នាយករដ្ឋមន្ត្រីអង់គ្លេសលោក David Cameron បានចាប់ផ្តើមដំណើរទស្សនកិច្ចទៅកាន់តំបន់អាស៊ីអាគ្នេយ៍កាលពីថ្ងៃចន្ទ ក្នុងការស្វែងរកកិច្ចសហប្រតិបត្តិការកាន់តែល្អប្រសើរនៅក្នុងការប្រយុទ្ធប្រឆាំងនឹងក្រុមរដ្ឋឥស្លាម និងដើម្បីពង្រឹងទំនាក់ទំនងពាណិជ្ជកម្មជាមួយប្រទេសដែលមានសេដ្ឋកិច្ចកំពុងរីកលូតលាស់ក្នុងតំបន់នេះ។
លោក Cameron បានមកដល់ប្រទេសឥណ្ឌូនេស៊ីមុនគេ នៃដំណើរទស្សនកិច្ចរយៈពេលបួនថ្ងៃ អមដោយមេដឹកនាំពាណិជ្ជកម្មរបស់ប្រទេសអង់គ្លេសចំនួន៣០នាក់ និងរដ្ឋមន្ត្រីពាណិជ្ជកម្មម្នាក់មុនពេលឆ្ពោះដំណើរទៅកាន់ប្រទេសសិង្ហបុរី វៀតណាម និងម៉ាឡេស៊ី។
លោកនឹងយកកិច្ចប្រជុំជាមួយលោកប្រធានាធិបតី Joko Widodo របស់ឥណ្ឌូនេស៊ីនិងលោកនាយករដ្ឋមន្ត្រី Najib Razak របស់ប្រទេសម៉ាឡេស៊ី ដើម្បីពិភាក្សាអំពីបញ្ហានៃក្រុមជ្រុលនិយម IS ដែលបានរឹបអូសយកផ្នែកដ៏ធំធេងនៃទឹកដីនៅក្នុងប្រទេសអុីរ៉ាក់ និងប្រទេសស៊ីរី។ ជនជាតិអង់គ្លេសវ័យក្មេងរាប់រយនាក់ បានចូលរួមជាមួយក្រុម IS នៅក្នុងប្រទេសស៊ីរី និងអុីរ៉ាក់ ដែលបង្កឲ្យមានការភ័យខ្លាចថា ពួកគេអាចចាប់ផ្តើមការវាយប្រហារនៅលើទឹកដីរបស់ពួកគេពេលត្រឡប់មកវិញ។
ប្រទេសឥណ្ឌូនេស៊ី ដែលមានប្រជាជនមូស្លីមដ៏ធំបំផុតរបស់ពិភពលោក និងបានជួបការលំបាកជាយូរមកហើយ ជាមួយនឹងភាពជ្រុលនិយមនោះ មានការភ័យខ្លាចថា ពលរដ្ឋរបស់ខ្លួនរហូតដល់ទៅ៥០០នាក់ ត្រូវបានបញ្ចុះបញ្ចូលឲ្យទៅកាន់តំបន់មជ្ឈិមបូព៌ាដោយក្រុម IS ខណៈពេលដែលជនជាតិម៉ាឡេស៊ីមូស្លីម ក៏បានចូលរួមជាមួយក្រុមជ្រុលនិយមនេះផងដែរ។
ឥណ្ឌូនេស៊ី បានទទួលរងការវាយប្រហារជាបន្តបន្ទាប់ ដោយក្រុមជ្រុលនិយមឥស្លាមក្នុងរយៈពេល១៥ឆ្នាំមកនេះ រួមទាំងការបំផ្ទុះគ្រាប់បែកនៅកោះបាលី ឆ្នាំ២០០២ ផងដែរដែលបានធ្វើឲ្យមនុស្ស២០២នាក់ស្លាប់។
ចំពោះការធ្វើដំណើរនេះផងដែរ បុគ្គលជាន់ខ្ពស់មកពីក្រុមហ៊ុនអាជីវកម្មអង់គ្លេសដ៏លេចធ្លោរួមមានទាំងក្រុមហ៊ុនផលិតម៉ាស៊ីន Rolls-Royce និងក្រុមហ៊ុនផលិតសម្ភារៈសំណង់ JCB ផងដែរ នៅពេលលោកនាយករដ្ឋមន្ត្រីបានស្វែងរកការធ្វើពាណិជ្ជកម្មក្នុងតំបន់នេះ។
ទោះជាយ៉ាងណាក៏ដោយ លោក Cameron អាចចូលទៅក្នុងភាពចម្រូងចម្រាសក្នុងអំឡុងពេលនៃដំណើរទស្សនកិច្ចទៅកាន់ប្រទេសម៉ាឡេស៊ី។ គាត់បានធ្វើដំណើរមកដល់ចំពេលដែលលោក Najib មានកំហឹងលើការចោទប្រកាន់ដែលថា លុយរាប់រយលានដុល្លារត្រូវបានគេផ្ទេរចេញពីក្រុមហ៊ុនអភិវឌ្ឍន៍ ដែលជាកម្មសិទ្ធិរបស់រដ្ឋមួយចូលក្នុងគណនីផ្ទាល់ខ្លួនរបស់លោក។
ទាំងលោកនាយករដ្ឋមន្ត្រីនិងក្រុមហ៊ុន 1Malaysia Development Berhad (1MDB) បានបដិសេធថា មិនបានធ្វើខុសនោះទេ។ ករណីនេះកំពុងត្រូវបានស៊ើបអង្កេតដោយអាជ្ញាធរម៉ាឡេស៊ី និងគណៈកម្មាធិការសភា។
អ្នកស្រី Nurul Izzah ដែលជាសមាជិកសភានិងជាកូនស្រីរបស់អតីតមេដឹកនាំគណបក្សប្រឆាំងដែលជាប់ពន្ធនាគារ លោក Anwar Ibrahim ក៏បានអំពាវនាវឲ្យបក្ខពួករបស់លោក Cameron ជួបជាមួយនឹងគណបក្សប្រឆាំងផងដែរ។
កាលពីថ្ងៃចន្ទ លោក Cameron បានជួបជាមួយនឹងមេដឹកនាំឥណ្ឌូនេស៊ី លោក Widodo ក៏ដូចជាប្រមុខនៃប្លុកតំបន់នៃសមាគមប្រជាជាតិអាស៊ីអាគ្នេយ៍ (អាស៊ាន) ផងដែរ។ លោកបានចាកចេញទៅកាន់ប្រទេសសិង្ហបុរី នៅថ្ងៃអង្គារនេះ៕
AFP
នាយករដ្ឋមន្ត្រីអង់គ្លេសទស្សនកិច្ចអាស៊ីអាគ្នេយ៍ដើម្បីពិភាក្សាចំពោះការប្រយុទ្ធជាមួយក្រុម IS
0 Comments