ភ្នំពេញ ៖ លោក អេង ជាសាន ប្រតិភូរាជរដ្ឋាភិបាលទទួលបន្ទុកជាប្រធានរដ្ឋបាលជលផលទើបនឹងឡើងថ្មី នៅមិនទាន់មានវិធានការចំពោះឈ្មួញរកស៊ីដឹកជញ្ជូនត្រីខុសច្បាប់ចំនួន២នាក់ ដែលយកឈ្មោះលោកទៅប្រើដើម្បីកាងដឹកត្រីខុសច្បាប់នៅឡើយទេ។ បើទោះបីជាករណីនេះលោក យុទ្ធ ផូថង ទទួលស្គាល់ថាឈ្មួញ២នាក់នោះបានយកឈ្មោះលោកទៅប្រើ ហើយលោកបានឲ្យរដ្ឋបាលជលផលចាត់ការឈ្មួញទាំងពីរអ្នកនោះក៏ដោយ។
សូមរំលឹកថា កាលពីពេលថ្មីៗនេះ រដ្ឋបាលជលផលបានប្រកាសថាបញ្ឈប់លែងឲ្យមានការដឹកជញ្ជូនខុសច្បាប់ ចិញ្ចឹមខុសច្បាប់ និងច្បាប់ដឹកជញ្ជូនផលត្រីក្នុងស្រុក បន្ទាប់ពីលោក អេង ជាសាន បានឡើងជាប្រធានរដ្ឋបាលជលផលជំនួសលោក ណៅ ធួក។ ប៉ុន្តែឈ្មួញ២នាក់ ដែលមានឈ្មោះ តូម និងឈ្មោះ ហ៊ុន ដែលកន្លងមកគេដឹងថា ជាមនុស្សខ្លាំងកាលពីសម័យលោក ណៅ ធួក ជា មេរដ្ឋបាលជលផលនៅតែបន្តដឹកជញ្ជូនត្រីឆ្ដោរផ្ដាច់មុខចូលមករាជធានីភ្នំពេញដាក់ក្នុងយឿព្រែកព្នៅ ប្រាំងចំរះ និងតំបន់មួយចំនួនទៀតយ៉ាងគគ្រឹកគគ្រេងបំផុត ដោយគ្មានខ្លាចក្រែងលោក អេង ជាសាន ប្រធានរដ្ឋបាលជលផលថ្មីឡើយ។ មិនប៉ុណ្ណោះពួកគេបានយកឈ្មោះលោក យុទ្ធ ផូថង រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទមកប្រើកាង ដោយពួកគេអះអាងថា ត្រីដែលដឹកនោះជាត្រីរបស់លោក យុទ្ធ ផូថង ដែលបានចិញ្ចឹមនៅស្ថានីយអភិវឌ្ឍន៍វារីវប្បកម្មទឹកសាប ។ ការដឹកជញ្ជូនបានស្រួលបែបនេះត្រូវបានគេថា ឈ្មួញនិងអធិការជលផលចតុមុខក្នុងការដឹកជញ្ជូនត្រីរាប់សិបតោនក្នុងមួយយប់ៗ។
ចំណែកក្រុមមន្ត្រីអធិការដ្ឋានជលផលចតុមុខបានដាក់ពង្រាយតាមផ្លូវ និងដេកចាំនៅតាមមណ្ឌលបែងចែកផលនេសាទនានាគ្រប់កន្លែង រកមើលតែ ឈ្មួញណាមិនត្រូវជាមួយខ្លួនប៉ុណ្ណោះ។ចំណែកឯ ឈ្មួញដឹកជញ្ជូនត្រីឆ្ដោរចូលមកគឺមិនបង្ក្រាបឡើយ។
ពាក់ព័ន្ធនឹងឈ្មួញរកស៊ីដឹកជញ្ជូនត្រីខុសច្បាប់យកឈ្មោះ លោក យុទ្ធ ផូថង រដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទមកកាង កាសែតកម្ពុជាថ្មីមិនអាចសុំការបំភ្លឺជុំវិញករណីនេះបានទេ ប៉ុន្តែលោកបានប្រាប់កាសែតក្នុងស្រុកមួយថា ឈ្មោះ ខ្ញុំ ផូ ផង ត្រូវបានគេយកទៅប្រើដឹកជញ្ជូនត្រីខុសច្បាប់។ លោកបន្ថែមថា ត្រីរបស់ខ្ញុំដែលបានចិញ្ចឹមនៅស្ថានីយបាទីនោះ មានប្រហែល២តោនបានចាប់អស់ទៅហើយ។ អ្នកយកឈ្មោះខ្ញុំទៅប្រើ ខ្ញុំបានឲ្យរដ្ឋបាលជលផលចាត់ការហើយ ប៉ុន្តែរហូតមកដល់ពេលនេះរដ្ឋបាលជលផលនៅមិនទាន់មានវិធានការទៅលើឈ្មួញទាំងពីររូបនោះនៅឡើយទេ។
ប្រភពពីអ្នករកស៊ីត្រីបានឲ្យដឹងថា ក្រោយពីលោក យុទ្ធ ផូថង រដ្ឋលេខាធិការក្រសួងកសិកម្ម រុក្ខាប្រមាញ់ឲ្យរដ្ឋបាលជលផលចាត់ការ ឈ្មួញទាំងពីរនាក់នោះបានរត់ការឆ្វៀលឆ្វាត់ រកកិច្ចអន្តរាគមន៍ដើម្បីបញ្ចប់រឿង។ មកដល់ពេលនេះ ករណីនោះហាក់ត្រូវបានគេបិទជិត អ្នករកស៊ីត្រី រង់ចាំមើលថា ករណីនេះលោក អេង ជាសាន បានឡើងជាប្រធានរដ្ឋបាលជលផលជំនួសលោក ណៅ ធួក វិធានការបែបណាចំពោះមន្ត្រីខ្លួនឃុបឃិតជាមួយនឹងឈ្មួញនោះ៕
ឌួងវិរះជ័យ
0 Comments