ជាក់ស្តែងនៅវេលាម៉ោង៧និង៣០នាទី ថ្ងៃទី២០ ខែកក្កដា ឆ្នាំ២០១៥ មានសង្ឃមួយអង្គ ដែលមានទ្រង់ស្បង់ជីពយ៉ាងត្រឹមត្រូវសក្ដិសមជាសង្ឃយ៉ាងពិតប្រាកដ ហើយនៅដៃខាងឆ្វេងមានកាន់គ្រាប់អង្កាំ និងដៃខាងស្តាំមានកាន់ត្រឡោកមួយ បាននិមន្តតាមផ្លូវខាងមុខអតីតភោជនីយដ្ឋានជីប ស្រេងស្ថិតក្នុងភូមិកំពង់ក្របី សង្កាត់ស្វាយប៉ោ ក្រុងបាត់ដំបង ព្រមទាំងបានធ្វើកាយវិការឈរទ្រឹងនៅចំពោះមុខមនុស្សម្នាណាដែលលោកបានជួបប្រទះ កុំថាឡើយប្រជាពលរដ្ឋនៅតាមផ្ទះ សូម្បីតែម៉ូតូឌុបក៏លោកមិនលើកលែងដែរ គឺត្រូវតែឈរនៅចំពីមុខហើយអោនរុញត្រឡោកមកជិត ដើម្បីសុំលុយ។
មានប្រជាពលរដ្ឋនៅតាមលំនៅដ្ឋានមួយចំនួន បានសាកល្បងសួរនាំ ប៉ុន្តែសង្ឃអង្គនេះមិនបានឆ្លើយតបតាមរយ:ភាសាណាមួយឡើយ ដែលតាមការសន្និដ្ឋាន គឺលោកមិនចេះស្តាប់តែម្តងដោយគ្រាន់តែធ្វើកាយវិការសុំលុយ តែប៉ុណ្ណោះវាជាការស្រេច ទោះបីជាយើងអោយឬមិនឲ្យក៏ដោយ។
ប្រភពមួយចំនួនបានធ្វើការប្រៀបធៀបទៅនឹងសង្ឃខ្មែរថា វាហាក់បីដូចជាខុសគ្នាដាច់ស្រឡះទោះបីជាមានការកាន់សីលដូចគ្នាក៏ដោយ ព្រោះសង្ឃខ្មែរមិនដែលមានចេញនិមន្តបិណ្ឌបាត្រនៅពេលល្ងាច ឬក៏ពេលយប់បែបនេះឡើយ ដោយមានការប្រកាន់ខ្ជាប់នូវធ៌មវិន័យយ៉ាងត្រឹមត្រូវសមជាអ្នកបួស។
ពាក់ព័ន្ធនឹងបញ្ហានេះដែរលោក អឿន សារុន ស្នងការរងផ្នែកអន្តោប្រវេសន៍ នៃស្នងការដ្ឋាននគរបាលខេត្តបាត់ដំបង បានមានប្រសាសន៍លើកឡើងថា ការនិមន្តបិណ្ឌបាត្ររបស់សង្ឃបរទេសវាសំខាន់ត្រង់ថាប្រជាពលរដ្ឋយើងដាក់បាត្រឬមិនដាក់តែប៉ុណ្ណោះ ព្រោះជាសកម្មភាពបិណ្ឌនៅពេលយប់ចំណែកបញ្ហានេះលោកមិនទាន់ទទួលបានទាល់តែសោះ បើមានយ៉ាងដូច្នេះមែននោះលោកនឹងចាត់កម្លាំងឲ្យតាមឃ្លាំមើល ដើម្បីនាំសង្ឃបរទេសទាំងនេះមកធ្វើការសាកសួរថា តើអាចមានលិខិតឆ្លងដែនដែរឬទេ ហើយពិតជាព្រះសង្ឃមែនឬក៏ជាសង្ឃក្លែងក្លាយ ដើម្បីមានវិធានការតាមច្បាប់៕
មានព្រះសង្ឃបរទេសនិមន្តបិណ្ឌបាត្រលុយ ស្ទើររាល់យប់នៅបាត់ដំបង
0 Comments