បន្ទាប់ពីការប្រកួតដ៏ស្វិតស្វាញរយៈពេលពេញមួយព្រឹកធំនោះ ការប្រកួតកីឡា CCC Aquathlon លើកទី៤ ឆ្នាំ២០១៥ ដែលបានរៀបចំធ្វើនៅ Cambodia Country Club នាព្រឹកថ្ងៃទី១៥ ខែកុម្ភៈ បានបញ្ចប់ដោយជោគជ័យ និងបានរកអ្នកឈ្នះលេខ១ទាំងបុរស-នារី គ្រប់ប្រភេទអាយុដែលបានកំណត់ក្នុងវិញ្ញាសាដាក់ឲ្យប្រកួតនោះ។
លោកឧកញ៉ា គង់ រិទ្ធីជព្វ ប្រធានសហព័ន្ធកីឡាទ្រីយ៉ាត្លុងបានឲ្យដឹងថា Aquathlon ជាប្រភេទកីឡាមួយដែលបញ្ចូលគ្នាដោយវិញ្ញាសាហែលទឹក និងរត់ប្រណាំង។ ការប្រកួតលើកទី៤នេះ មានសមាគម-ក្លិបចំនួន១០ចូលរួម គឺក្លិបឬទ្ធីសែន - អង្គការមិត្តសំឡាញ់ - មជ្ឈមណ្ឌលជាតិហ្វឹកហ្វឺនកីឡា- ក្រសួងមហាផ្ទៃ - អង្គការភាពញញឹមនៃកុមារ - ក្លិបយុវជនភូមិឫស្សី-សកលវិទ្យាល័យធនធានមនុស្ស- ក្លិបលោកតាព្រឹទ្ធាចារ្យ ហែម ថុន - ក្លិបតាខ្មៅ និងក្លិប CCC ។ សរុបអត្តពលិកដែលចូលរួមមានចំនួន១៨០នាក់ ក្នុងនោះមានកីឡាការិនីចំនួន៤៦នាក់។
ការប្រកួតចែកចេញជា៣ប្រភេទអាយុ គឺអាយុ១៣ទៅ១៧ឆ្នាំ បុរស-នារីដែលតម្រូវឲ្យហែលទឹកចម្ងាយ១៥០ម៉ែត្រ និងរត់៣.២០០ម៉ែត្រ។ ប្រភេទអាយុ១៨ទៅ៣៥ឆ្នាំ បុរស-នារីតម្រូវឲ្យហែលទឹក៣៥០ម៉ែត្រ និងរត់៤.៨០០ម៉ែត្រ។ ប្រភេទអាយុលើ៣៥ឆ្នាំ បុរសតម្រូវឲ្យហែលទឹកចម្ងាយ២៥០ម៉ែត្រ រត់៤.០០០ម៉ែត្រ។
ចំពោះលទ្ធផលចំណាត់ថ្នាក់នោះ ប្រភេទអាយុ១៣ទៅ១៧ឆ្នាំនារី ចំណាត់ថ្នាក់លេខ១ កីឡាការិនី ផល រតនា ប្រើថិរវេលា២០នាទី២១វិនាទី៣២ លេខ២ ម៉េត ម៉ារីយ៉ាន ថិរវេលា២០នាទី៥៣វិនាទី និងលេខ៣ ប៊ុន រក្សា ថិរវេលា២១នាទី០៨វិនាទី៤៣។ ពួកគេមកពីក្រសួងមហាផ្ទៃជាមួយគ្នា។ រីឯប្រភេទអាយុពី១៣ទៅ១៧ឆ្នាំបុរសវិញ លេខ១ កីឡាករ ផល ករុណា ថិរវេលា១៦នាទី ៤៣វិនាទី៣៣ លេខ២ ឆោម ច័ន្ទថន ថិរវេលា១៧នាទី២០វិនាទី១៣ ពួកគេមកពីក្លិបព្រឹទ្ធាចារ្យ ហែម ថុន និង លេខ២ កីឡាករ ឆោម ច័ន្ទថុន ក្រសួងមហាផ្ទៃ ថិរវេលា១៧នាទី២០វិនាទី២១។
ប្រភេទអាយុចាប់ពី១៨ទៅ៣៥ឆ្នាំនារី លេខ១ កីឡាការិនី Ayano Kinoshita ក្រសួងមហាផ្ទៃថិរវេលា៣១ នាទី ៥១វិនាទី៥៣ លេខ២ កីឡាការិនី សេង សម្ផស្ស ក្លិបព្រឹទ្ធាចារ្យ ហែម ថុន ថិរវេលា៣៩នាទី៦០វិនាទី៦៦ និងចំណាត់ថ្នាក់លេខ៣ អ៊ុំ រាជនីធម៌ ក្លិបមជ្ឈមណ្ឌលជាតិហ្វឹកហ្វឺនកីឡា ថិរវេលា៤២នាទី៥៤វិនាទី៧៧។
សម្រាប់បុរសអាយុពី១៨ទៅ៣៥ឆ្នាំ ចំណាត់ថ្នាក់លេខ១ កីឡាករម៉ា វីរ៉ូ ក្លិបឬទ្ធិសែន ថិរវេលា២៦នាទី២១ វិនាទី៤៥ ។ លេខ២ ចេង ពិរោទិ៍ ក្រសួងមហាផ្ទៃថិរវេលា២៦នាទី៤៧វិនាទី៣៨ និង ចំណាត់ថ្នាក់លេខ៣ ឃិន សម្បត្តិ ក្លិបព្រឹទ្ធាចារ្យ ហែម ថុន ថិរវេលា២៨នាទី១៩វិនាទី៩៩។
ប្រភេទអាយុចាប់ពី៣៥ឆ្នាំឡើង ដែលមានតែបុរសនោះ ចំណាត់ថ្នាក់លេខ១ កីឡាករ ពៅ ហុក មកពីសកលវិទ្យាល័យអាស៊ី អឺរុប ថិរវេលា២៥នាទី៥២វិនាទី៣១។ លេខ២កីឡាករ ឃុត ស្រស់ សកលវិទ្យាល័យធនធានមនុស្ស ថិរវេលា២៦នាទី១១វិនាទី៣២ និង ចំណាត់ថ្នាក់លេខ២ កីឡាករថៃ សុគន្ធ ក្លិបឬទ្ធិសែន ថិរវេលា២៦នាទី៥៥វិនាទី៩២៕
វិសិទ្ធ
0 Comments