*ប្រវត្តិរូបសង្ខេប
កញ្ញា ហ៊ិន ច័ន្ទនិរ័ត្ន មានស្រុកកំណើតនៅសង្កាត់វាលវង្ស ខណ្ឌ៧មករា រាជធានីភ្នំពេញ។ កញ្ញាកើតនៅឆ្នាំ១៩៩០ ដែលមានបងប្អូនចំនួន២នាក់(ស្រី១ ប្រុស១) ហើយ កញ្ញា គឺជាកូនស្រីច្បងនៅក្នុងគ្រួសារ។ នៅក្នុងឆ្នាំ២០០៧ កញ្ញា បានរំកិលខ្លួនឲ្យកាន់តែជិត ទៅរកវិថីសិល្បៈ ដោយកាលនោះកញ្ញាបានដាក់ពាក់ប្រឡងចូលជាហ្រេ្វស៊ី ហើយទទួលបានចំណាត់ថ្នាក់លេខ១តែម្ដង។
*ការបោះជំហានចូលវិថីសិល្បៈ
ក្រោយពីជាប់ចំណាត់ថ្នាក់លេខ១ ហ្វ្រេស៊ីហើយនោះ កញ្ញា ហ៊ិន ច័ន្ទនីរ័ត្ន បានចាប់ផ្តើមសាង កេរ្តិ៍ឈ្មោះ ក្នុងនាមជាពិធីការិនី ដែលដំបូងឡើយធ្វើនៅស្ថានីយទូរទស្សន៍ប៉ុស្តិ៍លេខ៣ ទទួលបាននូវតំណែងជាពិធីការិនីប្រចាំប៉ុស្តិ៍លេខ៣ ក្នុងកម្មវិធីធ្មេញស្អាត ញញឹមស្អាត។ ហើយក្រោយមកធ្វើនៅទូរទស្សន៍បាយ័នរហូតមកដល់បច្ចុប្បន្ន។
ចាប់តាំងពីប្រឡូកសិល្បៈ គេសង្កេតឃើញថា ក្រៅពីធ្វើជាពិធីការិនី នាងបានសម្ដែងរឿង ថតខារ៉ាអូខេ ព្រមទាំងថតឈុតពាណិជ្ជកម្មច្រើនដូចជា ស្ពតរបស់ក្រុមហ៊ុនទូរស័ព្ទMfone , ក្រុមហ៊ុនស៊ុយស៊ូគី ,ក្រុមហ៊ុនគ្រឿងសម្អាងមានផលិតផលជាឡេ និងផលិតផលសាប៊ូនួនអាណុងជាដើម។ កញ្ញា ហ៊ិន ច័ន្ទនីរ័ត្ន បានរំលឹកឡើងវិញថា ដោយសារតែកញ្ញាបានទទួលការបណ្ដុះបណ្ដាលនិងហ្វឹកហាត់ជំនាញខាងការរាំ និងការសម្ដែងពីលោកគ្រូអ្នកគ្រូដែលមកពីសកលវិទ្យាល័យភូមិន្ទនិង វិចិត្រសិល្បៈ អស់រយរយៈពេល២ខែ ដោយស្ទើរតែរកពេលសម្រាកគ្មាន ដែលជាហេតុធ្វើឲ្យកញ្ញាមិនសូវជាមានផលលំបាកក្នុងការសម្ដែង ឬក៏ធ្វើជាពិធីការិនីឡើយ។
ឆ្លងកាត់ពីមួយដំណាក់កាលទៅមួយ ដំណាក់កាល បានធ្វើឲ្យកញ្ញា ហ៊ិន ច័ន្ទនិរ័ត្ន ទទួលបាននូវបទពិសោធន៍ដ៏ច្រើនពីវិស័យសិល្បៈ ទាំងផ្នែកសម្ដែង និងផ្នែកពិធីករជាដើម។ តាមរយៈសម្ដីផ្ទាល់របស់កញ្ញា និងចរិតដ៏សុភាពរាបសាររបស់កញ្ញាក៏បានបង្ហាញឲ្យឃើញថា កញ្ញា ជាតារាមួយដួងដែលមានប្រជាប្រិយភាពខ្ពស់ មានកេរ្តិ៍ឈ្មោះល្អ និងពោរពេញដោយភាពរួសរាយរាក់ទាក់ទៀតផង។
*អាជីពសិល្បៈនាពេលបច្ចុប្បន្ន
ដោយឡែក ងាកមករកអាជីពក្នុងវិស័យសិល្បៈនាពេលបច្ចុប្បន្ននេះវិញ គឺកញ្ញាជាពិធីករប្រចាំស្ថានីយ៍ទូរទស្សន៍បាយ័ន ក្នុងកម្មវិធីឆាឆា ជាមួយនឹងលោក ជា វណ្ណារិទ្ធ និងមានកម្មវិធីតន្ត្រីផ្សេងៗទៀតផងដែរ។ ចាប់តាំងពីកញ្ញាចាប់ផ្ដើមប្រឡូកក្នុងវិស័យសិល្បៈមក កញ្ញាបានសម្ដែងក្នុងខ្សែភាពយន្តបានច្រើនរឿងដែរ ដូចជារឿង “ក្រោយភ្លៀងរលឹម” “ព្រាយហាយសូរ” “សាកសពកំបុតក្បាល”.។ល.។ តាមរយៈការទទួលបាននូវបទពិសោធន៍នៃការសម្ដែងរឿងអស់ទាំងនេះ បានកាន់តែរុញច្រានកញ្ញាឲ្យទទួលបាននូវកេរ្តិ៍ឈ្មោះ ក៏ដូចជាសមត្ថភាពក្នុងផ្នែកសិល្បៈ ពីមួយកម្រិតទៅមួយកម្រិតទៀត។ ទន្ទឹមនឹងនេះដែរ កញ្ញាបានបន្តទៀតថា ការងារជាសិល្បៈ វាមិនមែនជាការងារដែលលំបាកខ្លាំងនោះទេ ប៉ុន្តែក៏ត្រូវទាមទារឲ្យមានការយកចិត្តទុកដាក់តាមដានរាល់ការណែនាំ ពីសិល្បៈកររៀមច្បង និងអ្នកដឹកនាំសម្ដែងជាដើម។
យ៉ាងណាមិញ ដូចជារាល់ថ្ងៃ កញ្ញាស្ថិតនៅក្នុងអាជីពជាពិធីករ ដែលនេះទាមទារឲ្យកញ្ញាត្រូវបង្កើនសមត្ថភាពទៅលើការនិយាយ ដែលធ្វើយ៉ាងណាឲ្យអ្នកដែលស្ដាប់អាចទទួលយកបាន និងចាប់អារម្មណ៍ទៅលើកម្មវិធីដែលកញ្ញាកំពុងតែសម្ដែងនោះដែរ។
បើការរៀបរាប់ត្រួសៗ ពីស្ថានភាពការងារសិល្បៈរបស់កញ្ញានោះ គឺកញ្ញាហាក់បីដូចជាមិនសូវមានពេលទំនេរសម្រាប់ធ្វើរឿងផ្ទាល់ខ្លួន នោះទេ ព្រោះកញ្ញាមានការងារច្រើន ពីមួយខែទៅមួយខែ។ ហេតុនេះហើយទើបកញ្ញាផ្អាកការសិក្សាអស់មួយរយៈពេលវែង ក៏ដោយសារគ្មានពេលវេលាគ្រប់គ្រាន់នឹងរៀនសូត្របន្ថែម។
*គន្លឹះថែរក្សាសម្រស់របស់ ហ៊ិន ច័ន្ទនិរ័ត្ន
ថ្វីត្បិតតែកញ្ញាមានពេលរវល់ ច្រើនជាមួយនឹងអាជីពសិល្បៈក្ដី ក៏កញ្ញាមិនភ្លេចចំពោះការថែរក្សាសម្ផស្សផងដែរ ព្រោះកញ្ញាយល់ថា សម្រស់គឺជាអ្វីដែលមិនអាចខ្វះបានសម្រាប់អ្នកសិល្បៈ។ ដូចជាក្នុងពេលបច្ចុប្បន្ននេះ កញ្ញាតែងតែបង្ហាញមុខជាប្រចាំនៅលើកញ្ចក់ទូរទស្សន៍ ដែលមានទស្សនិកជនជាច្រើនចោលភ្នែកមកមើលកញ្ញា។ ដូចនេះកញ្ញាចាំបាច់ឆ្លៀតពេលដើម្បីថែរក្សាសម្រស់របស់ខ្លួនឲ្យនៅ ស្រស់ស្អាត។ មិនត្រឹមតែផ្ដោតសំខាន់ទៅលើបញ្ហាសម្រស់តែប៉ុណ្ណោះទេ ក្នុងនោះដែរ និរ័ត្ន ក៏បានយកចិត្តទុកដាក់ទៅលើសុខភាព ដោយកញ្ញាហាត់ប្រាណជាប្រចាំ និងទទួលយកនូវរបបអាហារដែលទ្រទ្រង់ដល់សុខភាពរាងកាយ។ ចំណែកឯការថែរក្សាផ្នែកសម្រស់វិញ គឺកញ្ញាតែងតែទៅទទួលយកការម៉ាស្សាស្ទីមសូណាជាដើម ដើម្បីបង្កើតសុខភាពស្បែកឲ្យកាន់តែមានភាពម៉ដ្ឋរលោង និងស្រស់ស្អាត៕
0 Comments