ក្រោយពីស្ងប់ស្ងាត់បាត់មុខអស់មួយរយៈខ្លីនេះ តារាសម្ដែងវ័យក្មេងសម្ដីមួយៗ កញ្ញា នៅ សូនីតា ហាក់មានយីអ៊ុនស្នេហ៍មិនធម្មតាឡើយ។ ទន្ទឹមនឹងនេះដែរ ក៏មានការទម្លាយឱ្យដឹងពីប្រភពមជ្ឈដ្ឋានខាងក្រៅមកថា តារាចម្រៀងសាច់សខ្ចីដូចបណ្ដូលចេករូបនេះ កំពុងភ្ជាប់ស្នេហ៍ជាមួយបុរសវ័យក្មេងកូនថៅកែសម្បូរទ្រព្យម្នាក់យ៉ាងត្រជាក់ចិត្ត។
ប្រភពដែលខ្សឹបខ្សៀវពីមាត់អ្នកក្រៅសិល្បៈបានឱ្យដឹងថា បុរសខាងលើ បច្ចុប្បន្នកំពុងតែភ្ជាប់ទំនាក់ទំនងស្នេហ៍ជាមួយកញ្ញា នៅ សូនីតា គឺមានវ័យប្រហែលជាង២០ឆ្នាំ ជិះរថយន្តស៊េរីទំនើប និងមានតម្លៃថ្លៃ។
ប្រភពនិយាយថា ក្នុង១ខែ បុរសនោះតែងមកជួបកញ្ញា នៅ សូនីតា យ៉ាងហោចណាស់៦ ទៅ៧ដង។ ម្យ៉ាងទៀតតារាចម្រៀងសម្បូរមន្តស្នេហ៍នាង សូនីតា ក៏ឧស្សាហ៍ចុះឡើងតាមផ្សារទំនើបដើម្បីទៅទិញផលិតផល និងសម្ភារៈដែលមានតម្លៃថៃ្លៗទៀងផង។
ប្រភពខាងលើបានឱ្យដឹងថា រយៈពេលចុងក្រោយនេះ ថ្វីត្បិតតែកញ្ញា នៅ សូនីតា ដូចជាមិនសូវចាប់អារម្មណ៍ទៅលើការងារសម្ដែងសិល្បៈក៏ពិតមែន ប៉ុន្តែនាងតែងបានសម្ញែងភាពហ៊ឺហា ស៊ីវិល័យ ជាមួយនឹងការលេងខ្លួន ដោយការប្រើប្រាស់នូវសម្ភារៈមានតម្លៃថ្លៃ និងទំនើបៗ ខុសប្លែកពីពេលដែលនាងចូលប្រឡូកក្នុងវិស័យសិល្បៈគ្រាដំបូង។
ប្រភពខាងលើបាននិយាយទៀតថា រាល់សកម្មភាពដែលបង្ហាញពីភាពស្និតស្នាលរវាងកញ្ញា នៅ សូនី តា ជាមួយនឹងបុរសវ័យក្មេងម្នាក់នោះ ហាក់ដូចជាមានការខុសប្លែករវាងមិត្តភាព ត្រឹមតែជាអ្នកដែលស្គាល់គ្នា ឬមួយជាមិត្តភ័ក្ដិ ព្រោះឥរិយាបថដែលអ្នកទាំងពីរបានស្តែងឡើងនោះ អាចសន្និដ្ឋានថា ជាការចាប់ផ្ដើមសាងស្នេហ៍ពីការស្វែងយល់ចិត្តគ្នាលើកដំបូង។
ទាក់ទងនឹងការលេចឮព័ត៌មាននិយាយខ្សឹបខ្សៀវខាងលើនេះដែរ កម្ពុជាថ្មីបានព្យាយាមស្វែងរកការបំភ្លឺផ្ទាល់មាត់ពីកញ្ញា នៅ សូនីតា នៅព្រឹកថ្ងៃទី២១ ខែកក្កដា ឆ្នាំ២០១៥នេះ ប៉ុន្តែលេខទូរស័ព្ទមិនអាចទំនាក់ទំនងបានទេ៕
នៅ សូនីតា ជាប់មន្ទិលស្នេហ៍កូនថៅកែយានដ្ឋាន
0 Comments