ភ្នំពេញ ៖ លោកឧត្ដមសេនីយ៍ មៀច សុផាន់ណា ប្រធានសហព័ន្ធកីឡាយានយន្តកម្ពុជានៅក្នុងឱកាសចូលរួមបើកមហាសន្និបាតប្រចាំឆ្នាំ២០១៥ កាលពីល្ងាចថ្ងៃទី២៩ ខែកក្កដា នៅស្នាក់ការអូឡាំពិក បានបង្ហាញឲ្យដឹងពីសមាសភាពកីឡាករប្រណាំងរថយន្ត និងម៉ូតូរបស់កម្ពុជា ដែលត្រូវទៅចូលរួមកម្មវិធីASIA CROSS COUNTRY RALLY 2015 នៅប្រទេសថៃ នាដើមខែសីហាខាងមុខនេះ ។
ព្រឹត្តិការណ៍ ASIA CROSS COUNTRY RALLY លើកទី២០ ឆ្នាំ២០១៥នេះ ជាកម្មវិធីធំជាងគេនៅក្នុងតំបន់អាស៊ី ដែលបានបង្កើតឡើងនៅឆ្នាំ១៩៩៦ ហើយបានឆ្លងកាត់ប្រទេសថៃ វៀតណាម សិង្ហបុរី ម៉ាឡេស៊ី ចិន ឡាវ និងកម្ពុជា(ឆ្នាំ២០១២ និង២០១៤)។
កម្ពុជាបញ្ជូនកីឡាករប្រណាំងរថយន្ត (០១គ្រឿង) មានលោក ហូ សិទ្ធីគុណ អ្នកបើក និងមានជំនួយការអ្នកបើក២នាក់ គឺលោក ផល សុផេង និងលោក វង្ស គឹមហួត។ ឯកីឡាករម៉ូតូ ដែលមាន២គ្រឿងនោះ គឺកីឡាករ ឃួន ផាន់ដារ៉ា និងកីឡាករ ចាន់ ដារ៉ាវុធ។ ក្រៅពីនោះមានរថយន្តជំនួយការ២គ្រឿងទៀត ដែលមានក្រុមជំនួយការ៩នាក់។
លោក មៀច សុផាន់ណា បញ្ជាក់ឲ្យដឹងទៀតថា ការចេញដំណើរនៅថ្ងៃទី០៥ ខែសីហា និងត្រឡប់មកវិញនៅថ្ងៃទី១៦ ខែសីហា។ ការប្រណាំងចាប់ផ្ដើមនៅថ្ងៃទី៨ ខែសីហា និងបញ្ចប់នៅថ្ងៃទី១៤ ខែសីហា។
ជាការប្រណាំងឆ្លងកាត់ឧបសគ្គមានដូចជា ផ្លូវតូច ផ្លូវធំ ព្រៃភ្នំ ចម្ការ ជ្រលង ទឹក ថ្មផុក.។ល.។ ដោយចាប់ផ្ដើមពីនៅទីក្រុងឈៀងម៉ៃ ឆ្លងកាត់ខេត្តមែហុងសុន ,ខេត្តមែសុត,ខេត្តសុខោទ័យ និង ខេត្តផ្រែ ហើយបញ្ចប់នៅទីក្រុងឈៀងម៉ៃវិញ ដែលសរុបចម្ងាយផ្លូវប្រមាណ២០០០គីឡូម៉ែត្រ។ ព្រឹត្តិការណ៍នេះ មានកីឡាករចូលរួមមកពី១១ប្រទេស គឺបែលហ្សិក កម្ពុជា កាណាដា ដាណឺម៉ាក ជប៉ុន ម៉ាឡេស៊ី កូរ៉េ ន័រវ៉េ ស៊ុយអែត តៃវ៉ាន់ និងថៃ ដែលមានរថយន្តចំនួន៣០គ្រឿង និងម៉ូតូ៤២គ្រឿង៕
បញ្ជូនកីឡាករទៅចូលរួម ASIA CROSS COUNTRY RALLY 2015
0 Comments