បន្ទាយមានជ័យ ៖ ថ្ងៃទី១៤ ខែកុម្ភៈ ឆ្នាំ២០១៥ ត្រូវបានប្រជាជាតិខ្លះចាត់ទុកថាជាទិវានៃក្តីស្រឡាញ់នោះ នៅក្រុងសិរីសោភ័ណ និងក្រុងប៉ោយប៉ែតខេត្តបន្ទាយមានជ័យ មានអ្នកលក់ផ្កាកូឡាបរប៉េះរប៉ោះខ្លះដែរនាល្ងាចថ្ងៃទី១៤ ខែកុម្ភៈ ឆ្នាំ២០១៥កន្លងមក។ បើយោងតាមប្រភពយុវជន-យុវនារីដែលបំផុសចលនាឲ្យលើកកម្ពស់ថ្ងៃបុណ្យតាមលំនាំពួកបស្ចិមប្រទេស និងសាសនាយីស៊ូបានឲ្យដឹងថា ការលក់ផ្កាកូឡាបមានតែក្នុងក្រុងសិរីសោភ័ណ និងក្រុងប៉ោយប៉ែតប៉ុណ្ណោះ ហើយបរិមាណមានតិចតួចដែរ។ ចំណែកអ្នកលក់ផ្កាវិញនិយាយថា នៅពេលល្ងាចពុំមានអ្នកទិញផ្កាច្រើនដូចឆ្នាំមុនៗនោះទេ។ តែនៅព្រលប់មានអ្នកទិញច្រើន តែលក់មិនបានថ្លៃដូចឆ្នាំទៅទេ។ ឯតម្លៃលក់ក៏ថោកជាងមុនដែរ។ ប្រភពបន្ថែមថា ទោះយ៉ាងណាគេឃើញពួកយុវជនមកពីតាមភូមិជនបទស្រុកស្រែចម្ការច្រើនដែរ បានជ្រួលជ្រើមឌុបគ្នាជាគូៗមកកំសាន្តនៅប្រជុំជន និងនៅតាមសួនក្នុងក្រុងសិរីសោភ័ណ និងក្រុងប៉ោយប៉ែត ភាគច្រើនជាងយុវជន-នារីនៅតាមផ្សារ និងក្រុង។ មានការរិះគន់យ៉ាងខ្លាំងនៅឆ្នាំនេះថា ទិវានេះមិនមែនជាពិធីបុណ្យប្រពៃណីជាតិខ្មែរយើងទេ គឺជាបុណ្យបស្ចិមប្រទេសទាំងស្រុង។ មានការបំភ័ន្តថា ថ្ងៃ១៤កុម្ភៈជាថ្ងៃបុណ្យសង្សារ ជាថ្ងៃណាត់ជួបរវាងគូស្នេហ៍ទៅវិញ ដែលជាហេតុធ្វើឲ្យពួកគេភ្លើតភ្លើន ភ្លេចការសិក្សា បាត់បង់កិត្តិយស សេចក្ដីថ្លៃថ្នូររបស់ខ្លួន និងក្រុមគ្រួសារ ដោយប្រព្រឹត្តទៅទង្វើមិនគប្បីប្រាសចាកពីវប្បធម៌ និងប្រពៃណីដ៏ល្អផូរផង់របស់ជាតិសាសន៍ខ្មែរ៕
គង្គា
0 Comments