ព្រៃវែង ៖ សមត្ថកិច្ចនគរបាលការិយាល័យកណ្ដាលយុត្តិធម៌សហការណ៍ជាមួយកងកម្លាំងនគរបាលកណ្ដាលយុត្តិធម៌ខេត្តមណ្ឌលគីរី និងអធិការស្រុក នគរបាលស្រុកបាភ្នំ ចុះប្រតិបត្តិការ ស្រាវជ្រាវកន្លែងលាក់មុខសញ្ញា ក្នុងករណីសមគំនិតក្នុងអំពើប្លន់កាលពីថ្ងៃទី១០ ខែសីហា ឆ្នាំ២០១០ប្រព្រឹត្តនៅភូមិរោងដំរី ឃុំរោងដំរី ស្រុកបាភ្នំ ខេត្តព្រៃវែង។
កាលពីថ្ងៃទី៩ ខែមករា ឆ្នាំ២០១៥ វេលាម៉ោង១៨ និង៣០នាទី សមត្ថកិច្ចនគរបាលការិយាល័យកណ្ដាលយុត្តិធម៌ដឹកនាំដោយលោក សេង សុភក្តិ ស្នងការរង និងជាប្រធានការិយាល័យ កណ្ដាលយុត្តិធម៌សហការណ៍ជាមួយកងកម្លាំងនគរបាលកណ្ដាលយុត្តិធម៌ ខេត្តមណ្ឌលគីរី និង កងកម្លាំងនគរបាលនែអធិការដ្ឋាននគរបាលស្រុកបាភ្នំបានចេញប្រតិបត្តិការស្រាវជ្រាវកន្លែងលាក់ខ្លួនមុខសញ្ញា ឈ្មោះ ជួប ចន្ថា ភេទប្រុស អាយុ៥០ឆ្នាំ មានទីលំនៅភូមិរោងដំរី ឃុំរោងដំរី ស្រុកបាភ្នំ ខេត្តព្រៃវែង ពីមុខសញ្ញាសមគំនិតក្នុងអំពើប្លន់ កាលពីថ្ងៃទី១០ ខែសីហា ឆ្នាំ២០១០ប្រព្រឹត្តនៅភូមិ រោងដំរី ឃុំរោងដំរី ស្រុកបាភ្នំ ខេត្តព្រៃវែងតាមដីកាបង្គាប់ឲ្យចាប់ខ្លួនដីកាលេខ១៧៩ ចុះថ្ងៃទី១៩ ខែ មករា ឆ្នាំ២០១០ ចេញដោយចៅក្រមស៊ើបសួរ ស៊ិន សុវណ្ណរត្ន័ នៃសាលាដំបូងខេត្តព្រៃវែងដែលបានរត់ទៅលាក់ខ្លួននៅភូមិស្រែព្រះ ឃុំស្រែព្រះ ស្រុកកែវសីម៉ា ខេត្តមណ្ឌលគីរី។
លោក សេង សុភក្តិ ស្នងការរងនិងជាប្រធានការិយាល័យនគរបាលកណ្ដាលយុត្តិធម៌បានឲ្យដឹងថា ឆ្លងតាមការស្រាវជ្រាវពីភ្នាក់ងារមូលដ្ឋានអស់រយៈពេលយ៉ាងយូរ និងដោយមានការសហការរវាងខេត្តព្រៃវែង និងខេត្តមណ្ឌលគីរី ហើយដោយមានការផ្តល់ព័ត៌មានពីមូលដ្ឋានថា មុខសញ្ញា ឈ្មោះ ជួប ចន្ថា ភេទប្រុស អាយុ៥០ឆ្នាំ មានទីលំនៅភូមិរោងដំរី ឃុំរោងដំរី ស្រុកបាភ្នំ បានរត់ទៅលាក់ខ្លួននៅភូមិស្រែព្រះ ឃុំស្រែព្រះ ស្រុកកែវសីម៉ា ខេត្តមណ្ឌលគីរី។
ក្រោយពីទទួលបានព័ត៌មាននេះភ្លាម សមត្ថកិច្ចជំនាញបាលផ្តល់ព័ត៌មានជូនទៅការិយាល័យកណ្ដាលនគរបាលយុត្តិធម៌ ខេត្តមណ្ឌលគីរី និងចុះស្រាវជ្រាវមុខសញ្ញាដែលទៅលាក់ខ្លួននៅក្នុងមូលដ្ឋានក្នុងភូមិ ស្រែព្រះ ឃុំស្រែព្រះ ស្រុក កែវសីម៉ា ខេត្តមណ្ឌលគីរី ពេលទទួលបានព័ត៌មាន កម្លាំងនគរបាលការិយាល័យកណ្ដាលយុត្តិធម៌ ខេត្តមណ្ឌលគីរី ក៏បានធ្វើការឃាតខ្លួនបានមុខសញ្ញា ឈ្មោះ ជួប ចន្ថា ភេទប្រុស អាយុ៥០ឆ្នាំ មានទីលំនៅភូមិ រោងដំរី ឃុំរោងដំរី ស្រុកបាភ្នំ ខេត្តព្រៃវែង នៅចំណុចភូមិស្រែព្រះ ឃុំស្រែព្រះ ស្រុកកែវសីម៉ា ខេត្តមណ្ឌលគីរី វេលាម៉ោង១២ និង២០ថ្ងៃត្រង់ ថ្ងៃទី ៨ ខែ មករា ឆ្នាំ ២០១៥ ទើបសមត្ថកិច្ចនគរបាល ខេត្តមណ្ឌលគីរី ផ្តល់ព័ត៌មានមកស្នងការដ្ឋាននគរបាលខេត្តព្រៃវែងឡើងទទួលមុខសញ្ញា។
បច្ចុប្បន្ន សមត្ថកិច្ចជំនាញដឹកនាំដោយលោក អ៊ន សុគន្ធ អធិការនគរបាលស្រុកបាភ្នំបានឡើងទទួលមុខសញ្ញាឈ្មោះ ជួប ចន្ថា បានមកលើខេត្តហើយកំពុងបំពេញសំណុំបែបបទតាមនីតិវិធីច្បាប់៕
សុធា
0 Comments