ពោធិ៍សាត់ ៖ រថយន្តមួយគ្រឿងបានចរាចរលើផ្លូវជាតិលេខ៥ក្នុងល្បឿនលឿន ហើយសំបកកង់ចាស់ផងនោះ ក៏បានផ្ទុះកង់មុខផ្នែកខាងឆ្វេងបណ្ដាលឲ្យរេចង្កូតកាច់ទៅខាងឆ្វេងបត់មិនឈ្នះ ក៏រុលទៅចំណែកទ្រូងផ្លូវម្ខាងទៀតបុកម៉ូតូមកច្រាសទិសពីរគ្រឿងបណ្ដាលឲ្យបាត់បង់ជីវិតម្នាក់នៅកន្លែងរបួសធ្ងន់ម្នាក់ និងស្រាលពីរនាក់។ ចំណែកម៉ូតូខូចខាតស្ទើរទាំងស្រុង ឯរថយន្តបង្ក តៃកុងចុះគេចខ្លួនបាត់។
លោកម៉ោល សាវ៉ាន នគរបាលចរាចរណ៍ស្រុកក្រគរប្រាប់ថា ឧបហេតុនេះបានកើតឡើងកាលពីវេលាម៉ោង៥ល្ងាចថ្ងៃទី១៦ ខែសីហា ឆ្នាំ២០១៥ ត្រង់ចំណុចសាលាក្រហមផ្លូវរលួសរលាំងក្នុងភូមិតាកែវលើ ឃុំត្នោតជុំ ស្រុកក្រគរ ខេត្តពោធិ៍សាត់។ ជនរងគ្រោះទាំង៤នាក់ក្នុងឧបហេតុនេះទី១. ឈ្មោះ ឈឹម កុសល អាយុ៣៧ឆ្នាំ ភេទ ប្រុស មានទីលំនៅភូមិឃុំកើតហេតុ(ស្លាប់) ទី២.ឈ្មោះ ឈិន ជុំ ៣៣ឆ្នាំ ភេទប្រុស រស់នៅភូមិចេកចៅ ឃុំកំពង់ពោធិ៍(របួសធ្ងន់) និង២នាក់ទៀតរងរបួសស្រាល។
លោក ម៉ោល សាវ៉ាន ឲ្យដឹងទៀតថា បើតាមការរៀបរាប់ពីសាក្សីជាជនរងគ្រោះរបួសស្រាលក្នុងឧបហេតុដ៏រន្ធត់នេះឲ្យដឹងថា ពួកគេជាអង្គុយខាងក្រោយ ដោយចរាចរណ៍ម៉ូតូពីរ មួយគ្រឿងប្រភេទវ៉េវ មួយគ្រឿងទៀតសេ១២៥ ហើយម៉ូតូមួយជិះគ្នាពីរនាក់ក្នុងទិសដៅពីលិចទៅកើតលើទ្រូងផ្លូវអាទិភាព។
ប្រភពដដែលបានឲ្យដឹងទៀតថា ស្រប ដែលជិះសុខៗមកដល់ចំណុចកើតហេតុខាងលើ ពួកគេក៏បានឃើញរថយន្តរ៉េហ្វ័រ មួយគ្រឿងពណ៌ទឹកប្រាក់បានបោះពួយយ៉ាងលឿនពីកើតទៅលិចដោយល្បឿនលឿន ដែលរថយន្តនោះពាក់ស្លាក់លេខភ្នំពេញ 2R 05-57។ ពេលនោះក៏បានបែកកង់មុខខាងឆ្វេង រួចរេចង្កូតឆ្លងទ្រូងផ្លូវខាងឆ្វេងដៃចូលគំនូសទៅផ្លូវអាទិភាពខាងស្ដាំរបស់ម៉ូតូ ដែលកំពុងបើកមកច្រាសទិស រួចក៏បុករះម៉ូតូពួកគេទាំងពីរគ្រឿងពេញពីមុខមួយទំហឹង បណ្ដាលឲ្យស្លាប់អ្នកឌុបខាងមុខនៅនឹងកន្លែង។ ឯម៉ូតូមួយគ្រឿងទៀត អ្នកឌុបរបួសធ្ងន់ធ្ងរ រួមទាំងគេពីរនាក់អង្គុយក្រោយគ្រាន់តែរបួសស្រាលៗប៉ុណ្ណោះ។ ម៉ូតូទាំងពីរខូចខាតយ៉ាងដំណំ ហើយពួកគេឃើញតៃកុងកុងបើករថយន្តនោះបានចុះរត់គេចខ្លួនបាត់ដោយសារតែរថយន្តខូចខាងមុខទៅមិនរួច។
នគរបាលចរាចរណ៍បានឲ្យដឹងថា ករណីនេះគឺដោយសារតែមុនពេលបើកបរមិនត្រួតពិនិត្យយានយន្តព្រោះសំបកកង់សឹករេចរឹល ហើយត្រូវនឹងកម្ដៅថ្ងៃប៉ះកៅស៊ូក្ដៅមិនអាចទ្របានក៏ផ្ទុះកង់ទៅបុកអ្នកដទៃស្លាប់ និងរបួសតែម្ដង៕
រថយន្តរ៉េហ្វ័រផ្ទុះកង់មុខបោលបុករះម៉ូតូពីរគ្រឿង ស្លាប់១ របួស៣
0 Comments