ថ្វីត្បិតតែការបោះឆ្នោតសកលអាណត្តិទី៦ ហាក់បីដូចជានៅឆ្ងាយសន្លឹមក៏ពិតមែន ប៉ុន្តែដំណើរឆ្ពោះទៅរកការដណ្ដើមអំណាចក្នុងការបោះឆ្នោត បាន និងកំពុងតែលេចចេញជារូបរាងទៅហើយក្នុងពេលបច្ចុប្បន្ននេះ តាមរយៈការបង្កើតគណបក្សនយោបាយជាច្រើន។ ដោយមិនរាប់ពីគណបក្សនយោបាយដែលមានរួចមកហើយ និងធ្លាប់បានចូលរួមប្រកួតប្រជែងក្នុងការបោះឆ្នោត យ៉ាងហោចណាស់ក៏មានគណបក្សនយោបាយចំនួន៣ដែរ ដែលត្រូវបានមហាជនមើលឃើញថា កំពុងត្រៀមខ្លួនក្នុងការចូលរួមក្នុងល្បែងនយោបាយនេះ។
គណបក្សទាំង៣នោះមានដូចជា គណបក្សប្រជាធិបតេយ្យមូលដ្ឋាន ដឹកនាំដោយលោក យ៉ង សាំងកុមារ ដែលប្រកាសថាខ្លួននឹងជួបជុំសមាជិករបស់ខ្លួន នៅព្រឹកថ្ងៃទី២ ខែសីហា ឆ្នាំ២០១៥ ដើម្បីប្រាប់ពីគោលការណ៍ក្នុងការបង្កើតនេះ។ ឯគណបក្សចំនួន២ទៀត គឺគណបក្សសំបុកឃ្មុំសង្គមប្រជាធិបតេយ្យរបស់គណបក្សលោកតា ម៉ម សូណង់ដូ និងគណបក្សអំណាចប្រជាពលរដ្ឋរបស់លោក សួន សេរីរដ្ឋា ដែលទើបត្រូវបានព្រះករុណាព្រះមហាក្សត្រប្រោសព្រះរាជទានលើកលែងទោសកាលពីពេលថ្មីៗនេះ។
ជាការពិតណាស់ ការបង្កើតជាគណបក្សនយោបាយ ដើម្បីចូលរួមការប្រកួតប្រជែងក្នុងការបោះឆ្នោត វាពិតជាបានបង្ហាញពីមហិច្ឆតា នៃការដឹកនាំប្រទេសទៅតាមគោលនយោបាយរបស់គណបក្ស ឬរបស់បុគ្គល ដែលនៅមុនការបោះឆ្នោត គេតែងតែដើរឃោសនាអំពីភាពល្អប្រសើរ នៃការដឹកនាំរបស់ខ្លួន ដើម្បីដឹកនាំប្រទេសឱ្យមានការរីកចម្រើន ឱ្យមានសុខសន្តិភាព ស្ថិរភាពទាំងនយោបាយ សណ្ដាប់ធ្នាប់សាធារណៈល្អប្រសើរ រួមទាំងស្ថិរភាពម៉ាក្រូសេដ្ឋកិច្ច បើទោះបីជា គណបក្សនោះ ឬបុគ្គលនោះបានដឹងយ៉ាងច្បាស់ថាខ្លួនមិនអាចធ្វើបាន ឬអាចនិយាយ ម្យ៉ាងទៀត គ្រាន់តែជាការភូតភរកុហកដើម្បីសន្លឹកឆ្នោតក្តី។ ប៉ុន្តែអ្វីដែលជ្រាលជ្រៅជាងនេះទៀតនោះ គឺថាការបង្កើតគណបក្សនយោបាយកាន់តែច្រើនឡើងៗជាបន្តបន្ទាប់ បានបង្ហាញពីភាពរីកចម្រើននៃសេរីភាពក្នុងការបញ្ចេញមតិ និងលទ្ធិប្រជាធិបតេយ្យនៅកម្ពុជានោះឯង។
លទ្ធិប្រជាធិបតេយ្យនៅកម្ពុជាបានចាប់ពន្លកនៅក្នុងឆ្នាំ១៩៩៣ គឺជាពេលដែលព្រះរាជាណាចក្រទី២ចាប់បដិសន្ធិឡើងវិញ ក្រោមកិច្ចខិតខំប្រឹងប្រែងរបស់គណបក្សប្រជាជនកម្ពុជា បន្ទាប់ពីត្រូវបានលោក លន់ នល់ ដែលមានការគាំទ្រដោយសហរដ្ឋអាមេរិកបានកម្ទេចចោលនៅក្នុងរដ្ឋប្រហារនៅឆ្នាំ១៩៧០។ ពិតណាស់ ដើម្បីមហិច្ឆតាអំណាចទាំងងងឹតងងល់ បន្ទាប់ពីបានចាប់ពន្លកលទ្ធិប្រជាធិបតេយ្យនៅកម្ពុជា តែងតែត្រូវបានមនុស្សខ្មែរមួយចំនួន និងពួកបរទេសមួយចំនួនព្យាយាមក្ដិចត្រួយ និងកាច់បំបាក់ ដោយបានប្រើប្រាស់គ្រប់ឧបាយកល និងគ្មានការអៀនខ្មាស ក្នុងការបំភ័ន្តសាធារណមតិជាតិ និងអន្តរជាតិ ក្រោមលេសថា កម្ពុជា ឬរាជរដ្ឋាភិបាលកម្ពុជាបានបំបិទសិទ្ធិសេរីភាពក្នុងការនិយាយ ការធ្វើសកម្មភាពក្នុងការតវ៉ា ការទាមទារផ្សេងៗគ្មានការអនុញ្ញាត ហើយជួនកាលនាំទៅដល់ការបង្កអរិយភាពជាមួយប្រទេសជិតខាងយ៉ាងណាក្តី។
យ៉ាងណាក៏ដោយ មកដល់ឆ្នាំ២០១៥នេះ លទ្ធិប្រជាធិបតេយ្យនៅកម្ពុជា ត្រូវបានប្រទេសជាមិត្តជាច្រើនទទួលស្គាល់ថា បាន និងកំពុងបោះជំហានទៅមុខយ៉ាងលឿនលយ ជាមួយនឹងការខិតខំប្រឹងប្រែងដោយឥតសំចៃជាបន្តបន្ទាប់ របស់រាជរដ្ឋាភិបាលក្នុងការពង្រឹង និងពង្រីកនូវរាល់សកម្មភាពរបស់ខ្លួន ដែលនៅតែទទួលបាននូវការគាំទ្រពីសំណាក់ប្រជាពលរដ្ឋ ដែលបាន និងកំពុងទទួលផលប្រយោជន៍ដោយផ្ទាល់ពីការដឹកនាំរបស់គណបក្សកាន់អំណាច ហើយការព្យាយាមបំភ្លៃសភាពការណ៍ពិតរបស់កម្ពុជាតាំងពីអតីតកាល បច្ចុប្បន្នកាល និងទៅអនាគត វាគ្រាន់តែស្ថិតនៅក្នុងពាក្យទំនៀមខ្មែរ ដែលនិយាយថា «ឆ្កែចេះតែព្រូស មនុស្សចេះតែដើរ» តែប៉ុណ្ណោះ៕
ទស្សនៈស្មេរ ៖ ការបង្កើតឡើងគណបក្សនយោបាយថ្មី ជាការបង្ហាញនូវភាពរីកចម្រើនលទ្ធិប្រជាធិបតេយ្យនៅកម្ពុជា
0 Comments