ស្ទឹងត្រែង ៖ រថយន្តតសាំយ៉ុងដឹកឈើចំនួន២គ្រឿងចេញពីស្រុកសៀមប៉ាងមួយគ្រឿងត្រូវបានក្រឡាប់នៅលើកំណាត់ផ្លូវជាតិលេខ៧និងមួយគ្រឿងទៀតត្រូវបានអាវុធហត្ថស្នាក់ការ៧៤៧បង្ក្រាបខណៈដែលរថយន្តនេះលបលួចដឹកឈើប្រណិតប្រភេទធ្នង់ឆ្ពោះទៅកាន់ទីរួមខេត្តស្ទឹងត្រែង។
រថយន្តសាំយ៉ុងមួយគ្រឿងបានក្រឡាប់នៅយប់រំលងអធ្រាត្រ ថ្ងៃទី២៤ខែសីហានៅចំណុចភូមិគីឡូប្រាំបីក្នុងសង្កាត់សាមគ្គីនិងមួយគ្រឿងទៀតត្រូវបានអាវុធហត្ថស្នាក់ការ៧៤៧ធ្វើការបង្ក្រាបកាលពីវេលាម៉ោង៩និង៣០នាយប់ថ្ងៃទី២៣ ខែសីហា ឆ្នាំ២០១៥នៅចំណុចមុខស្នាក់ការអាវុធហត្ថ ស្ថិតក្នុងសង្កាត់សាមគ្គី ក្រុងស្ទឹងត្រែង។
ប្រភពពីសមត្ថកិច្ចបានឲ្យដឹងថា រថយន្តដឹកឈើក្រឡាប់ម៉ាកសាំយ៉ុង ពណ៌សគ្មានស្លាកលេខដឹកឈើប្រណិតប្រភេទធ្នង់ បេង មេទ្វា និងសន្លឹកទ្វារមកដល់កើតហេតុបានបែកកង់ក្រឡាប់តែម្តង តែមិនបានមានមនុស្សគ្រោះថ្នាក់។ ចំណែករថយន្តសាំយ៉ុងមួយគ្រឿងទៀតដែលអាវុធហត្ថបង្ក្រាបក៏ជាប្រភេទរថយន្តសាំយ៉ុងដូចគ្នា ពណ៌ទឹកប្រាក់ គ្មានស្លាកលេខ ដឹកឈើកន្លះរថយន្តជាប្រភេទឈើសន្លឹកនិងជាឈើប្រណិតដូចគ្នា ក្រោយកើតហេតុម្ចាស់រថយន្តបានរត់គេចខ្លួនបាត់បន្សល់តែវត្ថុតាងតែប៉ុណ្ណោះ។
ប្រភពបានបន្តថា ក្រោយពេលរថយន្តដឹកឈើក្រឡាប់ នៅពេលយប់នោះគេពុំឃើញមានសមត្ថកិច្ចណាចុះមកពិនិត្យនោះទេ ឈើដែលនៅក្នុងឡានត្រូវបានម្ចាស់ឈើយករថយន្តមួយគ្រឿងទៀតសាងនៅសល់តែតិចតួចតែប៉ុណ្ណោះ ព្រឹកឡើងទើបប៉ូសិសចរាចរមក តែមិនត្រូវបាននាំយករថយន្តនោះទៅកាន់ស្នងការទេ ត្រូវបានម្ចាស់យករថយន្តស្ទូចយកទៅធ្វើការជួសជុលដោយខ្លួនឯង។ ចំណែករថយន្តមួយគ្រឿងទៀត ដែលអាវុធហត្ថបង្ក្រាបនៅព្រឹកថ្ងៃទី២៤សីហានេះ ត្រូវបានកម្លាំងអាវុធហត្ថធ្វើកំណត់ហេតុប្រគល់ទៅឲ្យជំនាញរដ្ឋបាលព្រៃឈើខេត្តដើម្បីចាត់ការបន្តតាមនីតិវិធីច្បាប់៕
រថយន្តសាំយ៉ុងដឹកឈើ២គ្រឿង១គ្រឿងក្រឡាប់និងមួយគ្រឿងទៀតត្រូវបានអាវុធហត្ថបង្ក្រាប
0 Comments