បាត់ដំបង ៖ រូបសំណាកឥន្ទ្រទេវី ដែលត្រូវបានកសាងឡើងក្នុងពស 2554 និងទុកជាទីសក្ការៈនៅចំកណ្តាលសួនលោកស ខេង និងនៅចំកណ្តាលក្រុងបាត់ដំបង ត្រូវបានជនមិនស្គាល់មុខយកធ្យូងទៅគូសវាស ផាត់ពណ៌ នៅលើផ្ទៃមុខយ៉ាងអាក្រក់មើលជាទីបំផុត នៅក្នុងខណៈដែលអាជ្ញាធរ និងសមត្ថកិច្ចក្រុងបាត់ដំបងកំពុងដេកលក់ និងអសកម្ម។
គួរបញ្ជាក់ដែរថា រយៈពេលប៉ុន្មានឆ្នាំមកហើយ ដែលនៅតាមបណ្តាសួននានាក្នុងក្រុងបាត់ដំបងត្រូវបានអាជ្ញាធរខេត្ត ក្រុងកសាងជារូបសំណាកផ្សេងៗ ដែលសុទ្ធសឹងជារូបអ្នកមានបារមីកាលពីសម័យដើម ក្នុងគោលបំណងឲ្យក្មេងជំនាន់ក្រោយបានស្គាល់ និងបានយល់ដឹងអំពីប្រវត្តិអ្នកមានបារមីទាំងនោះ ព្រមទាំងទុកសម្រាប់ធ្វើជាទីសក្ការៈនៅតាមទីសាធារណៈថែមទៀតផង។
ថ្មីៗនេះស្រាប់តែរូបសំណាក ឥន្ទ្រទេវី បានប្រែមុខមាត់យ៉ាងអាក្រក់ជាទីបំផុត ដោយសារតែមានជនមិនស្គាល់មុខ បានយកធ្យូងទៅគូសនៅលើចិញ្ចើម ត្របកភ្នែក និងបបូរមាត់ ដែលមើលទៅមានសភាពប្រតេកប្រតាក អាក្រក់ក្រៃលែងបីដូចជារូបសំណាក ឥន្ទ្រទេវី កំពុងតែសម្រក់ទឹកភ្នែកយ៉ាងដូច្នេះដែរព្រោះទឹកដៃនៃអ្នកដែលបានគូសវាសនេះមិនមែនជាវិចិត្រករនោះឡើយ ហើយម្យ៉ាងវិញទៀតរូបសំណាកដែលគេកសាងឡើងនេះគឺត្រូវរក្សាទុកនូវពណ៌ថ្មធម្មជាតិតែប៉ុណ្ណោះដោយមិនត្រូវការតុបតែង ឬផាត់ពណ៌បន្ថែមទៀតឡើយ។
បញ្ហាដែលកើតឡើងនេះគឺជាការឆកល្វែងមួយយ៉ាងធ្ងន់ធ្ងរបំផុតរបស់អាជ្ញាធរ ក៏ដូចជាសមត្ថកិច្ចព្រោះរូបសំណាកនេះត្រូវបានកសាងឡើងនៅចំកណ្តាលសួនសាធារណ: ដោយមិនមានការលាក់បំពួននៅទីកំបាំងណាមួយឡើយ ដូច្នេះហើយបានជាមានមជ្ឈដ្ឋានជាច្រើន ពិសេសអស់លោកមន្ត្រីរាជការ និងប្រជាពលរដ្ឋដែលនិយមចូលចិត្តហាត់ប្រាណនៅលើសួននេះ បានធ្វើការរិះគន់យ៉ាងខ្លាំង ដោយសារតែពួកគាត់បានមើលឃើញនូវរូបសំណាកនេះពោរពេញដោយភាពរញ៉េរញ៉ៃនៅលើទម្រង់មុខរបស់ ឥន្ទ្រទេវី ដោយម្នាក់ៗបានលើកជាសំណួរសួរថា តើសមត្ថកិច្ច និងអាជ្ញាធរបាត់ទៅណាអស់ ឬក៏គេមិនចាប់អារម្មណ៍ទៅលើការការពារនូវសម្មិទ្ធផលនានាដែលបានកសាងហើយនោះទេ បានជាទុកបណ្តោយឲ្យមានជនអនាមិកធ្វើការគូសវាសពេញផ្ទៃមុខបែបនេះ?
រាល់ការរិះគន់ពីមជ្ឈដ្ឋាននានាខាងលើ គួរណាស់តែអាជ្ញាធរក៏ដូចជាសមត្ថកិច្ច ធ្វើការត្រួតពិនិត្យឡើងវិញនៅត្រង់ចំណុចនេះ ព្រោះវាអាចប៉ះពាល់ដល់កិត្តិយសនៃរូបសំណាកបុព្វបុរសកាលពីសម័យដើមផង ព្រមទាំងអាចប៉ះពាល់ដល់ភ្នែកអ្នកផងទាំងឡាយ ពិសេសពីសំណាក់ភ្ញៀវបរទេសដែលបានដើរទស្សនានៅក្នុងក្រុងបាត់ដំបងនេះផង៕
រូបសំណាកឥន្ទ្រទេវី ត្រូវជនអនាមិកផាត់ពណ៌មុខយ៉ាងអនាធិបតេយ្យ
0 Comments