លោក Sepp Blatter បាននិយាយថា លោកគឺជាមនុស្សស្អាតស្អំ និងស្មោះត្រង់ម្នាក់ ហើយលោកបាននិយាយយ៉ាងទទូចថា លោកសុខចិត្តចុះចេញពីតំណែងប្រធានសហព័ន្ធបាល់ទាត់ពិភពលោក FIFAគឺចង់ការពារអង្គភាពដែលរងសំពាធខ្លាំងមួយនេះ។
សូមបញ្ជាក់ថា បុរសជនជាតិស្វីសវ័យ៧៩ឆ្នាំម្នាក់នេះ ត្រូវបានគេជ្រើសតាំងជាថ្មីម្តងទៀតសម្រាប់អាណត្តិទី៥របស់លោកជាប្រធាន FIFAកាលពីខែឧសភាកន្លងទៅ ប៉ុន្តែក្រោយមកលោកបែរជាប្រកាសចុះចេញពីតំណែងទៅវិញ។
លោក Sepp Blatter ដែលអ្នកស្នងតំណែងរបស់លោកនឹងត្រូវប្រកាសឲ្យដឹងនៅខែកុម្ភៈខាងមុខនោះ បាននិយាយថា លោកគ្មានអ្វីត្រូវលាក់បាំងនោះទេ ចំពោះការស៊ើបអង្កេតលើការលាងលុយកខ្វក់នោះ។
ថ្លែងប្រាប់ BBCពីការសម្រេចចិត្តចុះចេញពីតំណែង លោក Blatterបាននិយាយថា លោកធ្វើបែបហ្នឹងក៏ដើម្បីការពារ FIFAដែរ។ លោកអាចការពារខ្លួនឯងបាន គឺវាមានន័យថា លោកខ្លាំងណាស់ទៅហើយ។
លោកបានបញ្ជាក់ទៀតថា លោកដឹងច្បាស់ពីអ្វីដែលលោកបានធ្វើ លោកមាននូវសតិសមជញ្ញៈខ្លួនឯង និងលោកដឹងច្បាស់ថា លោកគឺជាមនុស្សស្មោះត្រង់ និងជាមនុស្សស្អាតស្អំម្នាក់។
សូមបញ្ជាក់ថា ការដេញថ្លៃសម្រាប់ការប្រកួតបាល់ទាត់ពិភពលោក World Cup ឆ្នាំ២០១៨នៅក្នុងប្រទេសរុស្ស៊ី និង World Cup ឆ្នាំ២០២២នៅក្នុងប្រទេសកាតា ត្រូវបានគេស៊ើបអង្កេតដោយក្រុមអាជ្ញាធរនៅសហរដ្ឋអាមេរិក និងប្រទេសស្វីស ប៉ុន្តែលោក Blatterនៅតែមានជំនឿចិត្តថា FIFAមិនមែនជាអង្គភាពពុករលួយនោះទេ៕
លោក Sepp Blatter អះអាងថា លោកគឺជាមនុស្សស្មោះត្រង់ និងស្អាតស្អំម្នាក់
0 Comments