មណ្ឌលគិរី ៖ ផ្លូវក្រាលកៅស៊ូចំនួនពីរខ្សែនៅក្រុងសែនមនោរម្យត្រូវបានគេមើលឃើញថា ស្ទើរតែបោះបង់ចោលដោយពិបាកធ្វើចរាចរ ផ្លូវទាំងពីរខ្សែនេះទីមួយចាប់ពីក្បែរខ្លោងទ្វារសាលាខេត្តមណ្ឌលគិរីឆ្ពោះទៅកាន់ភូមិឡៅការ និងរមណីយដ្ឋានសមុទ្រឈើក្នុងសង្កាត់សុខដុមនិងមួយខ្សែទៀតផ្លូវឆ្លងកាត់មុខសាលាដំបូងខេត្តក្នុងសង្កាត់ស្ពានមានជ័យក្រុងសែនមនោរម្យ។
បច្ចុប្បន្នផ្លូវទាំងពីរខ្សែខាងលើកំពុងរងការខូចខាតយ៉ាងធ្ងន់ធ្ងរពិបាកធ្វើចរាចរ ខាងមន្ទីរជំនាញសាធារណការខេត្តបានត្អូញត្អែរនិងបន្ទោស ក្រសួងសាធារណការថា ពិបាកស្នើកញ្ចប់ថវិកាក្នុងសាងសង់ផ្លូវ។
ប្រជាពលរដ្ឋធ្វើចរាចរឆ្លងកាត់ផ្លូវខាងលើនេះរួមទាំងភ្ញៀវទេសចរផងដែរបានត្អូញត្អែរថា គួរតែខាងមន្ទីរជំនាញសាធារណការខេត្តជួយពន្លឿនក្នុងការជួសជុលប្រព័ន្ធផ្លូវក្រាលកៅស៊ូនេះឡើងវិញផងព្រោះបើទុកចោលយូរទៅៗមិនព្រមជួសជុលវាអាចរងនូវការខូចខាតធ្ងន់ធ្ងរឡើងៗហើយទំហំនៃការចំណាយថវិកា របស់ជាតិក៏វាមានចំនួនច្រើនដែរ។
មន្ត្រីសាធារណការខេត្តជាច្រើនរូបបានសាទរនូវការចុះផ្សាយរបស់ប្រព័ន្ធផ្សព្វផ្សាយនានានៅក្នុងខេត្តនេះដើម្បីឲ្យថ្នាក់លើបានដឹងពីមូលហេតុច្បាស់លាស់ថាមន្ទីរមិនបានព្រងើយកន្តើយក្នុងការសាងសង់ និងសម្រួលដល់បញ្ហានេះទេ តែសំខាន់មន្ទីរបានធ្វើការស្នើសុំកញ្ចប់ថវិកាពីក្រសួងម្តងៗពេលក្រសួងទម្លាក់កញ្ចប់ប្រាក់មកឲ្យខាងមន្ទីរមិនបានគ្រប់គ្រាន់តាមតម្រូវការនោះទេ។ ខាងមន្ត្រីសាធារណការខេត្តមណ្ឌលគិរីបានលើកឡើងថា សូមឲ្យក្រសួងមានការពិចារណា និងជួយគិតគូរដល់ខេត្តមណ្ឌលគិរីផងព្រោះថាមណ្ឌលគិរីវាក៏ជាខេត្តមួយដូចខេត្តដទៃទៀតដែរនៅព្រះរាជាណាចក្រកម្ពុជា ហេតុអ្វីបានជាបណ្តាខេត្តផ្សេងៗគេមានកញ្ចប់ថវិការបស់ក្រសួងគ្រប់គ្រាន់។ ដោយឡែកខេត្តមណ្ឌលគិរីក្រសួងផ្តល់កញ្ចប់ថវិកាដែរតាមការស្នើរបស់មន្ទីរសាធារណការខេត្តនេះ តែការឆ្លើយតបរបស់ក្រសួងដែរ តែឧទាហរណ៍ថាបើស្នើសុំសំរាប់ផ្លូវ១០ខ្សែបានត្រឹមតែចំនួន៣ខ្សែប៉ុណ្ណោះ។
ទាក់ទិនបញ្ហាខាងលើនេះ អ្នកយកព័ត៌មានយើងនៅខេត្តមណ្ឌលគិរីពុំអាចសុំការបំភ្លឺពី លោករដ្ឋមន្ត្រីក្រសួងសាធារណការនិងដឹកជញ្ជូនបានទេជុំវិញបញ្ហានេះ៕
មន្ទីរសាធារណការខេត្ត ៖ មកពីអត់មានប្រាក់សាងសង់ទើបផ្លូវក្នុងក្រុងខូចខាត
0 Comments