ស្ទឹងត្រែង ៖ បទល្មើសនេសាទនៅតាមតំបន់ហាមឃាត់ ត្រូវបានសហគមន៍នេសាទឃុំអូរស្វាយចុះបង្ក្រាប និងរឹបអូសបានមងក្រឡាញឹកជាង១.០០០ម៉ែត្រ ធ្វើការដុតកម្ទេចចោលនៅហ្នឹងកន្លែងហើយសំណូមពរបន្ថែមដល់ខណ្ឌរដ្ឋបាលជលផលជួយធ្វើការទប់ស្កាត់ ពីព្រោះជនល្មើសមិនខ្លាចក្រែងដល់មន្ត្រីសហគមន៍ឡើយ។
សហគមន៍នេសាទឃុំអូរស្វាយបានចុះបង្ក្រាបបទល្មើសនេសាទរយៈពេល៣ថ្ងៃ ចាប់ពីថ្ងៃទី២៦ ដល់២៨ ខែកក្កដានេះ លោក អ៊ឹម ធឿន ប្រធានសហគមន៍នេសាទព្រះសាខន ឃុំអូរស្វាយស្រុកថាឡាបរិវ៉ាត់បានបញ្ជាក់ថា បន្ទាប់ពីបានធ្វើការដុតកម្ទេចចោលនូវឧបករណ៍នេសាទខុសច្បាប់ និងអប់រំអ្នកប្រព្រឹត្តខុស ស្ដីពីច្បាប់ជលផលនោះ បទល្មើសទាំងនេះនៅតែបន្តមាន ទប់ស្កាត់មិនឈ្នះ ក្នុងរដូវបិទនេសាទនេះ ធ្វើឲ្យពូជត្រីសំខាន់ៗរងទៅនឹងការផុតពូជ។
លោកប្រធានសហគមន៍បញ្ជាក់ថា ពូជត្រីសំខាន់នៅទន្លេមេគង្គលើ មានត្រីខ្លា ត្រីរមាស ត្រីអំបូង ត្រីខ្សា ត្រីស្ទក់ ត្រីត្រសក់ ត្រីប៉ាសេអ៊ី ត្រីក្រាយ ត្រីក្របី ត្រីត្រម៉ម ត្រីត្រចៀកដំរី ត្រីនាគ ត្រីបបែលយក្ស ដែលធ្លាប់សំបូរបែបនៅខេត្តស្ទឹងត្រែង បច្ចុប្បន្នកំពុងប្រឈមទៅនឹងការបាត់បង់ដូចនេះ ស្នើឲ្យផ្នែកជលផលខេត្តជួយពង្រឹងការងារទប់ស្កាត់ឲ្យបានសកម្មបន្ថែមទៀត។
លោក ឌៀប បូរ៉ា នាយរងខណ្ឌរដ្ឋបាលជលផលស្ទឹងត្រែងបានបញ្ជាក់ថា ខេត្តស្ទឹងត្រែងមានអន្លង់អភិរក្ស និងតំបន់ហាមឃាត់ជាច្រើន ហើយកម្លាំងជលផលមានគ្នាតិច បច្ចុប្បន្នយើងបានសហការជាមួយកម្លាំងបរិស្ថានអនុរក្សសហគមន៍នេសាទ និងអាជ្ញាធរភូមិ/ឃុំចុះធ្វើការប្រមាញ់នៅតាមទីកន្លែងសំខាន់ៗ ចំណែកសហគមន៍ធ្វើនៅតាមដែននេសាទរបស់ខ្លួនមិនថាយប់ថ្ងៃឡើយ។
លោកនាយរងខណ្ឌបានអះអាងថា ច្បាប់បិទនេសាទផ្សព្វផ្សាយបានទូលំទូលាយដល់ប្រជាពលរដ្ឋ តែជនល្មើសមួយចំនួននៅតែលួចប្រព្រឹត្ត ហើយសកម្មភាពកម្លាំងសមត្ថកិច្ចបង្ក្រាប ដោយមិនមានការយោគយល់ទេ ខាងខណ្ឌរដ្ឋបាលជលផលហាមមិនឲ្យនេសាទនៅក្នុងអន្លង់អភិរក្ស បើសិនជាមានបទល្មើសនេសាទពេលកើតឡើងនៅតំបន់ការពារ និងនៅតំបន់អភិរក្ស គឺថា ខណ្ឌរដ្ឋបាលជលផល សហការជាមួយនឹងអាជ្ញាធរដែនដី គឺថាមិនលើកលែងទោសឲ្យទេ ខែ១មកដល់ខែ៧យើង ខណ្ឌរដ្ឋបាលជលផលបានចាប់ពួកឆក់ត្រីបាន៧នាក់ហើយ និងគប់គ្រាប់បែកបាន២នាក់ ហើយក៏បានបញ្ជូនសំណុំរឿងទៅតុលាការដាក់ទណ្ឌកម្មទៅតាមច្បាប់ស្ដីពីជលផល។
សូមបញ្ជាក់ថា ទន្លេមេគង្គលើពីខេត្តក្រចេះ មកខេត្តស្ទឹងត្រែង ដល់ព្រំប្រទេសប្រទេសឡាវមានប្រវែងជិត២០០គីឡូម៉ែត្រ មានអន្លង់អភិរក្សពូជត្រីចំនួន១៧អន្លង់ ផ្សោតចំនួន៤ និងតំបន់ហាមឃាត់ មិនឲ្យធ្វើនេសាទចំនួន៥ ក្នុងនោះមាននៅក្នុងស្រុកថាឡាបរិវ៉ាត់ ស្រុកសៀម បូកនឹងស្រុកសេសាន៕
សហគមន៍នេសាទខេត្តស្ទឹងត្រែង បង្ក្រាបបទល្មើសនេសាទ
0 Comments