បាត់ដំបង ៖ ពលរដ្ឋខ្មែរដែលជាជនស្លូតត្រង់ចំនួនពីរនាក់បានស្លាប់យ៉ាងវេទនានៅក្នុងភ្នក់ភ្លើងដែលទាហានឈុតខ្មៅថៃប្រើឧបករណ៍ដុតដោយសំបកកង់រថយន្តកាលពីយប់ថ្ងៃទី៧ ខែមករា ឆ្នាំ២០១៥ នៅត្រង់ចំណុចភូមិខាវចុងខេប ឃុំខ្លងហាត ស្រុកខ្លងហាត ខេត្តស្រះកែវ នៅក្នុងទឹកដីថៃដែលមានចំងាយពីព្រំដែនប្រមាណ5គីឡូម៉ែត្រ ទន្ទឹមនឹងឃុំសន្តិភាពស្រុកសំពៅលូន ខេត្តបាត់ដំបង ខណៈដែលពលរដ្ឋខ្មែរចំនួន៤នាក់បានចូលទៅស៊ីឈ្នួលដឹកម៉ូតូឆ្លងដែនឲ្យគេ ហើយត្រូវទាហានថៃចាប់បាន។
បើតាមការរៀបរាប់ពីលោក អញ កាម៉ាល់ មេបញ្ជាការរងកងរាជអាវុធហត្ថស្រុកសំពៅលូន
បានលើកឡើងថា លោកបានទទួលព័ត៌មាននេះតាមរយៈមន្ត្រីយោធាថៃម្នាក់បាននិយាយថា នៅយប់ថ្ងៃកើតហេតុគឺមានពលរដ្ឋខ្មែរចំនួន៤នាក់បានលបចូលឆ្លងដែនខុសច្បាប់ដើម្បីរកស៊ីអូសម៉ូតូឆ្លងដែនគេចពន្ធ លុះនៅប្រហែលជា៥គីឡូម៉ែត្រ ទៀតដល់ខ្សែបន្ទាត់ព្រំដែនក៏បានជួបនឹងទាហានឈុតខ្មៅថៃរបស់កងវីរសេនាធំលេខ១៣ ដែលឈរជើងតាមខ្សែបន្ទាត់ព្រំដែនត្រង់ចំណុចខាងលើ ទើបត្រូវទាហានទាំងនោះបានដេញតាមបាញ់ប្រមាណ១០គ្រាប់ ប៉ុន្តែគ្រាប់ទាំងនេះពុំមានត្រូវនរណាម្នាក់ឡើយស្របពេលជាមួយគ្នានោះដែរ កម្លាំងទាហានថៃបានពង្រាយគ្នាដេញចាប់ទាំងរស់តែម្តងដោយក្នុងចំណោមពលរដ្ឋខ្មែរទាំង៤នាក់នោះត្រូវបានទាហានថៃចាប់ខ្លួនបានពីរនាក់ ដោយពួកគេបានយកសំបកកង់រថយន្តមកដុតជនស្លូតត្រង់ពីរនាក់នោះទាំងរស់តែម្តង ប៉ុន្តែក្រោយពីដុតមួយសន្ទុះល្មមតែជនរងគ្រោះស្លាប់ហើយ ទើបពួកគេធ្វើការវេចខ្ចប់សពបញ្ជូនទៅធ្វើកោសល្យវិច័យនៅឯទីក្រុងបាងកក ដើម្បីស្រាវជ្រាវរកសាវតារ។
លុះព្រឹកស្អែកឡើងក៏ស្រាប់តែមានសាច់ញាតិ និងក្រុមគ្រួសារបានមកជួបនឹងលោកមេបញ្ជាការរង់ដើម្បីចង់ដឹងការពិត ព្រោះបុរសជាឪពុកបាននិយាយថា កូនរបស់លោកនិងអ្នកភូមិម្នាក់ទៀត
មានឈ្មោះ សូវ រស់ ភេទប្រុស អាយុ២១ឆ្នាំ និងឈ្មោះ វឿន ជី ភេទប្រុស អាយុ៣៦ឆ្នាំ រស់នៅឃុំ
សែនសុខ ស្រុកក្រឡាញ់ ខេត្តសៀមរាប ហើយពួកគេបានចេញពីផ្ទះនៅថ្ងៃទី៦ ខែមករា ឆ្នាំ២០១៥ ដោយបានប្រាប់ថា ទៅរកស៊ីឈ្នួលកាប់អំពៅឲ្យថៃ ប៉ុន្តែទើបតែបានមួយថ្ងៃស្រាប់តែលោកបានទទួលដំណឹងដ៏អកុសលបែបនេះទៅវិញ។
លោក អញ កាម៉ាល់ បានបន្ថែមថា នៅពេលដែលលោកធ្វើការទំនាក់ទំនងជាមួយភាគីថៃ
ដើម្បីទៅពិនិត្យទីតាំងនោះគឺពុំឃើញមានសពនោះទេ ព្រោះគេបានបញ្ជូនទៅក្រុងបាងកកផុតទៅហើយ។ ដោយនៅសល់តែស្នាមផេះនិងធ្យូងនៃសំបកកង់រថយន្តតែប៉ុណ្ណោះ។
មន្ត្រីយោធាម្នាក់នៅក្នុងអង្គភាពនៃការិយាល័យទំនាក់ទំនងព្រំដែនកម្ពុជា ថៃ បានគូស
បញ្ជាក់ថាភាគីកម្ពុជានិងថៃ បានចុះអនុស្សរណៈ(MOU)រួចហើយកាលពីអំឡុងដើមឆ្នាំ២០០០ស្ដីពីការឈប់បាញ់សម្លាប់ទៅលើជនស្លូតត្រង់ ដែលជាជនស៊ីវិល ហើយក៏ត្រូវបញ្ជូនភ្លាមៗទៅកាន់មន្ទីរពេទ្យផងដែរ បើមាននរណាម្នាក់រងគ្រោះដោយសារផ្ទុះគ្រាប់មីនឬក៏សម្រាលកូនជាដើម។
បើទោះបីជាជនទាំងនោះជាជនអន្តោប្រវេសន្តខុសច្បាប់ក៏ដោយ គឺគ្មានទោសប្រហារជីវិតជាដាច់ខាត ម្យ៉ាងវិញទៀតបើជនទាំងនោះបានលបលួចឆ្លងដែនខុសច្បាប់ចំងាយ៥គីឡូម៉ែត្រ ក៏ដោយក៏វាស្ថិតនៅលើតំបន់សដែរ នេះបើយោងទៅតាមច្បាប់យោធាគឺមានចំងាយរហូតដល់១៥គីឡូម៉ែត្រឯណោះ ហើយករណីខាងលើគឺមានន័យថា ភាគីថៃបានបំពានទៅនឹងការចុះអនុស្សរណៈយោគយល់គ្នាទាំងស្រុងដែលភាគីថៃមិនត្រឹមតែដេញតាមបាញ់ប្រហារប៉ុណ្ណោះទេ គឺនៅពេលដែលចាប់បានហើយបែរជាយកជនស្លូតត្រង់ទាំងពីរនាក់នោះទៅដុតសម្លាប់ទាំងរស់ថែមទៀត នេះគឺជាទង្វើមួយដ៏សាហាវ និងឃោរឃៅបំផុតសម្រាប់ក្រុមទាហានឈុតខ្មៅទាំងនេះ។
បច្ចុប្បន្នយើងមិនទាន់ដឹងថា កម្ពុជាមានវិធានការយ៉ាងណានោះទេ ទៅលើភាគីថៃដែល
ប្រព្រឹត្តនូវអំពើថោកទាបដោយបំពានទៅលើអនុស្សរណៈ(MOU)បែបនេះ៕
សោ និយមរ័ត្ន
 ដោយចាប់ពលរដ្ឋខ្មែរដុតសម្លាប់ទាំងរស់){kind=link}
0 Comments