ភ្នំពេញ ៖ លោក សម រង្ស៊ី ប្រធានគណបក្សសង្គ្រោះជាតិ កាលពីព្រឹកថ្ងៃទី១៧ ខែសីហា ឆ្នាំ២០១៥ បានធ្វើដំណើរទៅសួរសុខទុក្ខសកម្មជនរបស់ខ្លួនដែលត្រូវបានចោទប្រកាន់ និងដាក់ពន្ធនាគារចំនួន១៤នាក់កាលពីពេលថ្មីៗនេះ ប៉ុន្តែនៅក្នុងដំណើរទៅសួរសុខទុក្ខនេះ លោក សម រង្សី មិនបានជួបលោក ហុង សុខហួរ សមាជិកព្រឹទ្ធសភាគណបក្ស សម រង្ស៊ី ដែលទើបត្រូវបានតុលាការឃុំខ្លួនកាលពីថ្ងៃទី១៦សីហានោះទេ ដោយសារតែមិនទាន់មានការស្នើសុំ។
លោក អ៊ូ ច័ន្ទប្ញទ្ធិ មន្ត្រីអ្នកនាំពាក្យស្ដីទីគណបក្សសង្គ្រោះជាតិបានថ្លែងប្រាប់កម្ពុជាថ្មី កាលពីវេលាម៉ោង១១និង៤០នាទីព្រឹក ថ្ងៃទី១៧ ខែសីហា ឆ្នាំ២០១៥ថា ខាងពន្ធនាគារបានអនុញ្ញាតឲ្យយើងចូលទៅអង្គុយជជែកគ្នាជាមួយសកម្មជនចំនួន១៤នាក់ ដែលបានចាប់ខ្លួនកន្លងមក លើកលែងតែលោក ហុង សុខហួរ ដែលទើបចាប់ខ្លួន គឺមិនបានជួបទេ ហើយការមិនបានជួបនេះ ដោយសារតែមិនបានស្នើសុំ ពីព្រោះគាត់ទើបចាប់ខ្លួន។ លោកបញ្ជាក់ថា នៅក្នុងជំនួបនោះ លោក សម រង្ស៊ី បានផ្ដាំផ្ញើកុំឲ្យបាក់ទឹកចិត្ត ហើយកុំឲ្យអស់សង្ឃឹម និងមានទំនុកចិត្តទៅលើថ្នាក់ដឹកនាំ។
ចំណែកក្រុមអ្នកជាប់ឃុំបាននិយាយជាមួយលោក សម រង្ស៊ី វិញថា សូមកុំឲ្យគណបក្សពួកគេជាថ្នូរជាមួយរឿងអ្វីមួយ ហើយពួកគេបានផ្ញើមកអ្នកខាងក្រៅវិញថា ពួកគេបានសុខសប្បាយទេ ហើយពួកគេបានផ្ដាំផ្ញើឲ្យអ្នកនៅខាងក្រៅធ្វើអ្វី ដែលស្របច្បាប់ ដើម្បីការពារផលប្រយោជន៍ជាតិបន្តទៅទៀត។
សកម្មជនគណបក្សសង្គ្រោះជាតិទាំង១៤នាក់នោះ ជាប់ពាក់ព័ន្ធនឹងអំពើហិង្សានៅជិតទីលានប្រជាធិបតេយ្យកាលពីថ្ងៃ១៥ ខែកក្កដា ឆ្នាំ២០១៤។ នៅក្នុងសំណុំរឿងនេះ សកម្មជនគណបក្សសង្គ្រោះជាតិចំនួន១១នាក់ ត្រូវបានសាលាដំបូងរាជធានីភ្នំពេញកាត់ទោសដាក់ពន្ធនាគារ៧ឆ្នាំ ចំនួន៨នាក់ និងដាក់ពន្ធនាគារ២០ឆ្នាំ ចំនួន៣នាក់ ហើយ៣នាក់ទៀតមិនទាន់សម្រេចយ៉ាងណាទេ។ ដោយឡែក លោក ហុង សុខហួរ សមាជិកព្រឹទ្ធសភារបស់គណបក្ស សម រង្ស៊ី ត្រូវបានសមត្ថកិច្ចតុលាការបញ្ជូនទៅឃុំខ្លួនបណ្ដោះអាសន្នផងដែរ កាលពីថ្ងៃទី១៦ ខែសីហា ឆ្នាំ២០១៥នេះ បន្ទាប់ពីត្រូវចាប់ខ្លួនកាលពីថ្ងៃទី១៥សីហា ពាក់ព័ន្ធការក្លែងឯកសារសន្ធិសញ្ញាព្រំដែនកម្ពុជា-វៀតណាម។
ទាក់ទងបញ្ហានេះ លោក សម រង្ស៊ី បានថ្លែងប្រាប់អ្នកសារព័ត៌មានកាលពីរសៀលថ្ងៃទី១៦ ខែសីហាថា ការចាប់ខ្លួនសកម្មជនដោយតុលាការកន្លងមក មិនប៉ះពាល់ដល់វប្បធម៌សន្ទនាទេ ពីព្រោះវប្បធម៌សន្ទនា គឺជាផ្នត់គំនិតថ្មីមួយដែលយើងត្រូវរក្សាឲ្យជាប់លាប់ បើទោះបីជាមានស្ថានការតឹងរ៉ឹងយ៉ាងណាក៏ដោយ យើងត្រូវតែរក្សាឲ្យបាន ហើយលោកសង្ឃឹមថា ស្ថានការនឹងមានភាពធូរស្រាលនៅពេលបន្តិចទៀតនេះ លោកនឹងខិតខំប្រើមធ្យោបាយត្រជាក់ ដើម្បីធ្វើឲ្យសភាពការណ៍វិលមកដូចធម្មតាវិញ។
សូមបញ្ជាក់ថា លោក សម រង្ស៊ី ប្រធានគណបក្សសង្គ្រោះជាតិដែលបានធ្វើដំណើរទៅសួរសុខទុក្ខសកម្មជនរបស់ខ្លួនកាលពីព្រឹកថ្ងៃទី១៧ ខែសីហា ឆ្នាំ២០១៥នោះ អមដោយតំណាងរាស្ត្រចំនួនចំនួន៥រូប និងមេធាវីមួយរូបផងដែរ ហើយសរុបអ្នកចូលរួមប្រមាណ២០០នាក់៕
លោក សម រង្ស៊ី មិនបានជួបលោក ហុង សុខហួរ ដែលទើបត្រូវបានឃុំខ្លួនទេ(Update)
0 Comments