កណ្ដាល ៖ លោក ភ្នង ឆេង មេសហគមន៍នេសាទនៅឃុំប្រសាទ ស្រុកស្អាង បានឲ្យដឹងថា ស្នាមមេដៃប្រជាពលរដ្ឋនៅឃុំប្រាសាទប្រមាណជិត១.០០០គ្រួសារ និងភ្ជាប់ជាមួយលិខិតស្នើសុំមួយច្បាប់ដែលត្រៀមនឹងដាក់ជូនលោកអភិបាលស្រុកស្អាង និងអភិបាលខេត្តកណ្តាល គឺលោក ម៉ៅ ភិរុណ តាមរយៈសហគមន៍ និងមេឃុំប្រសាទដើម្បីស្នើសុំឲ្យដកប៉ុស្តិ៍ជជុះរបស់ប៉េអិមខេត្តកណ្តាល ក្រោមបញ្ជាលោក មាស សុវណ្ណ ដែលបានបញ្ជាឲ្យឈ្មោះ ប៊ុត សុភ័ក្ត មកដាក់ស្នាក់ការផែបណ្ដែតទឹកនៅមុខវត្តប្រាសាទ និងដោយគ្មានបទបញ្ជាពីថ្នាក់ដឹកនាំខាងលើនោះ ដែលបច្ចុប្បន្ននេះ កំពុងបង្កជាបញ្ហាលេចចេញជាបទល្មើសនេសាទយ៉ាងអនាធិបតេយ្យបំផុតគួរឲ្យប្រជាពលរដ្ឋព្រួយបារម្ភជាខ្លាំង។ ប៉ុន្តែករណីនេះ អាជ្ញាធរហាក់បីនៅព្រងើយកន្តើយ មិនដឹងជាមានមូលហេតុអ្វីនោះទេ កន្លងមក។ អាជ្ញាធរបានអះអាងថានឹងមានចំណាត់ការក្នុងករណីនេះ ប៉ុន្តែរហូតដល់ពេលនេះ អាជ្ញាធរនៅតែគ្មានចំណាត់ការសោះ ចំណុចនេះកំពុងធ្វើឲ្យពលរដ្ឋរាប់ពាន់គ្រួសារមានការសង្ស័យ និងអស់ជំនឿទៅលើអាជ្ញាធរស្រុក ហើយសុំធ្វើការស្នើសុំដល់លោក ម៉ៅ ភិរុណ អភិបាលខេត្តកណ្ដាល មេត្តាមានវិធានការទប់ស្កាត់ ឬលុបបំបាត់កុងត្រូលជជុះនេះចោលផង ព្រោះកំពុងប៉ះពាល់សតិអារម្មណ៍ប្រជាពលរដ្ឋយើងច្រើនណាស់ ដោយសារតែក្រុមលោក ប៊ុត សុភ័ក្ត អនុវត្តផ្ទុយពីគោលការណ៍ដែលបានធ្វើការស្នើសុំ ដោយបញ្ជាក់ថា ដាក់កម្លាំងមកការពារតំបន់អភិរក្សពូជត្រីនោះ។ ប្រជាពលរដ្ឋទូទាំងឃុំប្រាសាទបានលើកឡើងថា ធាតុពិតក្រុមលោក ប៊ុត សុភ័ក្ត មិនបានអនុវត្តតាមការស្នើសុំ និងលិខិតបេសកកម្មកម្មនោះទេ ពួកគេបានមកធ្វើសកម្មភាពរាប់ក្បាលទូកប្រព្រឹត្តបទល្មើសនេសាទផ្សេងៗយកលុយដោយមិនសំចៃដៃនោះឡើយ ពិសេសក្រុមអ្នករកស៊ីបទល្មើសឆក់ត្រីរាប់រយរាប់ពាន់ទូក ដែលស្ថិតនៅក្នុងភូមិសាស្ត្រចំនួន៤ស្រុក គឺស្រុកស្អាង, ស្រុកកោះធំ, ស្រុកកៀនស្វាយ និងស្រុកលើកដែក។
ប្រជាពលរដ្ឋឃុំប្រាសាទ និងមេសហគមន៍នេសាទបានបញ្ជាក់ឲ្យដឹងថា ក្រុមអ្នកប្រព្រឹត្តបទល្មើសទាំងអស់ ពិសេសក្រុមអ្នកឆក់ត្រី មុននឹងចេញទៅរកស៊ីឆក់ត្រី ត្រូវតែនាំគ្នាចូលខ្លួនទៅស្នាក់ការប៉េអិមលោក ប៊ុត សុភ័ក្ត ដើម្បីបង់ប្រាក់ដោយអ្នកឆក់ត្រីម្នាក់ ឬទូកមួយគ្រឿងត្រូវតែបង់ប្រាក់ចាប់ពី២០ទៅ៣០ម៉ឺនរៀល ជាកំហិតទើបរកស៊ីបានម៉ាសេរី ដោយគ្មានបញ្ហាឡើយ បើមិនដូច្នេះទេប្រយ័តតែពួកគេដេញចាប់បាន នោះគឺត្រូវជាប់ខ្នោះ ច្រវាក់ ទុកឲ្យមូសស៊ីមួយយប់ ឬពីរយប់រួចនឹងពិន័យសួរចម្លើយ ហើយឲ្យពួកទាំងនោះឆ្លើយសារភាពថា ពួកគេបានបង់លុយជូនឲ្យអ្នកកាសែតនោះ ហើយពួកគេគឺជាក្រុមកូនចៅអ្នកកាសែតនោះ។
លោកបានបន្តទៀតថា ពេលបានចម្លើយអស់ហើយ គេនឹងធ្វើរបាយការណ៍ ឬពាក្យបណ្ដឹងដាក់ជូនទៅតុលាការ ហើយសុំដីកាចាប់អ្នកកាសែតនោះឲ្យជាប់គុក ឬរត់ចោលស្រុករកព្រៃជ្រកលែងបានតែម្តង។ បើទោះបីជាយ៉ាងណា ពលរដ្ឋរាប់ពាន់គ្រួសារមិនសប្បាយចិត្តនឹងសកម្មភាពខាងលើនេះទេ ហើយសំណូមពរយ៉ាងទទូច សុំឲ្យអាជ្ញាធរស្រុក ខេត្ត ពិសេសលោក សៅ សុខា មេបញ្ជាការប៉េអិមផ្ទៃប្រទេស មេត្តាចុះអង្កេត និងទប់ស្កាត់បញ្ហានេះផង៕
រ៉ាបូរ
0 Comments