ភ្នំពេញ ៖ មន្ត្រីជំនាញនាយកដ្ឋានវាយតម្លៃទទួលស្គាល់បានអះអាងកាលពីវេលាម៉ោង១៣និង៤០នាទី ថ្ងៃទី១៧ ខែសីហាថា ក្នុងរយៈពេលដ៏ខ្លី កម្ពុជាបានពង្រីកវិស័យវាយតម្លៃទទួលស្គាល់លឿនបំផុតនៅក្នុងប្រទេស (CLM) លើការជំរុញវាយតម្លៃទៅលើអង្គភាពនិមួយៗ។ មន្ត្រីដដែលនេះបានអះអាងថា ខ្លឹមសារបង្កប់ដោយអត្ថន័យនេះជាការលើកឡើងរបស់ប្រធាននាយកដ្ឋានវាយតម្លៃទទួលស្គាល់ នៃក្រសួងឧស្សាហកម្ម និងសិប្បកម្ម ក្នុងសិក្ខាសាលាផ្សព្វផ្សាយការងារវាយតម្លៃទទួលស្គាល់ជូនដល់ស្ថាប័នម្ចាស់ក្រុមហ៊ុនឧស្សាហកម្មនៅមន្ទីរឧស្សាហកម្ម និងសិប្បកម្មរាជធានីភ្នំពេញ ថ្ងៃទី១៧ ខែសីហា ឆ្នាំ២០១៥។
លោកប្រធាននាយកដ្ឋានបានលើកឡើងទៀតថា គោលបំណងនៃការរៀបចំសិក្ខាសាលានេះ គឺដើម្បីផ្សព្វផ្សាយការងារវាយតម្លៃទទួលស្គាល់ដល់ក្រុមហ៊ុនឧស្សាហកម្ម សិប្បកម្ម ព្រោះការងារនេះមានសារៈសំខាន់បំផុតក្នុងការគាំទ្រដល់ការធ្វើពាណិជ្ជកម្ម ជាពិសេសការគាំទ្រដោយផ្ទាល់ ឬដោយប្រយោលដល់ការនាំចេញនាំចូលនូវផលិតផលដែលផលិតក្នុងស្រុក និងក្រៅស្រុក ដែលជាការចូលរួមចំណែកដល់អង្គការពាណិជ្ជកម្មពិភពលោក (WTO) ក្នុងន័យជួយសម្រួលដល់ការធ្វើពាណិជ្ជកម្មអន្តរជាតិ កាត់បន្ថយរបាំងបច្ចេកទេសនៃការធ្វើពាណិជ្ជកម្ម និងកាត់បន្ថយនូវការចំណាយពេលលើការធ្វើធុរកិច្ច ព្រមទាំងកាត់បន្ថយការចំណាយលើវិស័យឧស្សាហកម្ម និងជំនួញ សំដៅធានាដល់អ្នកប្រើប្រាស់ក្នុង និងក្រៅស្រុក ទទួលបាននូវផលិតផល ឬទំនិញមានគុណភាពជាដើម។
លោក ជ្រៀន សេងគង់ បានលើកឡើងបន្ថែមទៀតថា នាពេលអនាគតខាងមុខ អ្នកទាក់ទិនគ្រប់ស្ថាប័ន និងក្រុមហ៊ុន ឧស្សាហករ សិប្បករ ប្រាកដជាយល់ច្បាស់ពីភាពចាំបាច់នៃការងារវាយតម្លៃទទួលស្គាល់ ព្រមទាំងយល់ច្បាស់ពីការសហការជាមួយក្រសួងឧស្សាហកម្ម និងសិប្បកម្ម ដើម្បីរួមចំណែកក្នុងការអនុវត្តន៍លិខិតបទដ្ឋានគតិយុត្តិផ្សេងៗដែលមានជាធរមាន ក្នុងន័យធ្វើយ៉ាងណាឲ្យទំនិញមានគុណភាព និងអាចនាំចេញនាំចូលទៅវិញទៅមកបាន សំដៅកាត់បន្ថយរបាំងបច្ចេកទេសពាណិជ្ជកម្ម (TBT) ក្នុងតំបន់ ក៏ដូចជាសកលលោកផងដែរ។
សូមបញ្ជាក់ផងដែរថា កម្ពុជាជំរុញបង្កើតនាយកដ្ឋានវាយតម្លៃទទួលស្គាល់នៅក្នុងអាណត្តិទី៥នេះ ក្នុងគោលបំណងជំរុញការទទួលស្គាល់របស់អង្គភាពត្រួតពិនិត្យនិមួយៗ មានតម្លាភាពក្នុងការចុះពិនិត្យ ក្នុងនោះម្ចាស់សហគ្រាស ក្រុមហ៊ុន ឧស្សាហកម្មផ្សេងៗក៏មានសិទ្ធទទួលរើសស្ថាប័ន ដែលខ្លួនពេញចិត្តឲ្យចុះវាយតម្លៃក្រុមហ៊ុនរបស់ខ្លួន៕
កម្ពុជា ពង្រីកការវាយតម្លៃទទួលស្គាល់បានលឿនបំផុត ប្រសិនបើប្រៀបធៀបទៅប្រទេស(CLM)
0 Comments