មន្ត្រីក្នុងតំបន់ និងប្រភពសន្តិសុខបាននិយាយកាលពីថ្ងៃអាទិត្យថា ពួកសកម្មប្រយុទ្ធតាលីបង់ បានវាយយកមូលដ្ឋានប៉ូលិសមួយដ៏ធំនៅភាគឦសានប្រទេសអាហ្វហ្គានីស្ថាន ដោយបង្ខំឲ្យប៉ូលិសជាងមួយរយនាក់ចុះចាញ់ និងបានជំរុញកាន់តែខិតជិតទៅតំបន់យុទ្ធសាស្ត្រនៅក្បែរព្រំដែនជាមួយប្រទេសប៉ាគីស្ថាន។
ពួកតាលីបង់ បានយកបានស្បៀងអាហារ អាវុធ និងគ្រាប់រំសេវពីមូលដ្ឋាន Tirgaran នៅក្នុងខេត្តភាគឦសាន Badakhshan ដែលមានព្រំប្រទល់ជាប់ប្រទេសចិន ប៉ាគីស្ថាន និងតាជីគីស្ថាន។
ការចាប់យកមូលដ្ឋានកាលពីថ្ងៃសៅរ៍ បានធ្វើឡើងបន្ទាប់ពីរយៈពេលប៉ុន្មានថ្ងៃនៃការប្រយុទ្ធគ្នាដែលប្រហែលជាការវាយលុកដ៏ធំបំផុតរបស់ពួកតាលីបង់ ក្នុងតំបន់ Badakhshan ចាប់តាំងពីត្រូវបានបណ្តេញចេញពីអំណាចក្នុងឆ្នាំ២០០១។
ប្រភពសន្តិសុខលោកខាងលិចបាននិយាយថា ពួកតាលីបង់ បានកាត់ផ្តាច់ផ្លូវទៅកាន់ប្រទេសចិន និងបានបន្សល់ទុកទីប្រចាំការដ៏សំខាន់របស់រដ្ឋាភិបាលតែមួយប៉ុណ្ណោះ មុនពេលឆ្លងកាត់នៅតាមព្រំដែនប៉ាគីស្ថាន។
របាយការណ៍នេះបានឲ្យដឹងថា ប្រសិនបើទទួលបានជោគជ័យមែននោះ ពួកគេនឹងអាចបង្កើតច្រករបៀងមួយ ជួយសម្រួលចលនាឆ្លងកាត់ព្រំដែនរបស់អ្នកប្រយុទ្ធដែលបច្ចុប្បន្នមានមូលដ្ឋាននៅប្រទេសប៉ាគីស្ថាន។
កងកម្លាំងអាហ្វហ្គានីស្ថាន កំពុងប្រយុទ្ធប្រឆាំងនឹងពួកតាលីបង់ ជាមួយនឹងការគាំទ្រក្រុមចម្រុះមានកម្រិត បន្ទាប់ពីកងទ័ពបរទេសភាគច្រើនបានដកខ្លួនចេញពីប្រទេសអាហ្វហ្គានីស្ថាន នៅក្នុងឆ្នាំ២០១៤ នៅពេលដែលប្រតិបត្តិការប្រយុទ្ធរបស់អង្គការណាតូបានបញ្ចប់។
ក្រុមបះបោរឥស្លាមមួយនេះបានរៀបចំឡើងវិញ ចាប់តាំងពីត្រូវបានបណ្តេញចេញពីអំណាចដោយក្រុមចម្រុះដែលដឹកនាំដោយអាមេរិក នៅក្នុងឆ្នាំ២០០១ ដោយទទួលបានទឹកដីនៅតាមតំបន់ជនបទ និងការគំរាមកំហែងមួយយ៉ាងខ្លីនៅទីក្រុងដ៏សំខាន់មួយនៅក្នុងភាគខាងជើង។
អង្គការបស្ចិមប្រទេសមួយដែលតាមដានឧប្បត្តិហេតុសន្ដិសុខបានរាយការណ៍ថាសកម្ម ភាពរបស់ក្រុមប្រឆាំងបានកើនឡើងដល់កម្រិត “មិនធ្លាប់មានពីមុនមក” នៅក្នុងរយៈពេលប្រាំមួយខែដំបូងនៃឆ្នាំ២០១៥។
ខ្លួនបានកត់ត្រាថា ឧប្បត្តិហេតុជាង៩,៦០០ លើក គឺពាក់ព័ន្ធទៅនឹងក្រុមប្រឆាំងប្រដាប់អាវុធ។ ជនស៊ីវិលអាហ្វហ្គានីស្ថាន ជាញឹកញាប់ត្រូវបានទទួលរងនៅក្នុងការបាញ់តគ្នា ហើយអំពើហិង្សាក៏បានធ្វើឲ្យប្រជាជនមានបញ្ហាធ្ងន់ផងដែរ។
បើយោងតាមអង្គការសហប្រជាជាតិបានឲ្យដឹងថា នៅក្នុងឆ្នាំ២០១៤ មនុស្សជាង ១០,០០០ នាក់ ត្រូវបានសម្លាប់ឬរងរបួស៕
Reuters
ក្រុមតាលីបង់ វាយយកបានមូលដ្ឋានប៉ូលិសអាហ្វហ្គានីស្ថាន
0 Comments