនេះ ប្រជាពលរដ្ឋសង្ឃឹមថា សមត្ថកិច្ច ឬតុលាការនឹងផ្ដន្ទាទោសជនបង្កដែលជាតៃកុងរថយន្តនេះឲ្យធ្ងន់ទៅតាមច្បាប់ ដើម្បីទុកជាការព្រមានដល់តៃកុងរថយន្តដឹកផ្លែឈើ ឬដឹកទំនិញដទៃទៀត៕
អ.ពៅ
0 Comments