ប្រាក់ ចាន់ស៊ីន ក្លិបម្កុដរាជសីហ៍ អ្នកប្រដាល់ដែលប្រកួតកម្រឈ្នះនោះ នៅតែបន្តចាញ់ដដែល ដោយវាយចាញ់ប៊ិត ប៊ុនធឿន អ្នកប្រដាល់ក្លិបតាព្រហ្មមានជ័យ ក្នុងទឹកទី២ នៅលើសង្វៀនBlack Cat នាយប់ថ្ងៃអាទិត្យទី៣០ ខែសីហានេះ។
ប្រាក់ ចាន់ស៊ីននេះ ពីដំបូងគេផ្គូឲ្យជួបអ្នកប្រដាល់មៀច សុខរ៉ា ក្លិបតាព្រហ្មដែរនេះ តែមៀច សុខរ៉ាខ្លាំងពេក ក៏ប្តូរដាក់ឲ្យប៊ិត ប៊ុនធឿន វាយជំនួសវិញ ប៉ុន្តែប្រាក់ ចាន់ស៊ីននៅតែវាយចាញ់ដដែល មិនអាចស្តារមុខមាត់បាននោះឡើយ នៅតែជាប់ប្រវត្តិចាញ់ដដែល។
លើកនេះ ចាន់ស៊ីន វាយបានមិនដល់ពីរទឹកទេ ក៏បោះបង់ការប្រកួត បន្ទាប់ពីត្រូវជង្គង់របស់ប៊ិនធឿន អុកចូលពោះទឹកនោះ ហើយមុន នេះបន្តិច ចាន់ស៊ីន ក៏ត្រូវអាជ្ញាកណ្តាលរាប់៨ម្តងដែរ ដោយសារជង្គង់ដដែលនេះ ។
សេន កុសល អ្នកប្រដាល់ក្លិបមោងឬស្សីមរតកគុនខ្មែរ បានប្រកួតឈ្នះផាន ផាត់យុទ្ធ អ្នកប្រដាល់ក្លិបសាលវ័ន្តកីឡា ដោយពិន្ទុ ក្រោយពីវាយគ្នា៥ទឹកពេញនោះ។
ផាត់យុទ្ធ គេជាអ្នកប្រដាល់ខ្លាំងគួរសមដែរ តែពេលមកប៉ះជាមួយសេន កុសល ទៅអត់រួច។នៅក្នុងទឹកទី៤ ផាន ផាត់យុទ្ធ ត្រូវអាជ្ញាកណ្តាលព្រមានដោយឲ្យចៅក្រមដកពិន្ទុ បន្ទាប់ពីគេវាយថែមជង្គង់ទៅលើកុសលត្រូវចំកណ្តាលមុខនោះ។ ព្រោះតែបែបនេះ ទើបចប់ការប្រកួតផាត់យុទ្ធ ចាញ់ពិន្ទុសេន កុសល។
រស់ វិបុល អ្នកប្រដាល់ក្លិបសាលវ័ន្តកីឡា ត្រូវថាន រ៉ាឌី អ្នកប្រដាល់ក្លិបសម្រែករាជសីហ៍ ផ្តួលឲ្យសន្លប់ក្នុងទឹកទី២ ហើយឆេង លាង អ្នកប្រដាល់ក្លិបកងពលតូចទ័ពឆត្រយោង៩១១ យកឈ្នះយ៉ាម ខេមរា ក្លិបរស្មីកុមារកំព្រា ក្នុងទឹកទី៤ ខណៈដែលច័ន្ទ វិរះ អ្នកប្រដាល់ក្លិបច័ន្ទបូរីវង្សកីឡា ផ្តួល លីន សុវណ្ណ អ្នកប្រដាល់ក្លិបបូរីរាជសីហ៍មានរិទ្ធឲ្យសន្លប់ក្នុងទឹកទី៤ ដែរ។
*សង្វៀនCambodia Beer
ពុទ្ធ ឆាយរិទ្ធី អ្នកប្រដាល់ក្លិបពុទ្ធសេរីវង្សកីឡា បានយកឈ្នះអ្នកប្រដាល់ចៅ ផលឌឿ ក្លិបសំរោងកោង ខេត្តបាត់ដំបងដោយពិន្ទុ បន្ទាប់ពីប្រកួតគ្នា ៥ ទឹកពេញកាលពីល្ងាចថ្ងៃទី៣០ ខែសីហានោះ។
ផលឌឿ ត្រូវអាជ្ញាកណ្ដាលរាប់៨ចំនួន២លើក នៅទឹកទី២ និងទឹកទី ៤ដោយសារកណ្ដាប់ដៃរបស់រិទ្ធី។ ផលឌឿជួបស្ថានភាពលំបាក ដោយសារតែកម្ពស់របស់គេចាញ់ប្រៀបរិទ្ធី។
អ្នកប្រដាល់មិន សិលា សមាគមប្រដាល់ក្រសួងការពារជាតិ ប្រើពេលតែ៣ ទឹកប៉ុណ្ណោះ ផ្ដួលអ្នកប្រដាល់ឡុង លឿងរ៉ា ក្លិបខ្លារខិនមានរិទ្ធ ឲ្យមានរបួស និងសន្លប់ ក្រោកលែងរួច។
អ្នកប្រដាល់ទាំង២ រូបនេះ ចាប់ផ្ដើមប្រើកែង និងជង្គង់ វាយប្រហារគ្នាតាំងពីដើមទឹកទី១ មកម្ល៉េះ។ ជាមួយនឹងការវាយលុក ពួកគេការពារយ៉ាងប្រយ័ត្នប្រយែងបំផុត។ ជាអ្នកលែងកែងដូចគ្នានោះ ពួកគេប្ដូរកែងគ្នាទៅវិញទៅមកដោយគ្មានញញើត។
នៅទឹកទី៣ ក្នុងខណៈដែលគេឱបគ្នា ដើម្បីប្រើជង្គង់នោះ សិលាបញ្ចេញកែងបានយ៉ាងល្អចំប្រជុំចិញ្ចើមលឿងរ៉ា បណ្ដាលឲ្យលឿងរ៉ាដួលសន្លប់ក្រោកលែងរួច។
វ៉ែន សុភ័ក្ត្រ អ្នកប្រដាល់ក្លិបកងពលតូចទ័ពឆត្រយោង៩១១ ប្រើកែងវាយទេស ឧត្តម អ្នកប្រដាល់ក្លិបកងពលតូចលេខ៧០ ឲ្យសន្លប់ក្រោកលែងរួចនៅទឹកទី៣ដែរ។
សារឿន តាន ក្លិបតាព្រហ្មមានជ័យ ប្រកួតឈ្នះលី កាពូយ ក្លិបខ្លារខិនមានរិទ្ធដោយពិន្ទុដាច់។ អ្នកប្រដាល់ទាំង ២ រូបនេះប្រកួតគ្នាក្នុងប្រភេទទម្ងន់៤៥គីឡូក្រាម។
*សង្វៀនGangzberg
អ្នកប្រដាល់រឿង សារ័ត្ន ក្លិបកងពលតូចទ័ពឆត្រយោង៩១១ ប្រកួតចាញ់ពិន្ទុ អ្នកប្រដាល់ ម៉ន ចាន់ដារ៉ា ក្លិបការិយាល័យទី៥ កងទ័ពជើងគោក ដោយពិន្ទុទាំងមិនអស់ចិត្ត។
ការប្រកួតដែលមាន៥ ទឹកនោះ ស្ទើរតែគ្រប់ទឹកទាំងអស់ ដារ៉ាជាអ្នកមានប្រៀប។ តាមពិតកលល្បិចរបស់តារាមិនស្មើនឹងសារ័ត្ននោះទេ តែសារ័ត្នចាញ់ កម្លាំង និងកម្ពស់ដារ៉ា ទើបការប្រកួតគេជួបការលំបាកនោះ។ តែទោះជាយ៉ាងណា ក៏សារ័ត្នធ្វើឲ្យដារ៉ាឈឺសាច់មិនស្ទើរដែរទេ។
ហេង ពន្លឺ អ្នកប្រដាល់ក្លិបព្រៃទទឹងខេត្តបាត់ដំបង ប្រកួតឈ្នះណក់ ស៊ីនួន ក្លិបឃ្លាំងមឿងកីឡា ដោយពិន្ទុដាច់ បន្ទាប់ពីការប្រកួតចប់ ទឹកទី ៥នោះ។
ទឹកទី ១ការប្រកួតមានស្ថានភាពប្រហាក់ប្រហែកគ្នាមែនតែ ៤ ទឹកចុងក្រោយពន្លឺមានប្រៀបដាច់តែម្ដង មិនតែប៉ុណ្ណោះនៅទឹកទី៥ ពន្លឺវាយស៊ីនួនឲ្យវង្វេងហើយត្រូវអាជ្ញាកណ្ដាលរាប់៨ទៀតផង។ ទោះជាយ៉ាងណា ក៏ការប្រកួតបន្តរហូតបញ្ចប់ទឹកទី៥ ហើយពន្លឺឈ្នះស៊ីនួនដោយពិន្ទុប៉ុណ្ណោះ។
ប៊ុន សុធាក្លិបកងយោធពលខេមរភូមិន្ទប្រកួតឈ្នះហេង ខ្លឹមខ្មៅក្លិបព្រៃទទឹងខេត្តបាត់ដំបងដោយពិន្ទុ ក្នុងខណៈដែលព្រឿង សោភ័ណ្ឌក្លិបសំរោងកោងកីឡាខេត្តបាត់ដំបង ប្រកួតចាញ់សេក មេសាក្លិបអង្គរមានជ័យខេត្តសៀមរាបដោយពិន្ទុនោះ។
*សង្វៀនK.Cement
ការប្រកួតជាលក្ខណៈមិត្តភាពអន្តរជាតិលើសង្វៀនSEA-TV កាលពីរសៀលថ្ងៃទី២៩ ខែសីហា អ្នកប្រដាល់រឿង សោភ័ណ្ឌ ក្លិបម្កុដរាជសីហ៍ ប្រកួតបានត្រឹមស្មើពិន្ទុជាមួយអ្នកប្រដាល់ថៃ Super Chhai។
អ្នកប្រដាល់ថៃរូបនេះ ធ្លាប់ប្រកួតចាញ់ម៉ឺន សុខហ៊ុច ក្លិបពុទ្ធសេរីវង្ស តែនៅពេលជួបជាមួយសោភ័ណ្ឌអ្នកប្រដាល់ថៃរូបនេះ ធ្វើឲ្យសោភ័ណ្ឌវាយចេញមិនរួចឡើយ។ សោភ័ណ្ឌ បានព្យាយាមប្រើកណ្ដាប់ដៃ ឯSuper Chhai ប្រើជើងទាត់ និង ជង្គង់បានយ៉ាងល្អ។
ពួកគេប្រកួតគ្នាពេញទាំង៥ទឹក ដោយទាំងសងខាងព្យាយាម រកឱកាសផ្ដួលគ្នាទៅវិញទៅមកតែមិនបានសម្រេចឡើយ។ ចប់ទឹកទី ៥ លទ្ធផលបានត្រឹមស្មើគ្នា។
ផល សោភ័ណ្ឌ អ្នកប្រដាល់ជើងខ្លាំងកម្ពុជា ក្លិបតាឡីដំរីមានរិទ្ធ ប្រើពេលតែ២ ទឹកប៉ុណ្ណោះ យកឈ្នះអ្នកប្រដាល់ថៃ Chhoy Chhaiបាន ដោយមិនបាច់ចំណាយកម្លាំងយូរ។
កណ្ដាប់ដៃរបស់សោភ័ណ្ឌ វាយចំសៀតផ្កាChhoy Chhai ធ្វើឲ្យអ្នកប្រដាល់ថៃរូបនេះដួលសន្លប់ក្រោកលែងរួចតែម្ដង។
បឺត សង្ឃឹម អ្នកប្រដាល់ក្លិបរ៉ាហាប់ស្វាយប៉ាក បានវាយឈ្នះ យិន បូរិន អ្នកប្រដាល់ក្លិបអាស៊ីកីឡាដោយពិន្ទុ ខណៈដែលសោំ ចន្ថា ក្លិបគីសែមានរិទ្ធ យកឈ្នះម៉ឺន ដា អ្នកប្រដាល់ក្លិបខ្លារខិនមានរិទ្ធ ដោយពិន្ទុដែរ៕
អ្នកឈ្នះ និងអ្នកចាញ់នៅSEA-TV
0 Comments