តាកែវ ៖ យ៉ាងហោចណាស់កម្មការិនីចំនួន៧នាក់បានរងរបួសធ្ងន់ និងកំពុងជួយសង្គ្រោះបន្ទាន់នៅគ្លីនិកឯកជនមួយកន្លែង នៃហេតុការណ៍គ្រោះថ្នាក់ចរាចរណ៍មួយកាលពីព្រឹកម៉ោង៦និង៣០នាទីថ្ងៃទី២៤ ខែសីហា ឆ្នាំ២០១៥។
គ្រោះថ្នាក់នេះកើតឡើងតាមបណ្ដោយផ្លូវជាតិលេខ៣ ចន្លោះគីឡូម៉ែត្រលេខ៦០-៦១ នៅកណ្ដាលផ្សារថ្នល់បត់ ភូមិពេជ្រចង្វា ឃុំបឹងត្រាញ់ខាងជើង ស្រុកសំរោង ខេត្តតាកែវ។
តាមប្រភពពីប្រជាពលរដ្ឋដែលនៅទីនោះបានឲ្យដឹងថា រថយន្តដែលបង្កគឺម៉ាកហ្វូស៊ោ ពាក់ស្លាកលេខ តាកែវ ៣គ ១១៨១ បើកបរដោយបុរសមិនទាន់ស្គាល់អត្តសញ្ញាណម្នាក់ ក្នុងទិសដៅពីត្បូងមកជើង លុះមកដល់កណ្ដាលផ្សារក៏បានបុកជាមួយនិងរថយន្តកូរ៉េដឹកកម្មកររោងចក្រមួយគ្រឿងពាក់ស្លាកលេខ ដ ៣៧០៦ ភព២ ដែលបើកបរបញ្ច្រាសទិសគ្នាយ៉ាងពេញទំហឹង បណ្ដាលឲ្យកម្មករដែលជិះទាំងប៉ុន្មានរងរបួសធ្ងន់ និងស្រាលជាច្រើននាក់។
បើតាមសម្ដីលោក វង់ ង៉ែត អធិការរងទទួលបន្ទុកសណ្ដាប់ធ្នាប់ចរាចរណ៍ស្រុកសំរោងបានឲ្យដឹងថា អ្នករងរបួសធ្ងន់មានចំនួន៧នាក់ ប៉ុន្តែនៅពេលអ្នកសារព័ត៌មានសួររឿងឃាត់ខ្លួនជនដែលបើករថយន្តបង្ក ស្រាប់តែលោក វង់ ង៉ែត ឆ្លើយថា អ្នកការសែតសួររឿងនេះធ្វើអ្វី? រួចលោកឆ្លើយដូចជាមិនទទួលខុសត្រូវថា ប្រហែលជាកូនចៅលោកឃាត់ខ្លួនបានហើយទេដឹង លោកមិនដឹងទេ។
បច្ចុប្បន្ន អ្នករបួសកំពុងសម្រាកព្យាបាលនៅគ្លីនិកឯកជនក្បែរៗកន្លែងកើតហេតុ ចំណែករថយន្តទាំងពីរត្រូវបានវាស់វែង និងកំពុងដោះស្រាយគ្នា៕
គ្រោះថ្នាក់ចរាចរណ៍រវាងរថយន្តយីឌុប បុករថយន្តដឹកកម្មកររោងចក្រ ស្ថិតភាពមិនប្រក្រតី
0 Comments