ក្រុមបាល់ទាត់ណាហ្គាវើល ត្រូវជួបក្រុមគីរីវង់សុខសែនជ័យ នៅវេលាម៉ោង ៣:៣០ នាទីរសៀលថ្ងៃអាទិត្យ ទី ២ ខែ កក្កដា ឆ្នាំ ២០១៥ នេះលើទីលានបាល់ទាត់មជ្ឍមណ្ឌលនិងសាលាបាល់ទាត់ជាតិបាទី ក្នុងខេត្តតាកែវ នៅវគ្គសន្សំពិន្ទុសប្ដាហ៍ទី ១០ នៃពានរង្វាន់បាល់ទាត់មិត្តហ្វូនខេមបូឌានលីក ២០១៥ (Metfone Cambodian League 2015 ឬ MCL 2015)។
សម្រាប់ក្រុមណាហ្គាវើល ដែលដឹកនាំដោយលោកគ្រូបង្វឹក មាស ចាន់ណា កំពុងតែរងសម្ពាធនៅក្នុងជុំទី១ នេះក្រោយប្រកួតបាន ៩ លើកឈ្នះ ៤ និង ចាញ់ ៥ លើកមាន ១២ ពិន្ទុ ឈរចំណាត់ថ្នាក់លេខ ៧ បណ្ដោះអាសន្ន ក្នុងចំណោមក្រុមទាំង ១។
បើនិយាយពីការប្រកួតកន្លងមកនេះ ណាហ្គា ឈ្នះស្វាយរៀង ១ ទល់ ០ កាលពីថ្ងៃបើកឆាក តែចាញ់ភ្នំពេញក្រោន ៤ ទល់ ២ ហើយឈ្នះអាស៊ីអឺរ៉ុបយូណាធីត ៣ ទល់ ០ ឈ្នះ ក្រុមចំណូលថ្មីស៊ីម៉ាក់ ៣ ទល់ ០ តែចាញ់វេស្ទើនភ្នំពេញ ១ ទល់ ០ ចាញ់អគ្គស្នងការដ្ឋាននគរបាលជាតិ ២ ទល់ ០ ចាញ់បឹងកេតអង្គរ ១ ទល់ ០ ចាញ់ខេមបូឌានថៃហ្គ័រ ២ ទល់ ១ និងចុងក្រោយឈ្នះក្រសួងការពារជាតិ ២ ទល់ ។
កីឡាករល្បីៗក្នុងឈុតជម្រើសជាតិកម្ពុជា មានដូចជា ឃឹម បូរី, គួច សុកុម្ភៈ, ទៀង ទីនី, ប្រាក់ ចាន់រតនា, សុទ្ធតែជាសមាជិករបស់ក្រុមណាហ្គា ស្របពេលកីឡាករជនជាតិហ្គីណេ Alpha Oumar Lelouma Barry រកគ្រាប់បាល់ឱ្យណាហ្គាវើល បានច្រើនជាងគេគឺបាន ៤ គ្រាប់ម្នាក់ឯង។
ចំណែកក្រុមគីរីវង់សុខសែនជ័យ វិញក្រោមការដឹកនាំដោយលោកគ្រូបង្វឹក ផាន់ ចាន់ផាត នៅមិនទាន់ស្គាល់រសជាតិឈ្នះនៅឡើយនោះទេ ក្នុងចំណោម ៩ ប្រកួតមកនេះ ដោយប្រកួតស្មើគ្នាជាមួយស៊ីម៉ាក់ ១ ទល់ ១ តែប្រកួតចាញ់វេស្ទើន ៦ ទល់ ៤ បន្តចាញ់អគ្គស្នងការដ្ឋាននគរបាលជាតិ ៤ ទល់ ១ ហើយចាញ់បឹងកេតអង្គរ យ៉ាងចាស់ដៃ ១២ ទល់ ២ ចាញ់ខេមបូឌានថៃហ្គ័រ ៦ ទល់ ២ ចាញ់ក្រសួងការពារជាតិ ៥ ទល់ ១ ចាញ់ភ្នំពេញក្រោន ៥ ទល់ ២ ចាញ់បៀលប្រាយយូណាធីត ១ ទល់ ០ និង ចាញ់ស្វាយរៀង ២ ទល់ ។
ក្រុមដែលមានមូលដ្ឋាននៅទឹកដីខេត្តតាកែវ មួយនេះកំពុងតែធ្លាក់ទម្រង់ប្រកួតយ៉ាងខ្លាំងបើធៀបនឹងរដូវកាលមុន។ កីឡាករសំខាន់ៗរបស់ក្រុមដូចជា ឯក សុភាព, ឯម ផាន់ណា, ម៉េង សំបូរ, សុច មករា, Suma Mustapha សុទ្ធតែធ្លាប់រកគ្រាប់បាល់ជាប្រចាំនាពេលកន្លងមក។
ចំពោះប្រវត្តិជួបគ្នារវាងណាហ្គាវើល និង គីរីវង់សុខសែនជ័យ រយៈពេល ៣ រដូវកាលចុងក្រោមមកនេះគឺ ណាហ្គាវើលធ្លាប់ឈ្នះ ៣ លើក និង ស្មើគ្នា ចំនួន ៣ លើក។ រដូវកាល ២០១២ ក្រុមទាំង ប្រកួតស្មើគ្នា ០ ទល់ ០ ទាំង២ ជើង តែចូលដល់រដូវកាល ២០១៣ ណាហ្គា យកឈ្នះគីរីវង់សុខសែនជ័យ ១ ទល់ ០ ទាំង ២ ជើង និងរដូវកាល ២០១៤ ចុងក្រោយជើងទី១ ស្មើគ្នា ១ ទល់ ១ តែជើងទី២ ណាហ្គាវើល យកឈ្នះ ៣ ទល់ ១ វិញ។
ក្រៅពីគូរវាងណាហ្គាវើល និង គីរីវង់សុខសែនជ័យ ក៏មានគូប្រកួតមួយគូទៀតដែរត្រូវប្រកួតបញ្ចប់សប្ដាហ៍ទី ១០ ក្នុងពាន MCL 2015 នេះគឺ ក្រុមអាស៊ូអឺរ៉ុបយូណាធីត ត្រូវជួបក្រុមក្រសួងការពារជាតិ នៅវេលាម៉ោង ៣:៣០ នាទីនៅទីលានមជ្ឍមណ្ឌលនិងសាលាបាល់ទាត់ជាតិបាទី ដូចគ្នា៕
ណាហ្គាវើល ជួបក្រុមបាតតារាងគីរីវង់សុខសែនជ័យ នៅបាទី វេលាម៉ោង ៣:៣០ នាទីថ្ងៃអាទិត្យនេះ
0 Comments