បាត់ដំបង ៖ មន្ត្រីប៉េអិមមួយរូបដែលមានលក្ខណៈស្រវឹងជោកជាំ បានទាញដំបងដើរវ៉ៃមនុស្សប្រមាណជាង១០នាក់ ទោះបីជាអ្នកទាំងនោះមានផ្ទៃពោះ ឬក៏ជាកុមារទើបតែមានអាយុជាងមួយឆ្នាំក៏ដោយ គឺគេបានប្រព្រឹត្តឡើងទាំងកំរោល កាលពីថ្ងៃទី១៤ ខែកុម្ភៈ ឆ្នាំ២០១៥ វេលាម៉ោងប្រមាណ២រសៀល ត្រង់ចំណុចសំណង់អនាធិបតេយ្យ ក្នុងស្ថានីយរថភ្លើង(រ៉ាជង្រុក) ស្ថិតក្នុងភូមិកម្មករ សង្កាត់ស្វាយប៉ោ ក្រុងបាត់ដំបង បន្ទាប់ពីមន្ត្រីប៉េអិមរូបនេះខឹងបាត់ខោលីអូ និងអាវទ្រនាប់របស់ប្រពន្ធដែលហាលនៅខាងក្រៅផ្ទះ។
ជួបជាមួយកម្ពុជាថ្មីនៅក្នុងស្ថានីយរថភ្លើង មានប្រជាពលរដ្ឋជាច្រើននាក់បានមកចោមរោម
ព្រមទាំងបានរៀបរាប់ថា នៅមុនពេលកើតហេតុគឺពួកគេទាំងអស់គ្នាកំពុងអង្គុយលេងដោយមិនបានដឹងខ្លួនអ្វីទាំងអស់ រំពេចនោះស្រាប់តែមានមន្ត្រីប៉េអិមខេត្តមួយរូបឈ្មោះ ម៉ន ហៅប្រុស ជាមន្ត្រីប៉េអិមខេត្តនៅក្នុងមន្ទីរស្រាវជ្រាវ ដោយមានផ្ទះជួលនៅខាងក្រោយបញ្ជាការដ្ឋានកងរាជអាវុធហត្ថខេត្តតែម្តង ព្រមទាំងមានចម្ងាយពីស្ថានីយរថភ្លើងប្រហែល១៥០ម៉ែត្រ និងបក្ខពួកម្នាក់ទៀត ដែលមានលក្ខណៈស្រវឹងផងនោះ បានជិះម៉ូតូចូលមកក្នុងស្ថានីយរថភ្លើងដោយមិនបាននិយាយស្តីឬសួរនាំអ្វីឡើយ គឺគេបានទាញដំបងប្រវែងជាងមួយម៉ែត្រមកដេញវ៉ៃមនុស្ស មិនថាក្មេង ឬចាស់ឡើយ ដែលធ្វើឲ្យមានការភ្ញាក់ផ្អើលយ៉ាងខ្លាំង ដោយក្នុងចំណោមមនុស្សប្រមាណជាង១០នាក់គឺមានកុមារតូចៗដែលមានអាយុជាងមួយឆ្នាំ និងនារីដែលមានផ្ទៃពោះជាង២ខែម្នាក់ផង។
ប្អូនប្រុស ផល សាវ័ន្ត អាយុ១៩ឆ្នាំ ដែលជាជនរងគ្រោះដែរនោះបានរៀបរាប់ថា ពេលដែល
លោកប៉េអិមនោះមកដល់ បានវាយមកលើខ្លួនទាំងមិនដឹងរឿងអ្វីទាំងអស់គឺត្រូវយ៉ាងដំណំ ដោយឃើញហេតុការណ៍បែបនេះប្រពន្ធរបស់ខ្លួនដែលមានឈ្មោះ ផល អ៊ឺត អាយុ១៧ឆ្នាំ ដែលនាងមានផ្ទៃពោះជាង២ខែផងនោះបានស្ទុះមកជួយ និងសុំអង្វរកុំឲ្យគេវាយតទៅទៀត តែត្រូវលោកប៉េអិមរូបនោះវាយត្រូវ១ដំបងកណ្ដាលក្បាល ហើយលើកជើងអុកមួយជង្គង់ថែមទៀតចំដើមទ្រូងបណ្ដាលឲ្យដួលសន្លប់បាត់មាត់ឈឹងតែម្តង រួចទើបគេដើរទៅវាយអ្នកដទៃទៀតដែលក្នុងនោះគេបានវាយចំជើងក្មេងដែលមានអាយុជាងមួយឆ្នាំឡើងជាំ ព្រមទាំងបានចាប់ជើងទាំងពីរបំរុងបោកទៅនឹងដីថែមទៀត ប៉ុន្តែត្រូវបានម្តាយលើកដៃសំពះអង្វរកុំឲ្យធ្វើបាបកូនដែលនៅតូចមិនទាន់ដឹងខ្យល់អ្វីសោះនោះ ទើបជនកំណាចនេះទាត់ទៅលើម្តាយវិញបណ្ដាលឲ្យដួលទៅនឹងដី។
នៅក្នុងរយៈពេលជិតមួយម៉ោងដែលមន្ត្រីប៉េអិមរូបនេះបានធ្វើសកម្មភាពវាយមនុស្សពេញភូមិដោយគេបានឈរស្រែកថា អាណាមិនសុខចិត្ត ចង់ប្ដឹងអញ្ជើញតាមចិត្ត ហើយពួកអ្ហែងទាំងអស់គ្នាប្រយ័ត្នអញយកឡានមកដឹកយកទៅទាំងអស់ ដោយសារតែពួកអ្ហែងនេះដើររើសអេតចាយ ហើយហ៊ានលួចខោអាវរបស់គេទៀត ព្រោះថ្មីៗនេះប្រពន្ធរបស់អញបានបាត់ខោលីអូ និងអាវទ្រនាប់ដែលដាក់ហាលនៅខាងក្រៅផ្ទះគឺគ្មានអាណាលួចក្រៅពីពួកអ្ហែងហ្នឹងទេ។
បញ្ហានេះដែរក៏មានការរិះគន់ពីសំណាក់មជ្ឈដ្ឋានជាច្រើនដែលគេបានចោទសួរថា ក្នុងនាមជាមន្ត្រីប៉េអិមមួយរូបដែលជាអ្នកកាន់ច្បាប់ ហើយហ៊ានដើរចោទគេចោទឯងដោយគ្មានភស្តុតាងបែបនេះ តើត្រឹមត្រូវដែរឬទេ? មិនត្រឹមតែប៉ុណ្ណោះទេ ថែមទាំងដើរវ៉ៃមនុស្សទាំងតូចទាំងធំគ្មានការសួរនាំឲ្យបានច្បាស់លាស់ទាល់តែសោះ។
បច្ចុប្បន្នមនុស្សមួយចំនួនត្រូវបានបញ្ជូនទៅកាន់មន្ទីរពេទ្យ ដោយឡែកស្ត្រីដែលមានផ្ទៃពោះ
ត្រូវបានលោកវេជ្ជបណ្ឌិត លី ឡូត ប្រចាំនៅមន្ទីរពហុព្យាបាល (វិសាលសុខ) បាត់ដំបងធ្វើការបំភ្លឺថាជាសំណាងល្អដែលកូននៅក្នុងផ្ទៃមិនមានការប៉ះពាល់ ព្រោះក្រោយពីមានការឆ្លុះអេកូត្រួតពិនិត្យ
ឃើញថាបេះដូងរបស់ទារកមានចង្វាក់១៦០ក្នុងមួយនាទីជាធម្មតា ដោយប៉ះពាល់តែលើរាងកាយ
របស់ម្តាយតែប៉ុណ្ណោះ ហើយនាងក៏មិនបានទាមទារអ្វីឲ្យធ្ងន់ធ្ងរដែរ ដោយគ្រាន់តែឲ្យជនបង្កជួយចេញថ្លៃព្យាបាលទៅបានហើយ នេះជាសំដីដែលនាងបាននិយាយនៅពេលដែលមានសមត្ថកិច្ច
ប៉ូលិសចុះទៅសាកសួរព័ត៌មានដល់មន្ទីរពេទ្យ កាលពីល្ងាចថ្ងៃទី១៤ ខែកុម្ភៈ ឆ្នាំ២០១៥។
ក្រោយពីមានមន្ត្រីប៉េអិមដទៃទៀតចុះមកនាំខ្លួនចូលទៅក្នុងបន្ទាយ វាហាក់បីដូចជានាំយកចេញពីកន្លែងកើតហេតុដើម្បីឲ្យផុតពីការចោទប្រកាន់តែប៉ុណ្ណោះ ដោយពុំបានដាក់ទោសទណ្ឌអ្វីទៅលើបុគ្គលនេះឡើយ ប៉ុន្តែគេមិនទាន់ដឹងថា តើរឿងនេះលោកព្រះរាជអាជ្ញាបានជ្រាបដែរឬអត់នោះទេ។ បើលោកបានជ្រាបគួរណាស់តែបញ្ជាឲ្យសមត្ថកិច្ចនាំខ្លួនជននេះចូលទៅបំភ្លឺតាមផ្លូវច្បាប់ទើបពិតជាត្រឹមត្រូវ និងជាអ្នកកាន់យុត្តិធម៌យ៉ាងពិតប្រាកដ៕
សោ និយមរ័ត្ន
0 Comments