ភ្នំពេញ ៖ ម៉ូតូម៉ាកសង់សេ១២៥ពីរគ្រឿង បុកគ្នាពេញទំហឹង បណ្ដាលឱ្យអ្នកបើកទាំងសងខាងរងរបួសធ្ងន់ ចំណែកបុរសម្នាក់ទៀតដែលជិះពីក្រោយរងបួសជាទម្ងន់ផងដែរ។ ហេតុការណ៍នេះបានកើតឡើងកាលពីម៉ោង០៦និង១០នាទី ថ្ងៃទី១៦ ខែកុម្ភៈ ឆ្នាំ២០១៥ នៅតាមបណ្តោយផ្លូវលេខ១៥១ ស្ថិតក្នុងភូមិព្រែកព្នៅ សង្កាត់ព្រែកព្នៅ ខណ្ឌព្រែកព្នៅ រាជធានីភ្នំពេញ។
ប្រភពពីកន្លែងកើតហេតុបានឱ្យដឹងថា ជនរងគ្រោះជិះម៉ូតូម្នាក់ឯងដែលរងរបួសខ្លាំងជាងគេ ក្នុងហេតុការណ៍នេះ មានឈ្មោះ ហួ សៀងឡៃ ភេទប្រុស អាយុជាង២៣ឆ្នាំ មុខរបរសន្តិសុខឯកជន មានទីលំនៅក្នុងភូមិពោធិ៍ ឃុំដំណាក់រាំង ស្រុកឧត្តុង្គ ខេត្តកំពង់ស្ពឺ ជិះម៉ូតូម៉ាកសង់សេ១២៥ សេរីឆ្នាំ២០០៨ ពណ៌ខ្មៅ ពាក់ស្លាកលេខកំពង់ធំ 1B .20 65 បើកក្នុងទិសដៅពីកើតទៅលិច។
ប្រភពបន្តថា ចំណែកជនបង្កដែលរងរបួសធ្ងន់ធ្ងរនោះ មានឈ្មោះ ទឿង ភាព ភេទប្រុស អាយុជាង៣៥ឆ្នាំ មុខរបរកសិករ មានទីលំនៅភូមិជំទប់មាន់ ឃុំជំទប់មាន់ ស្រុកឧត្តុង្គ ខេត្តកំពង់ស្ពឺ ដោយឡែកមិត្តភ័ក្ដិដែលជិះពីក្រោយមិនត្រូវបានគេស្គាល់ឈ្មោះនោះឡើយ គ្រាន់តែដឹង ភេទប្រុស អាយុជាង២០ឆ្នាំ មុខរបរជាងសំណង់ មកពីខេត្តកំពង់ស្ពឺដូចគ្នា ជិះម៉ូតូម៉ាកសង់សេ១២៥សេរីឆ្នាំ២០១៤ ពណ៌ខ្មៅ ពាក់ស្លាកលេខកំពង់ស្ពឺ1A 95 59 បើកបញ្ច្រាសទិសគ្នាជាមួយម៉ូតូជនរងគ្រោះ។
សាក្សីដែលឃើញហេតុការណ៍បាននិយាយឲ្យដឹងថា មុនពេលកើតហេតុ គេឃើញបុរសម្នាក់ ជិះម៉ូតូម៉ាកហុងដាសេ១២៥ សេរីឆ្នាំ២០០៨ ក្នុងទិសដៅពីកើតទៅលិច លុះមកដល់កន្លែងកើតហេតុ ក៏ស្រាប់តែមានម៉ូតូ១គ្រឿងទៀតម៉ាកសង់សេ១២៥ សេរីឆ្នាំ២០១៤ ជិះគ្នា២នាក់បើកក្នុងល្បឿនលឿន ច្រាសទិសគ្នាជាមួយម៉ូតូរងគ្រោះ។
សាក្សីបន្តថា លុះមកដល់ចំណុចកើតហេតុ ម៉ូតូបង្កបានបើកគេចជង្ហុក ហើយរេចង្កូតមកខាងឆ្វេងដៃ បុកចំចំហៀងម៉ូតូរងគ្រោះពេញទំហឹងតែម្តង បណ្ដាលឲ្យអ្នកបើកម៉ូតូទាំង២រងរបួសសន្លប់បាត់ស្មារតី រីឯបុរសម្នាក់ទៀតដែលជិះពីក្រោយម៉ូតូបង្កបានរងរបួសជាទម្ងន់ផងដែរ។ ក្រោយកើតហេតុ ជនរងគ្រោះទាំង៣នាក់ត្រូវបានរថយន្តសាមុយដឹកទៅសង្គ្រោះនៅមន្ទីរពេទ្យកាល់ម៉ែត្រ ចំណែកម៉ូតូទាំងពីរគ្រឿង ត្រូវបានសមត្ថកិច្ចយកទៅរក្សាទុកនៅអធិការដ្ឋាននគរបាលខណ្ឌព្រែកព្នៅរង់ចាំដោះស្រាយទៅតាមផ្លូវច្បាប់៕
ឧត្តរ៉ា
0 Comments