ភ្នំពេញ ៖ កាលពីវេលាម៉ោង២២និង៣០នាទីយប់ ថ្ងៃទី១៥ ខែកុម្ភៈ ឆ្នាំ២០១៥ មានករណីគ្រោះថ្នាក់ចរាចរមួយបានកើតឡើងតាមបណ្ដោយផ្លូវព្រះមុនីវង្ស ទល់មុខនឹងភោជនីយដ្ឋាន "ហ៊ួ ណាម" ស្ថិតនៅក្នុងសង្កាត់បឹងត្របែក ខណ្ឌចំការមន រវាងរថយន្តកូរ៉ូឡា និងម៉ូតូគុប បណ្ដាលឲ្យអ្នកជិះម៉ូតូ២នាក់រងរបួស។
សាក្សីនៅកន្លែងកើតហេតុបាឲ្យដឹងថា មុនពេលកើតហេតុគេបានឃើញនារី២នាក់ជិះម៉ូតូមួយគ្រឿងម៉ាកគុបជ្រុង ពណ៌ទឹកប៊ិច ពាក់ស្លាកលេខ ថ ៤២០៩ភព១ ធ្វើដំណើរតាមបណ្តោយផ្លូវមុនីវង្ស ក្នុងទិសដៅពីជើងទៅត្បូង ខណៈមកដល់ចំណុចកើតហេតុស្រាប់តែមានរថយន្តកូរ៉ូឡាមួយគ្រឿង ពណ៌ស ស្លាកលេខភ្នំពេញ2Q-0819 ធ្វើដំណើរស្របទិសដៅគ្នា ហើយបានបើកមកកៀរម៉ូតូបណ្ដាលឲ្យដួលទៅនឹងថ្នល់រងរបួសធ្ងន់និងស្រាល ហើយរថយន្តបង្កបានព្យាយាមបើករត់ និងបើកចូលក្នុងហាងខារ៉ាអូខេ ដោយធ្វើដូចមិនដឹងរឿងអ្វីទាំងអស់។ ជនរងគ្រោះដែលរបួសធ្ងន់ត្រូវបានដឹកទៅសង្គ្រោះនៅមន្ទីរពេទ្យភ្លាមៗ ចំណែកនាក់រងបួសស្រាលបានជិះម៉ូតូដេញតាមរថយន្តបង្ក និងរាយការណ៍ទៅសមត្ថកិច្ចចុះមកអន្តរាគមន៍មកដល់ចំណុចកើតហេតុ។
សាក្សីបានបន្តថា ខណៈសមត្ថកិច្ចមកដល់ចំណុចកើតហេតុហើយបានបុគ្គលិកខារ៉ាអូខេហៅម្ចាស់រថយន្តបង្កមកដោះស្រាយ តែម្ចាស់រថយន្តមិនបានចេញមកដោះស្រាយនោះទេ ទើបសមត្ថកិច្ចស្ទូចរថយន្តទៅរក្សាទុកនៅអធិការដ្ឋាននគរបាលខណ្ឌចំការមនដើម្បីរង់ចាំម្ចាស់ចូលខ្លួនដោះស្រាយតាមច្បាប់៕
ឌួងវិរះជ័យ
0 Comments