ភ្នំពេញ ៖ បន្ទាប់ពីស្ងប់ស្ងាត់ការងារសិល្បៈមួយដង្ហើមចង្រិតនោះ ពេលនេះតារាសំដែងស្រីរាងតូចច្រឡឹងនៅ សូនីតាកំពុងតែក្តោបបានឱកាសជាថ្មីតាមរយៈការអត្ថាធិប្បាយ ជាពិធីការិនីនៅស្ថានីយទូរទស្សន៍ETVដែលជាទូរទស្សន៍កំសាន្តថ្មីមួយកំពុងពេញនិយម នៅប្រទេសកម្ពុជានោះ។
តាមរយៈការបង្ហាញវត្តមានជាថ្មីរបស់តារាសិល្បៈដ៏ស្រស់សោភាកញ្ញានៅ សូនីតានៅក្នុងកម្មវិធី«តន្ត្រីមហាគគ្រួសារ KAP» របស់ទូរទស្សន៍ ETVដែលមានដៃគូពិធីករលោកប៉ែន ចំរ៉ុងនោះមិនយូរមិនឆាប់នាងអាចនឹងស្តារបាននៅប្រជាប្រិយភាព និងការគាំទ្រច្រើនជាក់ជាមិនខាន។ នៅ សូនីតានិយាយបញ្ជាក់ថា បន្ទាប់ពីចូលដល់ឆ្នាំថ្មីឆ្នាំ២០១៥ភ្លាមការងារសិល្បៈរបស់នាងកាន់តែរវល់ស្ទើរតែរកពេលសម្រាកគ្មានទាំងការងសំដែង ដើរម៉ូដ និងការងារជាពិធីការិនីនៅកម្មវិធីប៉ុស្តិ៍ទូរទស្សន៍។ ចំណែករឿងរ៉ាវមនោសញ្ចេតនាស្នេហាវិញមិនទាន់ចង់គិតនោះទេ ស្របពេលដែលអាជីពសិល្បៈកំពុងរលូននោះ។
តារាសិល្បៈស្រីរូបនេះនិយាយទៀតថា មួយរយៈពេលខ្លី នៃការខកខានមិនទទួលការងារសិល្បៈកន្លងមកនេះដោយសារតែនាងគម្រោងទៅសំដែងនៅប្រទេសអូស្ត្រាលី ក៏ប៉ុន្តែត្រូវពន្យារពេលទៅវិញដោយសារតែខាងស្ថានទូតគេរឹតបន្តឹងចំពោះសិល្បករខ្មែរ ដែលចេញទៅអូស្ត្រាលី ខណៈដែលអ្នកសិល្បៈខ្មែរមួយចំនួនចេញទៅសំដែងហើយមិនបានវិលមកវិញតាមការកំណត់នោះ។ ចំពោះតំណែងថ្មីជាពិធីការិនីនៅទូរទស្សន៍ETV នេះនាងមានក្តីរំពឹងទុកថា នឹងទទួលបាននៅភាពជោគជ័យនិងមានការគាំទ្រច្រើន ពីព្រោះកន្លងមកនាងក៏ធ្លាប់មានបទពិសោធន៍ធ្វើការក្នុងកម្មវិធីTop teen Concertរបស់ទូរទស្សន៍ ប៉ុស្តិ៍លេខ៥ផងដែរ។
កញ្ញានៅ សូនីតានិយាយទៀតថា បើទោះបីជាសមត្ថភាពសិល្បៈរបស់នាងនៅមានកំរិត ក៏ប៉ុន្តែការមកធ្វើជាពិធីការិនីនៅទូរទស្សន៍ថ្មីនេះនាងមិនមានការព្រួយបារម្ភនោះឡើយ នេះក៏ព្រោះតែមានដៃគូលោកប៉ែន ចំ រ៉ុងដែលជាពិធីករជើងចាស់នោះនាងកាន់តែមានទំនុកចិត្តនិងក៏ជាឱកាសដុះខាត់អាជីពសិល្បៈមួយនេះកាន់តែរលូនទៅមុខផងដែរ។ ចំណែកឯរឿងរ៉ាវមនោសញ្ចេតនាស្នេហាវិញត្រូវបានតារាសិល្បៈនៅ សូនីតាលើកឡើងថា នៅមិនទាន់មាននៅឡើយបើទោះបីជាកន្លងមកធ្លាប់ត្រូវបានអ្នកសិល្បៈរួមអាជីពទម្លាយថា មានភ្ជាប់ទំនាក់ទំនងជាមួយបុរសៗក្នុងស្រុកនិងក្រៅស្រុកក្តី។ នាងនិយាយបញ្ជាក់ទៀតថា «ពេលនេះនៅមិនទាន់មានបុរសណាម្នាក់លាក់ទុកក្នុងចិត្តនៅឡើយ ហើយនាងក៏មិនទាន់ចង់គិតរឿងគូស្រករនៅពេលនេះដែរ ខណៈដែលអាជីពសិល្បៈកំពុងតែដំណើរការទៅមុខនោះ»៕
នៅសូនីតាមិនទាន់គិតរឿងស្នេហា ស្របពេលដែលអាជីពសិល្បៈកំពុងរលូន
0 Comments