កូរ៉េ​ខាងត្បូង​នឹង​មិន​បញ្ឈប់​ការ​ឃោសនា​ បើ​កូរ៉េខាងជើង​មិន​សុំទោស​ឲ្យ​បាន​ច្បាស់លាស់

កាលពី​ថ្ងៃ​ចន្ទ ប្រធានាធិបតី​កូរ៉េខាងត្បូង​លោកស្រី Park Geun-hye បាន​ទាមទារ​ឲ្យ​កូរ៉េខាងជើង​សុំទោស​លើ​ឧប្បត្តិហេតុ​គ្រាប់មីន​នា​ពេល​ថ្មីៗ​ បើ​ទោះ​បីជា​គូ​សត្រូវ​ទាំងពីរ​នេះ​កំពុង​ធ្វើ​កិច្ច​ចរចា​​ក្នុង​គោលបំណង​ដើម្បី​បញ្ចប់​ភាព​តានតឹង​ដែល​បាន​បង្ក​ឲ្យ​មានការ​ប្រយុទ្ធ​គ្នា​ក៏ដោយ។

លោកស្រី Park បាន​និយាយ​ថា ការ​ផ្សាយ​ឃោសនា​ប្រឆាំង​កូរ៉េខាងជើង​នឹង​នៅតែ​បន្ត​លុះត្រាតែ​រដ្ឋាភិបាល​ក្រុង​ព្យុងយ៉ាង​ទទួលយក​ការទទួលខុសត្រូវ​ចំពោះ​ការ​ផ្ទុះ​គ្រាប់មីន​កាលពី​ដើមខែ​ដែល​បាន​បង្ក​ឲ្យ​មាន​ទាហាន​កូរ៉េខាងត្បូង​ចំនួន​ពីរ​នាក់​រងរបួស​នៅក្នុង​តំបន់​គ្មាន​យោធា (DMZ) ដែល​បែងចែក​ប្រទេស​ទាំងពីរ​។ ទោះបីជា​យ៉ាងណាក៏ដោយ កូរ៉េខាងជើង​បាន​បដិសេធ​ថា​ខ្លួន​មិនបាន​ដាក់​គ្រាប់មីន​នោះទេ។

ហេតុការណ៍​នេះ​បានក្លាយ​ទៅជា​វិបត្តិ​មួយ​រឹតតែ​ខ្លាំង​ ដែល​បាន​ធ្វើ​ឲ្យ​ភាគី​ទាំងពីរ​បាញ់​កាំភ្លើង​ធំ​ដាក់គ្នា​នៅ​ថ្ងៃ​ព្រហស្បតិ៍​ និង​បង្កើន​ការ​ត្រៀមខ្លួន​យោធា​របស់​ពួកគេ។អង្គការសហប្រជាជាតិ​ សហរដ្ឋអាមេរិក​ និង​សម្ព័ន្ធមិត្ត​របស់​កូរ៉េខាងជើង​ដ៏​ធំ​គឺ​ប្រទេស​ចិន​បាន​អំពាវនាវ​ឲ្យ​មាន​ភាព​ស្ងប់ស្ងាត់។

អំឡុង​ពេល​នៃ​ការ​ប្រឈមមុខ​ដាក់គ្នា​រយៈពេល​ពីរ​ឆ្នាំមុន​នៅ​ពេល​ ដែល​កូរ៉េខាងជើង​បាន​គំរាម​ចាត់វិធានការ​យោធា​ដើម្បី​ឆ្លើយតប​ទៅ​នឹង​សម​យុទ្ធ​រួមគ្នា​ ដោយ​កងកម្លាំង​សហរដ្ឋអាមេរិក​និង​កូរ៉េខាងត្បូង សហរដ្ឋអាមេរិក​ហោះហើរ​យន្តហោះ​ទម្លាក់​គ្រាប់បែក​បំបាំង​កាយ​នៅ​លើ​ឧបទ្វីប​កូរ៉េ​ហើយ​បាន​បញ្ជូន​នាវា​ផ្ទុក​យន្តហោះ​ទៅកាន់​តំបន់​នោះ។

ក្រសួងការពារជាតិ​កូរ៉េខាងត្បូង​បាន​និយាយ​ថា កូរ៉េខាងជើង​បាន​ដាក់​ពង្រាយ​កាំភ្លើង​ធំ​ដែល​មាន​ឥទ្ធិពល​ខ្លាំង​ជាង​ធម្មតា​ពីរ​ដង​នៅ​តាម​ព្រំដែន​ និង​មាន​នាវាមុជទឹក​ប្រមាណ​៥០ គ្រឿង នៅ​ឆ្ងាយ​ពី​មូលដ្ឋាន។

ការចរចា​បាន​ចាប់ផ្តើម​នៅ​ល្ងាច​ថ្ងៃ​សៅរ៍​ក្នុង​រយៈពេល​ខ្លី​បន្ទាប់​ពីថ្ងៃ​ផុត​កំណត់​របស់​កូរ៉េខាងជើង​ ដែល​បាន​កំណត់​ឲ្យ​ទីក្រុង​សេអ៊ូល​បញ្ឈប់​ការផ្សាយ​ឃោសនា​ប្រឆាំង​នឹង​ទីក្រុង​ព្យុងយ៉ាង​ បើ​មិន​ដូច្នោះ​ទេ​នឹង​ប្រឈម​នឹង​សកម្មភាព​យោធា​។ កិច្ច​ពិភាក្សា​បាន​បរាជ័យ​កាលពី​ព្រឹក​ថ្ងៃអាទិត្យ​ហើយ​បាន​ចាប់ផ្តើម​ជាថ្មី​នៅ​ពេល​រសៀល។

ទីប្រឹក្សា​សន្តិសុខ​ជាតិ​របស់​លោកស្រី Park គឺ​លោក Kim Kwan-jin និង​រដ្ឋមន្ត្រី​បង្រួបបង្រួម​លោក Hong Yong-pyo គឺជា​អ្នកតំណាង​សម្រាប់​ភាគី​កូរ៉េខាងត្បូង​នៅក្នុង​កិច្ចពិភាក្សា​នេះ។ ចំណែក​អ្នកតំណាង​ខាង​កូរ៉េខាងជើង​គឺ​លោក Hwang Pyong So ដែល​ជា​ជំនួយការ​យោធា​កំពូល​របស់​មេដឹកនាំ​កូរ៉េខាងជើង គីម​ជុង​អ៊ុន​ និង​លោក Kim Yang Gon ដែលជា​មន្ត្រី​ជើងចាស់​ទទួលបន្ទុក​កិច្ចការ​អន្តរ​កូរ៉េ។

ទំនាក់ទំនង​រវាង​ប្រទេស​ទាំងពីរ​ត្រូវបាន​ជាប់គាំង​ចាប់តាំងពី​ឆ្នាំ ២០១០ មក​នៅពេល​ការ​លិច​នាវាចម្បាំង​របស់​កូរ៉េខាងត្បូង​មួយគ្រឿង​ដែល​ក្រុង​សេ​អ៊ូ​ល​បាន​ស្តីបន្ទោស​លើ​នាវាមុជទឹក​របស់​កូរ៉េខាងជើង​ ខណៈ​ក្រុង​ព្យុងយ៉ាង​បាន​បដិសេធ​មិន​ទទួលខុសត្រូវ​លើ​ហេតុការណ៍​នេះ។ ប៉ុន្មាន​ថ្ងៃ​បន្ទាប់ពី​ឧបទ្ទវហេតុ​គ្រាប់មីន រដ្ឋាភិបាល​ទីក្រុង​សេ​អ៊ូ​ល​បានចាប់ផ្តើម​ការ​ផ្សាយរ​បស់​ខ្លួន​នៅក្នុង​ឧបករណ៍​ឃោសនា​យ៉ាង​ឮៗ។

វិបត្តិ​នេះ​បាន​កើន​ខ្លាំង​ឡើង​នៅ​ថ្ងៃ​ព្រហស្បតិ៍​នៅពេលដែល​កូរ៉េខាងជើង​បាន​បាញ់​បួន​គ្រាប់ ចូលទៅក្នុង​ប្រទេស​កូរ៉េខាងត្បូង​ ខណៈ​ទីក្រុង​សេ​អ៊ូ​ល​បាន​ឆ្លើយតប​ទៅវិញ​ ដោយ​ការវាយប្រហារ​កាំភ្លើង​ធំ​ចំនួន ២៩ គ្រាប់​។ ខណៈ​ពេល​នោះ កូរ៉េខាងជើង​បាន​ប្រកាស​ពី​ស្ថានភាព​នៃ​សង្គ្រាម​នៅ​តំបន់​ជួរមុខ ​ហើយ​តម្រូវ​ឲ្យ​កូរ៉េខាងត្បូង​បញ្ឈប់​ការឃោសនា​របស់ខ្លួន។

សហរដ្ឋអាមេរិក​ដែល​មាន​ទាហាន​ចំនួន​២៨ ៥០០​នាក់​ឈរជើង​នៅ​កូរ៉េខាងត្បូង​នោះ​កំពុង​ធ្វើ សម​យុទ្ធ​យោធា​រួមគ្នា​ប្រចាំឆ្នាំ​ជាមួយ​នឹង​កូរ៉េខាងត្បូង​។ ប្រទេស​កូរ៉េខាងជើង​ជានិច្ចកាល​បាន​ថ្កោលទោស​ចំពោះ​ការធ្វើ​សមយុទ្ធ​នេះ ហើយ​បាន​និយាយថា​វា​គឺជា​ការ​ត្រៀមខ្លួន​ធ្វើសង្គ្រាម ៕

Reuters

​

កូរ៉េ​ខាងត្បូង​នឹង​មិន​បញ្ឈប់​ការ​ឃោសនា​ បើ​កូរ៉េខាងជើង​មិន​សុំទោស​ឲ្យ​បាន​ច្បាស់លាស់