ភ្នំពេញ ៖ ប្រភពព័ត៌មានថ្លែងថា បុរសម្នាក់ជាមេល្បែងកាស៊ីណូឆ្នោតឡូតូ ភ្នាល់បាល់ ភ្នាល់តាមអនឡាញ និងល្បែងភ្នាល់គ្រប់ប្រភេទ យីហោ ភីភីណេត ត្រូវបានលោកស្រី ថ្លាង ផាណែត ចៅក្រមជំនុំជម្រះសាលាដំបូងរាជធានីភ្នំពេញ សម្រេចកាលពីល្ងាចថ្ងៃទី៣០ ខែកក្កដា ឆ្នាំ២០១៥ ប្រកាសសាលក្រមផ្ដន្ទាទោសមួយឆ្នាំ តែទោសនេះត្រូវព្យួរទាំងអស់ ពោលគឺមេល្បែងរូបនេះត្រូវដោះលែងឱ្យមានសេរីភាពវិញភ្លាមៗ។ មជ្ឈដ្ឋានមួយចំនួនរិះគន់ធ្ងន់ៗថា គោលនយោបាយភូមិ/ឃុំមានសុវត្ថិភាពពុំអាចអនុវត្តបានប្រសិទ្ធភាពឡើយ ប្រសិនបើមេល្បែងដ៏ធំ ត្រូវបានដោះលែងងាយៗបែបនេះ។
មេល្បែងរូបនេះឈ្មោះ ថូ វិចិត្រ ភេទប្រុស អាយុ៣៤ឆ្នាំ អាសយដ្ឋានបច្ចុប្បន្នផ្ទះលេខ២១ DE0 សង្កាត់ផ្សារចាស់ ខណ្ឌដូនពេញ ត្រូវបានសមត្ថកិច្ចនាយកដ្ឋានសន្តិសុខផ្ទៃក្នុងក្រសួងមហាផ្ទៃ ឃាត់ខ្លួនកាលពី២៧ ខែកក្កដា ឆ្នាំ២០១៥ នៅផ្ទះលេខ១២១Eo ផ្លូវ៦៣ កែង២២២ សង្កាត់បឹងរាំង ខណ្ឌដូនពេញ រាជធានីភ្នំពេញ។
មន្ត្រីនគរបាលនៃនាយកដ្ឋានសន្តិសុខផ្ទៃក្នុងបានឲ្យដឹងថា ក្នុងប្រតិបត្តិការនេះដែរ សមត្ថកិច្ចបានដកហូតវត្ថុតាងមួយចំនួនដូចជា ប្រាក់រៀលចំនួន៥,៥៧៧,០០០រៀល (ប្រាំលានប្រាំសែនប្រាំពីរម៉ឺនប្រាំពីរពាន់រៀល), ប្រាក់ដុល្លារចំនួន២,០២១ដុល្លារ (ពីរពាន់ម្ភៃមួយដុល្លារអាមេរិក), កុំព្យូទ័រចំនួន ២៨គ្រឿង, សៀវភៅបញ្ជីចំនួន០៧ក្បាល, វិញ្ញាបនបត្របើកអាជីវកម្មសាលបម្រើសេវាអ៊ីនធឺណិតកាហ្វេលេខ០១៩៨ភ.ព ចុះថ្ងៃទី០២ ខែកក្កដា ឆ្នាំ២០១៥ របស់បញ្ញត្តិករទូរគមនាគមន៍កម្ពុជាចំនួន ០១សន្លឹក, ទូរទស្សន៍ចំនួន០២គ្រឿង, ម៉ូតូចំនួន០៣គ្រឿង,ក្បាល DVR ចំនួន០១គ្រឿង និងកាមេរ៉ាចាប់រូបភាពចំនួន០៥គ្រឿង៕
មេល្បែងONLINE ដ៏ធំ យីហោភីភីណេត ត្រូវបានលោកស្រីចៅក្រម ថ្លាង ផាណែត ដោះលែង
0 Comments