ប្រជាពលរដ្ឋ គឺជាកម្លាំងរបស់រដ្ឋ ឬក៏ជាម្ចាស់នៃជោគវាសនា របស់ប្រទេសជាតិ។ មានទស្សនៈប្រកបដោយប្រជាប្រិយនៅក្នុងសង្គមខ្មែរ ក្នុងការជួយថែរក្សាការពារដឹងសុខដឹងទុក្ខ ដឹងអស់ដឹងគង់នោះ ពាក្យចាស់លោកធ្វើការប្រៀបប្រដូចទៅនឹងភ្នែកច្រមុះ។ ឧទាហរណ៍ កូនចៅជាភ្នែកជាច្រមុះរបស់មាតាបិតាក្នុងការងារទាំងឡាយទាំងពួងទាក់ទង នឹងការជំនួសមុខឲ្យក្រុមគ្រួសារ។
លោកបានធ្វើការប្រៀបធៀបអំពីការងារជំនួសមុខតាមរយៈការដឹង ឬការឃើញដោយភ្នែកផង និងការស្រង់ក្លិនដោយច្រមុះផង។ នេះហើយដែលជាការតាមដាន ការងារ ឬក៏ជាការការពារនិងថែរក្សា របស់ទ្រព្យជាកេរមរតក ឲ្យបានគង់វង្ស។ ជាក់ស្តែងបើយើងក្រឡេកមើលកំពូលប្រាង្គប្រាសាទបាយ័ននោះ គឺបុព្វបុរស ឬសិល្បករខ្មែរបានឆ្លាក់មុខមនុស្សក្នុងកំពូលប្រាង្គនីមួយៗ មានមុខ៤ បែរទៅរកទិសធំទាំង៤។ តើចម្លាក់នេះមានអត្ថន័យយ៉ាងណា?
ចម្លាក់នៃមុខ៤ នៃកំពូលប្រាង្គប្រាសាទ បាយ័នបានបញ្ជាក់ថា ជាការសម្លឹងមើល គ្រប់ជ្រុងជ្រោយទាំងអស់តាមរយៈការយល់ពីសភាពការណ៍ ជុំវិញខ្លួនផង និងពិនិត្យអំពីសកម្មភាពល្អ និងសកម្មភាពមិនល្អ ដែលកើតមានឡើងផង។ ជាពិសេសមុខ៤នេះ ជាតំណាងនូវភ្នែកច្រមុះរបស់មនុស្សក្នុងសង្គមខ្មែរ ប្រកបដោយស្មារតី ប្រុងប្រយ័ត្នខ្ពស់បំផុតក្នុងការការពារ និងកសាងប្រទេសជាតិ ឲ្យមានការរីកចម្រើន។ គឺដោយសារកត្តាមនុស្សនេះហើយ ដែលជាធនធានដ៏មានតម្លៃរបស់ប្រទេសជាតិ ឬហៅថា ៉ពលរដ្ឋ ៉ជាកម្លាំងរបស់ជាតិក្នុងការបង្កើតផលប្រយោជន៍ជូនជាតិទើបដូនតាបានឆ្លាក់មុខមនុស្សដោយលើកតម្កើងខ្ពស់ ដល់កំពូលប្រាសាទទុកជាមរតកវប្បធម៌នៃមនុស្សនិយមនៃការអភិវឌ្ឍជាតិបន្តគ្រប់ជំនាន់ទាំងអស់។
ទន្ទឹមនេះដែរបើយើងគិតអំពីតម្លៃនៃពលរដ្ឋក្នុងការការពារនិងថែរក្សាប្រទេសជាតិនោះ គឺគេចាត់ទុក ភ្នែកមនុស្សទាំងអស់ជាអ្នកមើលឃើញច្បាស់អំពីហេតុផលនានា ទាំងការខាតនិងការចំណេញនោះទាំងល្អ និងទាំងអាក្រក់ ដែលកើតមានជុំវិញខ្លួន។ កន្លងមកគេតែងនិយាយថា «ភ្នែកម្នាស់ »ដែលសំដៅទៅលើភ្នែកប្រជាពលរដ្ឋទាំងអស់សម្រាប់បង្ហាញការពិតអ្វីមួយជាក់លាក់រហូតដល់មានទស្សនៈជាសកលមួយឃ្លាពោលថា La rainson du peule est la raison du Dieu គឺប្រែថា យោបល់ប្រជាពលរដ្ឋទុកដូចជាយោបល់អាទិទេព។
បើយើងធ្វើការរំលឹកឡើងវិញអំពីលទ្ធផលនៃការងារកសាង និងការពារជាតិវិញនោះ គឺប្រជាពលរដ្ឋទាំងអស់ទាំងមន្ត្រីរាជការគ្រប់លំដាប់ថ្នាក់ទាំងកម្មករ ពាណិជ្ជករ កសិករ សិប្បករ សិស្សពះសង្ឃ ….។ល។ សុទ្ធតែជាកម្លាំងរបស់រដ្ឋហើយក៏ដូចពាក្យចាស់លោកបានធ្វើការប្រៀបប្រដូចទៅនឹងភ្នែកច្រមុះរបស់រដ្ឋដែរ។ ជាពិសេសប្រជាពលរដ្ឋដែលរស់នៅតាមព្រំដែនជាភ្នែកជាច្រមុះ ដ៏យុត្តិធម៌បំផុតក្នុងការឃ្លាំមើលសកម្មភាពមិនប្រក្រតីតាមរយៈការរំលោភបំពានពីបរទេសជិតខាង។
ជាក់ស្តែងកន្លងមកនេះ គឺប្រជាពលរដ្ឋបានផ្តល់ដំណឹងដល់អាជ្ញាធរ និងដល់អ្នកតំណាងរាស្ត្រមិនថា ជាតំណាងរាស្រ្តគណបក្សនយោបាយណាទេឲ្យ តែជាអ្នកមានតួនាទីជាតំណាងរាស្ត្រនោះគឺជាអ្នកទទួលប្រាក់ខែជាតិហើយក៏ជាអ្នកបំរើជាតិដូចគ្នាទាំងអស់ ដើម្បីរួមគ្នាប្រឈមមុខដោះស្រាយជូនផលប្រយោជន៍ជាតិ និងបង្កនូវសុខុមាលភាព ជូនប្រជាពលរដ្ឋ។ ជាពិសេសមិនថា តំណាងរាស្រ្តនៃគណបក្សប្រឆាំង ឬអ្នកតំណាងរាស្ត្រ នៃគណបក្សមិនប្រឆាំងនោះទេ គឺជាតំណាងនូវភ្នែកច្រមុះរបស់រដ្ឋដូចគ្នា។ បានសេចក្តីថា គេមិនគិតអំពីតំណាងរាស្រ្តគណបក្សប្រឆាំងនាំមុខ ឬនាំក្រោយអ្វីឡើយ។ ឯអ្វីដែលត្រូវគិតនោះ គឺដើម្បីផលប្រយោជន៍ជាតិ និងផលប្រយោជន៍ប្រជាពលរដ្ឋទៅវិញទេ ដែលជារឿងធំដោយមិនបាច់មើលបំណាំគ្នា ឬមិនបាច់ប្រជែងយកប្រជាប្រិយភាពក្នុងការកេងយកចំណេញនយោបាយនៃគណបក្សរបស់ខ្លួននោះទេ។ ដ្បិតប្រជាពលរដ្ឋទាំងអស់ដែលមានអ្នកតំណាងរាស្ត្រគឺ ជាតំណាងនូវភ្នែកច្រមុះរបស់ជាតិស្មើភាពគ្នា ក្នុងនាមជាអ្នកបម្រើជាតិមាតុភូមិជាទីស្នេហា៕
ទស្សនៈ ៖ ភ្នែកច្រមុះរបស់រដ្ឋ
0 Comments