បន្ទាយមានជ័យ ៖ នៅព្រឹកថ្ងៃទី១៥ ខែកុម្ភៈ ឆ្នាំ២០១៥ នៅគណបក្សប្រជាជនកម្ពុជាឋិតក្នុងភូមិគោរដ្ឋាន សង្កាត់អរអំបិល ក្រុងសិរីសោភ័ណ ខេត្តបន្ទាយមានជ័យ បានរៀបចំធ្វើមហាសន្និបាតវិសាមញ្ញរបស់គណបក្សប្រជាជនកម្ពុជា។ មហាសន្និបាតនេះបានចូលរួមលោក កែ គីមយ៉ានឧបនាយករដ្ឋមន្ត្រី និងជាប្រធានគណៈកម្មាធិការកណ្ដាលចុះជួយខេត្តបន្ទាយមានជ័យ លោក គោ ស៊ុំសារឿត អភិបាលខេត្តបន្ទាយមានជ័យ លោក អ៊ុង អឿន ប្រធានក្រុមប្រឹក្សាខេត្ត និងមន្ត្រីអ្នកមុខអ្នកការជាច្រើននាក់ទៀត បានចូលរួមក្នុងពិធីនេះផងដែរ។ លោក កែ គីមយ៉ាន បានមានប្រសាសន៍ក្នុងពិធីនោះដែរថា ថ្ងៃនេះមហាសន្និបាតវិសាមញ្ញបានដំណើរការប្រជុំស្របតាមលក្ខន្តិកៈ និងបទបញ្ជាផ្ទៃក្នុងរបស់គណបក្សក្នុងស្មារតីទទួលខុសត្រូវខ្ពស់។ លោកបានបន្តថា សន្និបាតនេះបានពិនិត្យយ៉ាងល្អិតល្អន់ចំពោះសភាពការណ៍ទូទៅរបស់គណបក្សឆ្នាំ២០១៤បន្តទៅ២០១៥ ស្តីអំពីសភាពការណ៍បោះឆ្នោតរយៈពេលកន្លងមក សន្និបាតបានកត់សម្គាល់ និងធ្វើការវាយតម្លៃខ្ពស់ចំពោះការវិវឌ្ឍសេដ្ឋកិច្ចសង្គមរបស់កម្ពុជា។ សន្និបាតបានគាំទ្រពេញទំហឹងចំពោះការប្រឹងប្រែងរបស់រាជរដ្ឋាភិបាលនីតិកាលទី៥ ក្រោមការដឹកនាំរបស់សម្ដេចតេជោ ហ៊ុន សែន ដែលបានទទួលជោគជ័យយ៉ាងត្រចះត្រចង់ដូចជា សន្តិភាព ស្ថិរភាព នយោបាយ សន្តិសុខ និងសណ្ដាប់ធ្នាប់សង្គមជាដើម។ លោកបានបន្តថា ត្រូវថែរក្សាឲ្យបានរឹងមាំនូវស្ថិរភាពធ្វើឲ្យប្រជាពលរដ្ឋបានរស់នៅយ៉ាងសុខដុមរមនា។ លោកបាននិយាយបន្តទៀតថា សន្និបាតនេះបានធ្វើការកត់សម្គាល់យ៉ាងយកចិត្តទុកដាក់ចំពោះសភាពការណ៍ក្នុងតំបន់ដែលកំពុងបន្តរីកចម្រើនតាមនិន្នាការសន្តិភាព សហប្រតិបត្តិការ និងអភិវឌ្ឍន៍។ លោកបានអំពាវនាវដល់សមាជិកបក្ស និងមន្ត្រីគណបក្សគ្រប់រូបត្រូវបន្តកែតម្រង់ទិសដៅឆ្ពោះទៅរកការបម្រើប្រជាពលរដ្ឋនៅគ្រប់មូលដ្ឋានដើម្បីឲ្យចេះប្រកាន់ខ្ជាប់នូវស្មារតីសាមគ្គីជាកម្លាំងដើម្បីសម្រេចឲ្យបាននូវរាល់ភារកិច្ចរបស់បក្ស។ សន្និបាតនេះដែរ ត្រូវរៀបចំផែនការដើម្បីចាត់តាំងអនុវត្តរាល់ទិសដៅភារកិច្ចដែលសន្និបាតបានកំណត់ឲ្យផងដែរ៕
គង្គា
0 Comments