ភ្នំពេញ ៖ លោកឧត្តមសេនីយ៍ទោ លឹម សុខារស្មី ប្រធានស្តីទីនៃនាយកដ្ឋាននគរបាលអន្តរជាតិ បានមានប្រសាសន៍ឲ្យដឹងថា នៅឆ្នាំ២០១៤កន្លងទៅនេះ កិច្ចសហប្រតិបត្តិការក្រៅប្រទេស ដែលជាសមាជិក INTERPOL និងអគ្គលេខាធិការដ្ឋានបានកើនឡើងរហូតដល់១៦៣ករណី។
លោកបានបន្តថា កិច្ចសហប្រតិបត្តិការក្នុងចំណោម១៦៣ករណីនេះ គឺមាន៣៤ប្រទេស និងអគ្គលេខាធិការដ្ឋាននគរបាលអន្តរជាតិ ហើយលទ្ធផលនៃកិច្ចសហប្រតិបត្តិការនោះ គឺសម្រេចបានរហូតទៅដល់៧៤ករណី។
ទោះជាយ៉ាងណាក៏ដោយលោកក៏បានឲ្យដឹងទៀតថា នៅក្នុងកិច្ចសហប្រតិបត្តិការឆ្នាំ២០១៤នោះ គេសង្កេតឃើញមានបទល្មើសសំខាន់ៗរួមមាន បទភេរវកម្ម , បទល្មើសគ្រឿងញៀន , បទល្មើសជួញដូរមនុស្ស , បទល្មើសជួញដូរផ្លូវភេទលើស្ត្រី និងកុមារ , បទល្មើសផ្នែកធនាគារ , បទល្មើសតាមប្រព័ន្ធអ៊ីនធឺណិត , បទល្មើសព្រៃឈើ , បទល្មើសជួញដូរសត្វព្រៃ , បទល្មើសក្លែងឯកសារ និងបទល្មើសផ្សេងៗជាច្រើនទៀត។
លោកបានមានប្រសាសន៍បញ្ជាក់ថា ចាប់តាំងពីនគរបាលកម្ពុជាបានភ្ជាប់ទំនាក់ទំនងជាមួយនឹងអន្តរជាតិ ហើយរហូតបង្កើតជានាយកដ្ឋាននគរបាលអន្តជាតិនៅឆ្នាំ២០០៦ កិច្ចសហប្រតិបត្តិការក្នុងការបង្ក្រាប និងទប់ស្កាត់បទល្មើសមានសកម្មភាពកាន់តែច្រើនឡើងៗជាលំដាប់។
លោកបានបន្តថា ដោយសារតែមានកិច្ចសហប្រតិបត្តិការកាន់តែទូលំទូលាយ បានធ្វើឲ្យកងកម្លាំងនគរបាលជាតិកម្ពុជាកាន់តែមានបទពិសោធន៍ក្នុងការបង្ក្រាប ទប់ស្កាត់ ឧក្រិដ្ឋកម្មឆ្លងដែន ដែលមានលក្ខណៈអន្តរជាតិ ហើយក៏លើកតម្កើនកិត្តិយសនគរបាលកម្ពុជា ដែលបានចូលរួមក្នុងការសម្រេចលទ្ធផលនៃកិច្ចសហប្រតិបត្តិការ ជាមួយបណ្ដាប្រទេសដែលជាសមាជិកនគរបាលអន្តរជាតិ INTERPOL ផ្ទាល់ក៏ដូចជាអគ្គលេខាធិការដ្ឋាននគរបាលអន្តរជាតិផងដែរ៕
សំអឿន
0 Comments