ភ្នំពេញ ៖ ស្ត្រីម្នាក់បានស្លាប់បាត់បង់ជីវិតភ្លាមៗនៅនឹងកន្លែងកើតហេតុ ចំណែកបុរសជាប្ដីរបួសធ្ងន់ ហើយក៏ត្រូវបានគេជួយសង្គ្រោះដោយដឹកបញ្ជូនទៅកាន់មន្ទីរពេទ្យភ្លាមៗដែរ ក្រោយពេលដែលមានគ្រោះថ្នាក់ចរាចរជិះម៉ូតូទៅទាក់ដៃចង្កូតជាមួយរ៉ឺម៉កម៉ូតូបណ្ដាលឲ្យដួលទៅលើថ្នល់ ស្របពេលរថយន្តមកដល់ក៏បានកិនពីលើបណ្ដាលឲ្យមានគ្រោះអាក្រក់នេះកើតមានឡើងតែម្តង។
ហេតុការណ៍គ្រោះថ្នាក់ចរាចរនេះបានកើតឡើងកាលពីវេលាម៉ោង១០ព្រឹក ថ្ងៃទី១៦ ខែកុម្ភៈ ឆ្នាំ២០១៥ នៅចំណុចមហាវិថីសហព័ន្ធរុស្ស៊ីមុខសកលវិទ្យាល័យភូមិន្ទភ្នំពេញ ស្ថិតក្នុងសង្កាត់ទឹកល្អក់ទី១ ខណ្ឌទួលគោក។ បង្កឡើងពីរថយន្តម៉ាកឡិចស៊ីRX300 ពណ៌ទឹកប្រាក់ ហើយក្រោយពេលកើតហេតុរថយន្តបង្កនេះបានបន្ថែមល្បឿនរត់គេចខ្លួនបាត់ស្រមោល។
ស្ត្រីរងគ្រោះដែលស្លាប់បាត់បង់ជីវិតនេះត្រូវបានគេប្រាប់ឲ្យស្គាល់ឈ្មោះ យ៉ាន រិទ្ធី អាយុប្រហែល៣០ឆ្នាំ និងប្ដីឈ្មោះ ម៉ៅ វុទ្ធី អាយុ៥៣ឆ្នាំ ជាសន្តិសុខឯកជន មានទីលំនៅសង្កាត់ចោមចៅ ខណ្ឌពោធិ៍សែនជ័យ។
ប្រភពពីសាក្សីនៅកន្លែងកើតហេតុបានឱ្យដឹងថា នៅមុនពេលកើតហេតុគេបានឃើញជនរងគ្រោះទាំង២នាក់ប្ដី-ប្រពន្ធបានជិះម៉ូតូឌុបគ្នាចេញពីកន្លែងធ្វើការនៅម្តុំស្តុបទេពផន ដោយជិះម៉ូតូម៉ាកហុងដាសេ125 ពណ៌ខ្មៅ ពាក់ស្លាកលេខភ្នំពេញ 1 AX 3409 តាមផ្លូវសហព័ន្ធរុស្ស៊ី ក្នុងទិសដៅពីកើតមកលិច លុះពេលមកដល់មុខសកលវិទ្យាល័យភូមិន្ទភ្នំពេញបានទាក់ដៃចង្កូតគ្នាជាមួយរ៉ឺម៉កម៉ូតូបណ្ដាលឱ្យដួល ចៃដន្យរថយន្តឡិចស៊ីសRX300 ពណ៌ទឹកប្រាក់កំពុងធ្វើដំណើរចុះពីលើស្ពានអាកាសក្នុងទិសដៅពីលិចទៅកើតមកដល់ចាប់ហ្វ្រាំងមិនទាន់កិនចំក្បាលស្លាប់តែម្តង ចំណែកបុរសជាប្ដីរងរបួសធ្ងន់ត្រូវគេបញ្ជូនទៅសង្គ្រោះនៅមន្ទីរពេទ្យ។ ចំណែករថយន្តឡិចស៊ីសបង្កក្រោយពីកិនមនុស្សស្លាប់ហើយ មិនបានឈប់ទេ គឺបានបន្ថែមល្បឿនរត់គេចខ្លួនបាត់ស្រមោល៕
ស្រីរ័ត្ន
0 Comments