វិធី​ដ៏​ត្រឹមត្រូវ​ ដើម្បី​បញ្ឈប់​អាការៈ​ហូរ​ឈាម​តាម​ច្រមុះ

នោះ​ប្រហែល​ជា​សភាវគតិ​ពី​ធម្មជាតិ​របស់​អ្នក​ហើយ ដែល​ងើយក្បាល​ទៅខាង​ក្រោយ​ ខណៈ​ពេល​អ្នក​កើត​មានអាការៈ​ហូរ​ឈាម​តាម​ច្រមុះ​នោះ។ ប៉ុន្ដែ​វា​មិន​មែន​មាន​របៀប​ដែល​​ធ្វើ​យ៉ាង​ដូច្នេះ​តែ​ម្យ៉ាង​នោះទេ ហើយ​លើស​ពី​នេះ​ទៅ​ទៀត​ វា​អាច​កើត​មាន​គ្រោះថ្នាក់​ទៅវិញទេ។ នេះ​ជាការ​លើក​ឡើង​ដោយ​ក្រុមអ្នក​ជំនាញ​ការ​​ឯក​ទេស។

នោះ​ក៏ដោយសារ​តែធ្វើ​ឲ្យ​ឈាម​ត្រូវ​ហូរ​ធ្លាក់​ចូលទៅតាម​បំពង់ក (បំពង់អាហារ) របស់អ្នក​ដែលនាំ​ឲ្យ​បំផ្លាញ​អន្ដរាយ​ដល់​រូបកាយ​របស់​អ្នក​ថែមទៀត​ផង។ នេះ​ជាការ​លើកឡើង​ដោយ​​លោក Jeffrey Suh សាស្ដ្រាចារ្យ​ផ្នែកវះកាត់​​​ផ្នែកបំពង់ក នៅ​ឯសាកលវិទ្យាល័យ​ David Geffen School of Medicine University of California ក្រុង Los Angeles។

ប្រសិនបើ​លំហូរ​របស់ឈាម​នោះ​ វា​កាន់​តែ​ច្រើន​ ហើយធ្លាក់ចូលទៅក្នុង​ក្រពះ​របស់អ្នក​ វា​អាច​បណ្ដាល​ឲ្យ​អ្នក​ក្អួត​ចង្អោរ​ចេញមកវិញ​បាន។

ម្យ៉ាង​ទៀត​ឈាមនោះ អាចបណ្ដាល​ឲ្យ​ប៉ះ ពាល់​ដល់​​សួត​របស់​អ្នក ប្រសិន​បើ​វា​ជ្រៀត​ចូល​ទៅ​តាមបំពង់​ខ្យល់ដង្ហើម​ ដែលនាំ​ឲ្យ​កើត​ទៅ​ជា​ជំងឺ​រលាក​សួត​ ប្រសិន​បើ​ក្នុង​ឈាម​នោះ​មាន​ផ្ទុក​ទៅដោយ​បាក់តេរី​ ដែល​ឆ្លង​ចេញ​មកពី​​បំពង់​ក​របស់អ្នក។

ជា​ជំនួស​មក​វិញ ចូរអ្នក​ប្រើប្រាស់​វិធីសាស្ដ្រ​ដែលពោរពេញ​ទៅដោយ​សុវត្ថិភាព​ គឺ​ចូរ​អ្នក​យក​ម្រាមដៃ​ទៅ​ច្បិច​បិទ​រន្ធ​ច្រមុះពីលើ​ចម្រុះ​ត្រង់​ឆ្អឹង​ខ្ទង់​ច្រមុះ។ ការ​ធ្វើ​យ៉ាង​នេះ​ នាំ​ឲ្យ​មាន​ជា​សម្ពាធ​មួយ​ដើម្បី​សង្កត់​ទៅលើ​សរសៃឈាម​ដែល​នៅក្នុង​រន្ធ​ច្រមុះ ហើយ​ដែលជួយ​ធ្វើ​ឲ្យ​ឈាម​កកយ៉ា​ងឆាប់រហ័ស។ នេះជាកា​រ​លើក​ឡើង​ដោយ​វេជ្ជ​បណ្ឌិត Dr. Jennifer Villwock ផ្នែក​វះកាត់​ច្រមុះ​ ត្រចៀក បំពង់ក នៅ​ឯសាកល​វិទ្យាល័យ​ State University of New York’s Upstate Medical University។ ជា​បន្ទាប់​មក​ទៀត​ ចូរអ្នក​ផ្អៀង​ក្បាល​​ឱន​មក​ខាងមុខ។ មធ្យោបាយ​ដែលធ្វើ​យ៉ាងនេះ នាំ​ឲ្យ​ឈាម​ដែល​មាន​នៅក្នុ​ងច្រមុះ​របស់អ្នក​​រួច​មក​ ហើយ​អាច​ហូរ​ចេញ​មក​ក្រៅ​ទាំង​អស់​ជា​ជាង​ធ្វើ​តាម​ទម្លាប់​ដែល​នាំ​ឲ្យ​វា​ហូរ​បញ្ច្រាស​​ចូល​ទៅក្នុង​បំពង់​ក​នោះ។

ដោយឡែកក្រៅពី​អនុវត្ដ​បាន​យ៉ាង​នេះ​ហើយ​ចូរ​សាក​ល្បង​ប្រើ​ថ្នាំ​ Spray បាញ់​ចូល​ច្រមុះ​ហៅ​ថា decongestant nasal spray ដូច​ជា​ថ្នាំ​ឈ្មោះ Afrin ពេល​ដែល​ឈាម​ចាប់ផ្ដើម​ហូរ​ចេញ​មក​ មុនពេល​អ្នកយក​ម្រាម​ដៃ​ទៅសង្កត់​ពីលើ​ឆ្អឹង​​ខ្ទង់​ច្រមុះ​ពីខាងក្រៅ​ ដើម្បី​ទប់​កុំ​ឲ្យ​​ឈាម​ចេះ​តែ​ហូរ​ចេញមកនោះ។

ភាគច្រើន​ណាស់នៃអាការៈ​ហូរ​ឈាម​តាម​រន្ធ​ច្រមុះ​ វា​អស់​ទៅវិញនៅក្នុង​រយៈពេល​មិន​លើស​ពី​១៥នាទី​ទេ។ ប៉ុន្ដែ​ប្រសិនបើ​អាការៈ​បែប​នេះ​វា​អូសបន្លាយ​ពេល​លើស​ពី​២០នាទី​ហើយ​នោះ ចូរ​អ្នក​ស្វែង​រក​ការ​ជួយ​អន្តរាគមន៍​ពីវេជ្ជ​បណ្ឌិត​​ផ្នែក​ច្រមុះ​ ត្រចៀក បំពង់ក។ វេជ្ជបណ្ឌិត​​ឯក​ទេស​នោះ​អាចជួយ​អ្នក​បាន ​​ដោយ​តម្រូវ​ឲ្យមាន​​ការព្យាបាល​ណាមួយ​ជាជម្រើស​សម្រាប់​អាការៈ​របស់​អ្នក៕

Fox News

 

វិធី​ដ៏​ត្រឹមត្រូវ​ ដើម្បី​បញ្ឈប់​អាការៈ​ហូរ​ឈាម​តាម​ច្រមុះ