ស្ទឹងត្រែង ៖ កសិករនៅឃុំស្រែក្រសាំងស្រុកសៀមបូក មិនត្រឹមតែបានជួបនូវបញ្ហាកង្វល់ទៅលើការងារបង្កបង្កើនផលដំណាំស្រូវ ដោយសារការប្រែប្រួលអាកាសធាតុប៉ុណ្ណោះទេ ប៉ុន្តែថែមទាំងមានសត្វខ្យងកាត់បំផ្លាញស្រូវបន្ថែមទៀតបញ្ហានេះកសិករស្នើឲ្យអាជ្ញាធរខេត្តនិងមន្ទីរកសិកម្មជួយអន្តរាគមន៍ជាបន្ទាន់។
ក្នុងឱកាសចុះជួយភ្ជួរស្រែ និងដកស្ទូងជូនកសិករនៅ ភូមិឃុំ ស្រែក្រសាំង ស្រុក សៀមបូកនៅព្រឹកថ្ងៃទី១៧ខែសីហា ឆ្នាំ ២០១៥នេះអ្នកស្រី សៀង សារី ជាកសិករនៅភូមិស្រែក្រសាំង បានសំដែងការព្រួយបារម្ភទៅលើដំណាំស្រូវ ដែលបច្ចុប្បន្នកសិករយើង ដកស្ទូងបានលូតលាស់ហើយនោះ បែរជាមានសត្វខ្យងកើតច្រើនមីដេរដាស់ មកខាំបំបាក់ដើមស្រូវ នៅពេលយប់ ខ្ញុំទៅរើសនោះឃើញវាកាត់បំបាក់ក្នុង ដើមវាចុះវាជុំនៅក្នុងដើមស្រូវនោះវាកាត់បំបាក់ចុះអស់។
លោក កុល សំអុល អភិបាលខេត្តមានប្រសាសន៍ថា បញ្ហាដែលកសិករជួបប្រទះនេះស្នើឲ្យមន្ទីរកសិកម្មចុះទៅពិនិត្យឲ្យបានដិតដល់ពីព្រោះថា កសិករធ្វើការងារបង្កបង្កើនផល តែងតែពឹងផ្អែកទៅលើដំណាំស្រូវ ដើម្បីធានានូវសន្តិសុខស្បៀងសំរាប់ការរស់នៅ។
លោកអភិបាលខេត្តមានប្រសាសន៍ទៀតថា មន្ទីរកសិកម្មក៏ដូចជាមន្ត្រីបច្ចេកទេសជំនាញ ត្រូវសហការជាមួយអាជ្ញាធរមូលដ្ឋាន រៀបចំយន្តការដោះស្រាយទៅលើសត្វល្អិតបំផ្លាញដំណាំស្រូវនេះ ឲ្យមាន ប្រសិទ្ធភាពគ្រប់បញ្ហាទាំងអស់ ពិសេសចំពោះមុខគឺសត្វខ្យងតែម្តង។
លោក ទូច ធា ប្រធានមន្ទីរកសិកម្មខេត្តបានអះអាងថា ជារៀងរាល់ឆ្នាំ ខេត្តស្ទឹងត្រែង មិនសូវមានកើតបញ្ហាសត្វល្អិត ឬសត្វខ្យងមកបំផ្លាញស្រូវកសិករនោះទេ តែឆ្នាំនេះកើតមានសត្វខ្យងកាត់បំផ្លាញ ជារឿងមួយត្រូវឲ្យកសិករទាំងអស់ចុះពិនិត្យ ជាក់ស្តែងហើយតំបន់ ណាកើតមានសត្វទាំងនោះបំផ្លាញ ត្រូវរាយការណ៍ជូនមកមន្ទីរកសិកម្មឲ្យបានឆាប់បំផុត។
លោក ទទួលយកនូវការស្នើសុំពីប្រជាពលរដ្ឋ ឲ្យជួយទប់ស្កាត់បញ្ហារឿងខ្យងនេះ ហើយកសិករត្រូវចុះរើសតាមស្រែរបស់ខ្លួន មន្ទីរកសិកម្មនឹងប្រមូលទិញ ទោះបីមានបរិមាណតិចឬច្រើនក្តី យើងបានចាត់ក្រុមការងាររបស់មន្ទីរកសិកម្មសហការ ជាមួយអាជ្ញាធរដែនដី ឃុំ ស្រុកហ្នឹងចុះបំផុសឲ្យកសិករយើងប្រមូលខ្យង ប្រមូលឲ្យអស់ហើយ មន្ទីរកសិកម្មប្រមូលទិញដោយឲ្យតម្លៃគិត១គីឡូ៥០០រៀល អញ្ចឹងបើយើងប្រមូលបានជាអតិបរិមាហ្នឹងយើងកាត់បន្ថយការបំផ្លិចបំផ្លាញស្រូវរបស់កសិករយើងបានច្រើន។
សូមបញ្ជាក់ថា ជាមួយនឹងយន្តការនេះមន្ទីរកសិកម្មបានប្រកាសជូនដំណឹង ដល់កសិករគ្រប់មូលដ្ឋាន បើកើតមានសត្វល្អិតបំផ្លាញដំណាំអ្វីក៏ដោយ ត្រូវផ្តល់ព័ត៌មានជួន ទៅអាជ្ញាធរ ភូមិ ឃុំ ឬមកមន្ទីរកសិកម្មផ្ទាល់ ដើម្បីមានវិធានការទប់ស្កាត់ឲ្យទាន់ពេល៕
សត្វខ្យងស៊ីបំផ្លាញដំណាំស្រូវរបស់កសិករស្រុកសៀមបូក
0 Comments